ಬದಿಯಡ್ಕ: ನೀರ್ಚಾಲಿನಲ್ಲಿ ಹೋಟೆಲ್ ಕಾರ್ಮಿಕರಾಗಿ ದುಡಿಯುತ್ತಿದ್ದ ಸೂರಂಬೈಲು ನಿವಾಸಿ ಗೋಪಾಲಕೃಷ್ಣ ಗಟ್ಟಿ (57) ಇತ್ತೀಚೆಗೆ ನಡೆದ ರಸ್ತೆ ಅಪಘಾತದಲ್ಲಿ ಗಂಭೀರ ಗಾಯಗೊಂಡು ಗುಣಮುಖರಾಗದೆ ಕುಟುಂಬದ ಆರ್ಥಿಕ ಅಡಚಣೆಯಿಂದ ಚಿಕಿತ್ಸೆಯಿಂದ ಹಿಂದೆ ಸರಿಯಬೇಕಾಗಿ ಬಂದಿದೆ.
ಎಂದಿನಂತೆ ಹೋಟೆಲ್ ವೃತ್ತಿಯನ್ನು ಮುಗಿಸಿ ಡಿಸೆಂಬರ್ 15ರಂದು ರಾತ್ರಿ 8 ಗಂಟೆಗೆ ಸೂರಂಬೈಲಿನಲ್ಲಿ ಹಾಲು ಖರೀದಿಸಿ ರಸ್ತೆ ದಾಟುತ್ತಿದ್ದ ಸಂದರ್ಭದಲ್ಲಿ ಇವರಿಗೆ ಅಪಘಾತ ಸಂಭವಿಸಿದೆ. ಕೂಡಲೇ ಕುಂಬಳೆ ಜಿಲ್ಲಾ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆಯನ್ನು ನೀಡಲಾಗಿತ್ತು. ಉನ್ನತ ಚಿಕಿತ್ಸೆಗಾಗಿ ಮಂಗಳೂರು ಕೆ.ಎಸ್.ಹೆಗ್ಡೆ ಆಸ್ಪತ್ರೆಗೆ ಕರೆದೊಯ್ದು ಅಲ್ಲಿ 5 ದಿನಗಳ ಚಿಕಿತ್ಸೆಯನ್ನು ನೀಡಲಾಗಿತ್ತು. 75 ಸಾವಿರಕ್ಕಿಂತಲೂ ಹೆಚ್ಚು ಮೊತ್ತ ಅಂದು ಖರ್ಚಾಗಿತ್ತು. ಹಣದ ಕೊರತೆಯಿಂದ ಅಲ್ಲಿಂದ ಮನೆಗೆ ಕರೆತಂದಿದ್ದರು. ಕೆಲವು ದಿನಗಳ ನಂತರ ಕೈಕಾಲುಗಳಿಗೆ ಬಲವಿಲ್ಲದೆ, ನಡೆದಾಡಲೂ ಆಗದ ಸ್ಥಿತಿಗೆ ತಲುಪಿದ್ದು, ಕಾಸರಗೋಡು ಸರಕಾರೀ ಆಸ್ಪತ್ರೆಗೆ ದಾಖಲಿಸಿ ಚಿಕಿತ್ಸೆಯನ್ನು ನೀಡಲಾಗಿತ್ತು. ಅಗತ್ಯ ಸೌಲಭ್ಯವಿಲ್ಲದ ಹಿನ್ನೆಲೆಯಲ್ಲಿ ವೈದ್ಯರ ನಿರ್ದೇಶನದಂತೆ ಮಂಗಳೂರು ವೆನ್ಲಾಕ್ ಆಸ್ಪತ್ರೆಗೆ ಸೇರಿಸಲಾಯಿತು. ಸ್ವಲ್ಪ ದಿನ ಚಿಕಿತ್ಸೆಯನ್ನು ನೀಡಿ ಆರ್ಥಿಕ ಮುಗ್ಗಟ್ಟಿನಿಂದ ಪುನಃ ಇದೀಗ ಮನೆಗೆ ತಲುಪಿಸಲಾಗಿದೆ. ಮನೆಯಲ್ಲಿ ಮಂಚದಲ್ಲಿ ಮಲಗಿದ ಸ್ಥಿತಿಯಲ್ಲಿರುವ ಇವರು ಮಧುಮೇಹ ಖಾಯಿಲೆಯಿಂದಲೂ ಬಳಲುತ್ತಿದ್ದಾರೆ. ವೈದ್ಯರ ಸಲಹೆಯಂತೆ ಕುತ್ತಿಗೆಯಲ್ಲಿ ತೂತನ್ನು ಮಾಡಿ ಓಕ್ಸಿಜನ್ ಹಾಗೂ ಆಹಾರ ನೀಡಲಾಗುತ್ತಿದ್ದು ಚಿಕಿತ್ಸೆಯನ್ನು ಅರ್ಧದಲ್ಲಿ ನಿಲ್ಲಿಸಲಾಗಿದೆ.
DOCTYPE html>
