ಅಯ್ಯಪ್ಪ ಭಕ್ತರಿಂದ ಸಬರ್‍ಮತಿಯಿಂದ ಶಬರಿಮಲೆಗೆ ಪಾದಯಾತ್ರೆ

ಕುಂಬಳೆ: ಗುಜರಾತ್ ರಾಜ್ಯದ ಸಬರ್‍ಮತಿಯಿಂದ ಕೇರಳದ ಶಬರಿಮಲೆವರೆಗೆ ಕಳೆದ ಅಕ್ಟೋಬರ್ 8ರಿಂದ ಮತ್ತೊಮ್ಮೆ ನರೇಂದ್ರ ಮೋದಿ ಅವರು ದೇಶದ ಪ್ರಧಾನಮಂತ್ರಿಯಾಗಬೇಕೆಂಬ ಪ್ರಾರ್ಥನೆಯೊಂದಿಗೆ ಅಯ್ಯಪ್ಪ ಸ್ವಾಮಿ ತಂಡವೊಂದು ಪಾದಯಾತ್ರೆ ಬೆಳೆಸಿದೆ. ದೇಶದ ಪ್ರಧಾನಿ ಮೋದಿ ಅವರ ಮಾತೃಶ್ರೀ ಹೀರಾಬೆನ್ ಅವರ ಆಶೀರ್ವಾದವನ್ನು ಪಡೆದು ಯಾತ್ರೆ ಆರಂಭಿಸಿರುವ ತಂಡವು 2019ರ ಚುನಾವಣೆಯಲ್ಲಿ ಅಭೂತಪೂರ್ವ ಜಯಗಳಿಸಿ ಎರಡನೇ ಬಾರಿ ಮೋದಿ ಅವರು ಪ್ರಧಾನಿ ಆಗಬೇಕು ಮತ್ತು ರಾಷ್ಟ್ರದ ಗಡಿ ಕಾಯುವ ಸೈನಿಕರ ಜೀವ ರಕ್ಷಣೆಯಾಗಬೇಕೆಂದು ಆಶಯ ವ್ಯಕ್ತಪಡಿಸದರು. ದೇಶದಲ್ಲಿ ಶಾಂತಿ ಹಾಗೂ ಐಕ್ಯತೆ ನೆಲೆಸಿರಬೇಕೆಂದು ಆಗ್ರಹಿಸಿರುವ ಈ ಅಯ್ಯಪ್ಪ ಸ್ವಾಮಿ ಅವರ ತಂಡ ಸೋಮವಾರ ಕುಂಬಳೆ ತಲುಪಿತು. ಗುಜರಾತಿನ ಸಬರ್‍ಮತಿ ತಟದಲ್ಲಿರುವ ಭೋಳೇಶ್ವರ ಮಹಾದೇವ ಕ್ಷೇತ್ರದಲ್ಲಿ ಪೂಜೆಯನ್ನು ಸಲ್ಲಿಸಿ ತೊಕ್ಕೋಟಿನ ರಾಜೇಶ್ ಗುರುಸ್ವಾಮಿ ನೇತೃತ್ವದಲ್ಲಿ ಶಬರಿಮಲೆಗೆ ಹೊರಟ 70 ಮಂದಿ ಅಯ್ಯಪ್ಪ ಭಕ್ತರ ತಂಡ ಜ.15ರಂದು ಶಬರಿಮಲೆ ತಲುಪಲಿದೆ. ಇವರನ್ನು ಕುಂಬಳೆ ನಿತ್ಯಾನಂದ ಸ್ವಾಮಿ ಮಂದಿರದಲ್ಲಿ ಕುಂಬಳೆ ಪಂ.ಬಿಜೆಪಿ ಸಮಿತಿ ವತಿಯಿಂದ ಸ್ವಾಗತಿಸಲಾಯಿತು. ಈ ಸಂದರ್ಭದಲ್ಲಿ ಕುಂಬಳೆ ಪಂ. ಬಿಜೆಪಿ ಅಧ್ಯಕ್ಷ ಕೆ.ಶಂಕರ ಆಳ್ವ, ಪ್ರಧಾನ ಕಾರ್ಯದರ್ಶಿ ಕೆ.ಸುಧಾಕರ ಕಾಮತ್, ಜಿಲ್ಲಾ ಸಮಿತಿ ಸದಸ್ಯ ಕೆ.ರಮೇಶ್ ಭಟ್, ಮಣಿಕಂಠ ರೈ , ವಿವೇಕ್ ಗುರುಸ್ವಾಮಿ ಉಪಸ್ಥಿತರಿದ್ದರು.