ಮತಗಟ್ಟೆಗಳಲ್ಲಿ ಸಿಬ್ಬಂದಿಗೆ ಆಹಾರ ಒದಗಿಸಲು ಕುಟುಂಬಶ್ರೀ

ಕಾಸರಗೋಡು: ಲೋಕಸಭೆ ಚುನಾವಣೆ ಅಂಗವಾಗಿ ಮತಗಟ್ಟೆಗಳಲ್ಲಿ ಆಹಾರ ಸೌಲಭ್ಯ ಪೂರೈಕೆ ಮಾಡುವಲ್ಲಿ ಕುಟುಂಬಶ್ರೀ ತನ್ನದೇ ಕೊಡುಗೆ ನೀಡಲಿದೆ. ಮತಗಟ್ಟೆಗಳಲ್ಲಿ ಕರ್ತವ್ಯದಲ್ಲಿ ನೇಮಕಗೊಂಡಿರುವ ಸಿಬ್ಬಂದಿಗೆ ಆಹಾರ, ಕುಡಿಯುವ ನೀರು ಇತ್ಯಾದಿ ವ್ಯವಸ್ಥೆಯ ಹೊಣೆಯನ್ನು ಕುಟುಂಬಶ್ರೀ ಜಿಲ್ಲಾ ಮಿಷನ್ ಹೊತ್ತುಕೊಂಡಿದೆ. ಜೊತೆಗೆ ಆಯಾ ಕೇಂದ್ರಗಳ ಶುಚೀಕರಣದ ಹೊಣೆಯನ್ನೂ ಈ ಸಂಸ್ಥೆ ವಹಿಸಿಕೊಂಡಿದೆ. ಕೆಲವು ಗ್ರಾಮಾಂತರ ಪ್ರದೇಶಗಳಲ್ಲಿ ಚುನಾವಣೆ ಕರ್ತವ್ಯದಲ್ಲಿರುವ ಸಿಬ್ಬಂದಿಗೆ ಆಹಾರ ಲಭಿಸದೇ ಇರುವ ಸಾಧ್ಯತೆಗಳ ಹಿನ್ನೆಲೆಯಲ್ಲಿ ಜಿಲ್ಲಾ ಚುನಾವಣೆ ಅಧಿಕಾರಿಯೂ ಆಗಿರುವ ಜಿಲ್ಲಾಧಿಕಾರಿ ಡಾ.ಡಿ.ಸಜಿತ್ ಬಾಬು ಅವರ ಆದೇಶ ಪ್ರಕಾರ ಕುಟುಂಬಶ್ರೀ ಮೂಲಕ ಆಹಾರ ಪೂರೈಕೆಯಾಗಲಿದೆ. ಇದಕ್ಕಿರುವ ಸಿದ್ಧತೆಗಳೂ ನಡೆಯುತ್ತಿವೆ. ಚುನಾವಣೆ ಸಂಬಂಧ ಸಾಮಗ್ರಿಗಳನ್ನು ಪಡೆಯಲು ಸಿಬ್ಬಂದಿ ತಲಪುವ ವಿತರಣೆ ಕೇಂದ್ರಗಳಲ್ಲಿ ಇವರಿಗೆ ಬೇಕಾದ ಆಹಾರ ವಿತರಣೆ ನಡೆಯಲಿದೆ. ನಂತರ ಮತಗಟ್ಟೆಗಳಲ್ಲಿ ಹಾಜರಾಗುವ ಸಿಬ್ಬಂದಿಗೆ 200 ರೂ. ನ ಕೂಪನ್ ನೀಡಲಾಗುವುದು. ಈ ಕೂಪನ್ ಬಳಸಿ ದಿನಕ್ಕೆ 5 ಹೊತ್ತಿನ ಆಹಾರ, ಪಾನಕಗಳ ಪೂರೈಕೆ ನಡೆಯಲಿದೆ. ಏ.22ರಂದು ಸಂಜೆ ಮತಗಟ್ಟೆಗಳಲ್ಲಿ ಹಾಜರಾಗುವ ಸಿಬ್ಬಂದಿಗೆ ರಾತ್ರಿ 8.30ಕ್ಕೆ ಭೋಜನ ಲಭಿಸಲಿದೆ. 23ರಂದು ಬೆಳಗ್ಗೆ 5.30ಕ್ಕೆ ಬೆಡ್ ಕಾಫಿ, 8.30ಕ್ಕೆ ಬೆಳಗ್ಗಿನ ಉಪಹಾರ, 11 ಗಂಟೆಗೆ ಚಹಾ, ಲಘು ಉಪಹಾರ, ಮಧ್ಯಾಹ್ನ 1 ಗಂಟೆಗೆ ಭೋಜನ, 3.30ಕ್ಕೆ ಚಹಾ, ಲಘು ಉಪಹಾರ ವಿತರಣೆಯಾಗಲಿದೆ. ನಂತರ ಮತದಾನಪ್ರಕ್ರಿಯೆ ಪೂರ್ಣಗೊಂಡು ಮತಯಂತ್ರ ಸಹಿತ ಸಾಮಾಗ್ರಿಗಳನ್ನು ಮೂಲಕೇಂದ್ರಕ್ಕೆ ತಲಪಿಸಿದ ನಂತರ ಅಲ್ಲಿ ಸಿಬ್ಬಂದಿಗೆ ಆಹಾರ ಒದಗಿಸಲಾಗುವುದು. ಬೆಳಿಗ್ಗಿನ ಉಪಹಾರದಲ್ಲಿ ಇಡ್ಲಿ, ವಡೆ, ದೋಸೆ, ಪುಟ್ಟ್, ವೆಳ್ಳಪ್ಪಂ, ಕಡ್ಲೆ ಕರಿ, ಸಾಂಬಾರ್ ಇತ್ಯಾದಿ ಇರುವುದು. ಮಧ್ಯಾಹ್ನದ ಭೋಜನದಲ್ಲಿ ಸಸ್ಯಾಹಾರಿ ಬಿರಿಯಾನಿ, ಚಿಕ್ಕನ್ ಬಿರಿಯಾನಿ , ಗಂಜಿ-ಚಟ್ನಿ ಇತ್ಯಾದಿ ಇರಲಿದೆ. ಈ ಸಂಬಂಧ ಜಿಲ್ಲಾಧಿಕಾರಿ ಛೇಂಬರ್ ನಲ್ಲಿ ನಡೆದ ಸಿದ್ಧತಾ ಸಭೆಯಲ್ಲಿ ಜಿಲ್ಲಾಧಿಕಾರಿ ಡಾ.ಡಿ.ಸಜಿತ್ ಬಾಬು, ಚುನಾವಣೆ ವಿಭಾಗ ಸಹಾಯಕ ಜಿಲ್ಲಾಧಿಕಾರಿ ವಿ.ಪಿ.ಅಬ್ದುಲ್ ರಹಮಾನ್, ಕುಟುಂಬಶ್ರೀ ಸಹಾಯಕ ಜಿಲ್ಲಾ ಸಂಚಾಲಕ ಸಿ.ಹರಿದಾಸನ್, ಜಿಲ್ಲಾ ಪ್ರೋಗ್ರಾಂ ಪ್ರಬಂಧಕರಾದ ಟಿ.ಪಿ.ಹರಿಪ್ರಸಾದ್, ಅಂಜಲಿ, ಕೆ.ಜಸೀಂ ಮೊದಲಾದವರು ಉಪಸ್ಥಿತರಿದ್ದರು.