ಸಮರಸ ಸುದ್ದಿ

              ಕನ್ನಡ ಗಝಲ್
                    ಕವಯಿತ್ರಿ ಚೇತನಾ ಕುಂಬಳೆ:
ನೀ ಬರಲೆಂದೇ ಕಾದ ಸಮಯ ಹತ್ತಿರ ಬರುತ್ತಿದೆ ಹುಡುಗಾ
ನಿನ್ನೊಲವ ಸ್ಪರ್ಶಕ್ಕೆ ಮೈಮನವರಳಲು ಕಾದಿದೆ ಹುಡುಗಾ
     ಅಂಗೈಗೆ ಹಚ್ಚಿದ ಮದರಂಗಿಯಲ್ಲಿ ನಿನ್ನ ಹೆಸರಿದೆ
     ಕಾಡಿಗೆ ಹಚ್ಚಿದ ಕಂಗಳಲ್ಲಿ ನಿನ್ನ ಉಸಿರಿದೆ ಹುಡುಗಾ
ನೀ ಹಚ್ಚುವ ಬಣ್ಣಗಳು ನಾಚಿದ ಕೆನ್ನೆಯ ರಂಗೇರಿಸಬೇಕಿದೆ
ಒಲವ ಹಾದಿಯಲ್ಲಿ ನಿನ್ನ ಜೊತೆ ಹೆಜ್ಜೆಯಿಡಬೇಕಿದೆ ಹುಡುಗಾ
   ನೀನಿಡುವ ಮುತ್ತಿನ ರಂಗವಲ್ಲಿಗೆ ಕೆನ್ನೆಗಳು ನಾಚಬೇಕಿದೆ
   ನಿನ್ನ ಪ್ರೀತಿಯ ತೋಳ್ಬಂಧನದಲ್ಲಿ ಬಂಧಿಯಾಗಬೇಕಿದೆ ಹುಡುಗಾ
ಇಳಿಸಂಜೆಯಲಿ ಬಣ್ಣದೋಕುಳಿ ಚೆಲ್ಲಿದ ಬಾನ ಸೌಂದರ್ಯವ ಸವಿಯಬೇಕಿದೆ
ಜೊತೆಗಿದ್ದ ಮಧುರ ಕ್ಷಣಗಳು ನೆನಪ ಜೋಳಿಗೆಯನ್ನು ಸೇರಬೇಕಿದೆ ಹುಡುಗಾ
    ಉಸಿರಿರುವವರೆಗೂ ಜೊತೆ ಕುಳಿತು ಎಲ್ಲವನ್ನೂ ನೆನೆಯಬೇಕಿದೆ
    ತನುವಿನ ಮನದೊಳಗೆ ಮುಗಿಯದ ಆಸೆಗಳು ನೂರಾರಿದೆ ಹುಡುಗಾ

                   ಚೇತನಾ ಕುಂಬಳೆ: