ಬಿ.ಇಡಿ ಓದಲು ಉತ್ಸುಕರಾದ ವಿದ್ಯಾರ್ಥಿಗಳು

         

    ಕಾಸರಗೋಡು: ಕಣ್ಣೂರು ವಿ.ವಿ. ಯ ಕನ್ನಡ ಬಿ.ಎ. ಮತ್ತು ಎಂ.ಎ. ಪರೀಕ್ಷೆಗಳ ಫಲಿತಾಂಶ ಪ್ರಕಟವಾಗಿದ್ದು, ವಿದ್ಯಾರ್ಥಿನಿಯರು ಮೇಲುಗೈ ಸಾಧಿಸಿದ್ದಾರೆ. ಕನ್ನಡ ಎಂ.ಎ ಪದವಿಯಲ್ಲಿ ಮೊದಲ ಸ್ಥಾನವನ್ನು ಕಾಸರಗೋಡು ಸರಕಾರಿ ಕಾಲೇಜಿನ ರಾಜಾರಾಮ ಪಿ, ದ್ವಿತೀಯ ಸ್ಥಾನವನ್ನು ವಿಶಾಲಾಕ್ಷಿ ಬಿ.ಕೆ. ಮತ್ತು ತೃತೀಯ ಸ್ಥಾನವನ್ನು ಚೇತನಾ ಎ. ಅವರು ಪಡೆದುಕೊಂಡಿದ್ದಾರೆ.
ಕನ್ನಡ ಬಿ.ಎ. ಯಲ್ಲಿ ಕಾಸರಗೋಡು ಸರಕಾರಿ ಕಾಲೇಜಿನ ಶ್ರದ್ಧಾ ಎನ್.ಭಟ್ ಪ್ರಥಮ ಸ್ಥಾನವನ್ನು, ಇದೇ ಕಾಲೇಜಿನ ಫಾತಿಮತ್ ಫರ್ಸೀನಾ ದ್ವಿತೀಯ ಸ್ಥಾನವನ್ನು ಪಡೆದುಕೊಂಡಿದ್ದಾರೆ. ತೃತೀಯ ಸ್ಥಾನವನ್ನು ಮಂಜೇಶ್ವರ ಗೋವಿಂದ ಪೈ ಸ್ಮಾರಕ ಸರಕಾರಿ ಕಾಲೇಜಿನ ಅನುಶ್ರೀ ಸಿ.ಎಚ್. ಪಡೆದಿದ್ದಾರೆ.
      ಕನ್ನಡ ಎಂ.ಎ ಫಲಿತಾಂಶ : ಕನ್ನಡ ಎಂ.ಎ ಯಲ್ಲಿ ಪ್ರಥಮ ಸ್ಥಾನವನ್ನು ಪಡೆದ ರಾಜಾರಾಮ ಪಿ. ಅವರು ಮುಳಿಯಾರು ಸಮೀಪದ ಶ್ಯಾಮ ಭಟ್ ಕೆ. ಮತ್ತು ಮುಕಾಂಬಿಕ ಪಿ. ದಂಪತಿಗಳ ಪುತ್ರ. ಕನ್ನಡ ವಿದ್ಯಾರ್ಥಿಗಳ ಸಾಹಿತ್ಯಕ ಸಾಂಸ್ಕøತಿಕ ವೇದಿಕೆ ಸ್ನೇಹರಂಗದ ಕಾರ್ಯದರ್ಶಿಯಾಗಿ, ಎನ್ನೆಸ್ಸೆಸ್ ಸ್ವಯಂ ಸೇವಕರಾಗಿ ದುಡಿದಿದ್ದರು. ಕಣ್ಣೂರು ವಿ.ವಿ. ಕಲೋತ್ಸವ ಸ್ಪರ್ಧೆಯ ನಾಟಕದಲ್ಲಿ ಸತತ ಮೂರು ಬಾರಿ ಬಹುಮಾನ ಪಡೆದಿರುವ ಅವರು, ಕೆ.ಎ.ಎಲ್.ಪಿ. ಶಾಲೆ ಕೋಟೂರು, ಎ.ಯು.ಪಿ. ಶಾಲೆ ಬೋವಿಕಾನ, ಬಿ.ಎ.ಆರ್. ಹಿರಿಯ ಪ್ರೌಢ ಶಾಲೆ ಬೋವಿಕಾನ ಈ ವಿದ್ಯಾಸಂಸ್ಥೆಗಳ ಹಳೆ ವಿದ್ಯಾರ್ಥಿ. ಓದು ಹಾಗೂ ನಾಣ್ಯ ಸಂಗ್ರಹವನ್ನು ಹವ್ಯಾಸವಾಗಿರಿಸಿಕೊಂಡಿರುವ ಅವರು ಮುಂದೆ ಬಿ.ಇಡಿ ಓದಲು ಉತ್ಸುಕರಾಗಿದ್ದಾರೆ.
     ಕನ್ನಡ ಎಂ.ಎ ಯಲ್ಲಿ ದ್ವಿತೀಯ ಸ್ಥಾನವನ್ನು ಪಡೆದ ವಿಶಾಲಾಕ್ಷಿ ಬಿ.ಕೆ. ಅವರು ಬೆದ್ರಡ್ಕ ಬಾಬು ಪೂಜಾರಿ ಮತ್ತು ಪುಷ್ಪ ದಂಪತಿಗಳ ಪುತ್ರಿ. ಕನ್ನಡ ವಿದ್ಯಾರ್ಥಿಗಳ ಸಾಹಿತ್ಯಕ ಸಾಂಸ್ಕøತಿಕ ವೇದಿಕೆ ಗಿಳಿವಿಂಡು ಮತ್ತು ಸ್ನೇಹರಂಗದ ಪದಾ„ಕಾರಿಯಾಗಿ ದುಡಿದಿದ್ದರು. ಜಿ.ಎಲ್.ಪಿ.ಎಸ್. ಕಂಬಾರು, ಜಿ.ಯು.ಪಿ.ಎಸ್. ಮತ್ತು ಜಿ.ಎಚ್.ಎಸ್.ಎಸ್ ಮೊಗ್ರಾಲ್ ಪುತ್ತೂರು, ಬಿ.ಇ.ಎಂ.ಎಚ್.ಎಸ್.ಎಸ್. ಕಾಸರಗೋಡು ಹಾಗೂ ಮಂಜೇಶ್ವರ ಗೋವಿಂದ ಪೈ ಸ್ಮಾರಕ ಸರಕಾರಿ ಕಾಲೇಜಿನ ಹಳೆ ವಿದ್ಯಾರ್ಥಿ. ಓದು, ಬರಹವನ್ನು ಹವ್ಯಾಸವಾಗಿರಿಸಿಕೊಂಡ ಇವರು ಮುಂದೆ ಬಿ.ಇಡಿ ಓದುವ ಹಂಬಲ ವ್ಯಕ್ತಪಡಿಸಿದ್ದಾರೆ.
     ಮೂರನೆಯ ಸ್ಥಾನವನ್ನು ಪಡೆದ ಚೇತನಾ ಎ. ಅವರು ಕೋಟೂರು ಸಮೀಪದ ಅಮೆಕ್ಕಾರು  ಸುರೇಶ್ ರೈ ಮತ್ತು ಲಕ್ಷ್ಮೀ ದಂಪತಿಗಳ ಪುತ್ರಿ. ಕನ್ನಡ ವಿದ್ಯಾರ್ಥಿಗಳ ಸಾಹಿತ್ಯಕ ಸಾಂಸ್ಕøತಿಕ ವೇದಿಕೆ ಸ್ನೇಹರಂಗದ ಪದಾಧಿಕಾರಿಯಾಗಿ ದುಡಿದಿದ್ದರು. ಓದು, ಬರಹವನ್ನು ಹವ್ಯಾಸವಾಗಿರಿಸಿಕೊಂಡ ಇವರು ಮುಂದೆ ಬಿ.ಇಡಿ ಓದುವ ಹಂಬಲ ವ್ಯಕ್ತಪಡಿಸಿದ್ದಾರೆ. ಕೆ.ಎ.ಎಲ್.ಪಿ. ಶಾಲೆ ಕೋಟೂರು, ಎ.ಯು.ಪಿ ಶಾಲೆ ಬೋವಿಕಾನ, ಬಿ.ಎ.ಆರ್. ಹಿರಿಯ ಪ್ರೌಢ ಶಾಲೆ ಬೋವಿಕಾನ ವಿದ್ಯಾಸಂಸ್ಥೆಗಳ ಹಳೆ ವಿದ್ಯಾರ್ಥಿ.
     ಕನ್ನಡ ಬಿ.ಎ. ಫಲಿತಾಂಶ : ಕನ್ನಡ ಬಿ.ಎ. ಪರೀಕ್ಷೆಯಲ್ಲಿ ಪ್ರಥಮ ಸ್ಥಾನವನ್ನು ಪಡೆದ ಶ್ರದ್ಧಾ ಎನ್. ಭಟ್ ಅವರು ಕಾಸರಗೋಡು ಸರಕಾರಿ ಕಾಲೇಜಿನ ವಿದ್ಯಾರ್ಥಿ. ಸಾಹಿತ್ಯ, ಸಂಗೀತ, ಹರಿಕತೆ ಮತ್ತು ಯಕ್ಷಗಾನ ತಾಳಮದ್ದಳೆಯಲ್ಲಿ ವಿಶೇಷ ಆಸಕ್ತಿಯಿರುವ ಇವರು ಈಗಾಗಲೇ ಈ ಕ್ಷೇತ್ರಗಳಲ್ಲಿ ಗುರುತಿಸಿಕೊಂಡಿದ್ದಾರೆ. ಕಾಸರಗೋಡು ಮಾತ್ರವಲ್ಲದೆ ಕರ್ಣಾಟಕದ ಮಂಗಳೂರು ಉಡುಪಿ, ಕಾರ್ಕಳ, ಹಾಸನ, ಮೈಸೂರು ಈ ಮುಂತಾದ ಭಾಗಗಳಲ್ಲಿ ಹರಿಕಥೆ, ಕಾವ್ಯವಾಚನ ಮುಂತಾದ ಸಾಹಿತ್ಯ ಸಾಂಸ್ಕøತಿಕ ಕಾರ್ಯಕ್ರಮಗಳಲ್ಲಿ ಭಾಗವಹಿಸಿದ್ದಾರೆ. ಸಿರಿಚಂದನ ಕನ್ನಡ ಯುವ ಬಳಗವು ನಡೆಸಿಕೊಂಡು ಬರುತ್ತಿರುವ ಯಕ್ಷನುಡಿ ಸರಣಿ ಮನೆ ಮನೆ ಅಭಿಯಾನ ತಾಳಮದ್ದಳೆ ಕಾರ್ಯಕ್ರಮದ ಯುವ ಅರ್ಥಧಾರಿಗಳಲ್ಲಿ ಒಬ್ಬರಾಗಿದ್ದಾರೆ.  ಬೇಲೂರಿನಲ್ಲಿ ನಡೆದ ಅಖಿಲ ಕರ್ನಾಟಕ ಮಕ್ಕಳ ಗಮಕ ಸಮ್ಮೇಳನದ ಅಧ್ಯಕ್ಷತೆ ವಹಿಸಿದ್ದರು. ಸುರತರಂಗಿಣಿ ಎಂಬ ಕುಸುಮ ಷಟ್ಪದಿಯಲ್ಲಿ ರಚನೆಯಾದ ಪುಸ್ತಕವನ್ನು ಪ್ರಕಟಿಸಿದ್ದಾರೆ. ಕಣ್ಣೂರು ವಿ.ವಿ.  ಕಲೋತ್ಸವದ ಕವಿತಾ ರಚನೆ, ಕನ್ನಡ ಕಂಠಪಾಠ ಸ್ಪರ್ಧೆಗಳಲ್ಲಿ ಸತತ ಮೂರು ವರ್ಷಗಳಿಂದ ಬಹುಮಾನ ಪಡೆಯುತ್ತಾ ಬಂದಿದ್ದಾರೆ. ಸ್ನೇಹರಂಗದ ಮುಖವಾಣಿ ಪತ್ರಿಕೆ ಕನ್ನಡ ಧ್ವನಿಯ ಸಂಪಾದಕಿಯಾಗಿ ದುಡಿದ್ದಾರೆ. ಮುಂದೆ ಎಂ.ಎ. ಪದವಿ ಮಾಡಲು ಆಸಕ್ತರಾಗಿರುವ ಇವರು ಸರಕಾರಿ ಹಿರಿಯ ಪ್ರೌಢಶಾಲೆ ಕಾಯರ್‍ಕಟ್ಟೆ ಮತ್ತು ಸರಕಾರಿ ಹಿರಿಯ ಪ್ರೌಢಶಾಲೆ ಪೈವಳಿಕೆ ನಗರ ಇಲ್ಲಿನ ಹಳೆ ವಿದ್ಯಾರ್ಥಿ. ಕಾಯರ್‍ಕಟ್ಟೆ ಸಮೀಪದ ನಾಯರ್ಪಳ್ಳ ಗೋಪಾಲಕೃಷ್ಣ ಭಟ್‍ಹಾಗೂ ಮಾಲತಿ ಭಟ್ ದಂಪತಿಗಳ ಪುತ್ರಿ.
    ದ್ವಿತೀಯ ಸ್ಥಾನವನ್ನು ಪಡೆದ ಫಾತಿಮತ್ ಫರ್ಸೀನ ಇವರು ಕಾಸರಗೋಡು ಸರಕಾರಿ ಕಾಲೇಜಿನ ವಿದ್ಯಾರ್ಥಿ. ಪೆರ್ಲ ಬಳಿಯ ವರ್ಮುಡಿ ಶಾಹುಲ್ ಹಮೀದ್ ಮತ್ತು ಸೊಹರಾ ದಂಪತಿಗಳ ಪುತ್ರಿ. ಶ್ರೀ ಸತ್ಯನಾರಾಯಣ ಹೈಸ್ಕೂಲ್ ಪೆರ್ಲ, ಶ್ರೀ ಸುಬ್ರಹ್ಮಣ್ಯೇಶ್ವರ ಹಿರಿಯ ಪ್ರೌಢ ಶಲೆ ಕಾಟುಕುಕ್ಕೆ ಇಲ್ಲಿನ ಹಳೆ ವಿದ್ಯಾರ್ಥಿ. ಓದು ಬರಹ ಹಾಗೂ ಕರಕುಶಲ ವಸ್ತು ತಯಾರಿಯಲ್ಲಿ ಆಸಕ್ತಿಯಿರುವ ಇವರು ಮುಂದೆ ಬಿ.ಇಡಿ ಮಾಡುವ ಉದ್ದೇಶ ಹೊಂದಿದ್ದಾರೆ.
    ತೃತೀಯ ಸ್ಥಾನವನ್ನು ಪಡೆದ ಗೋವಿಂದ ಪೈ ಸ್ಮಾರಕ ಸರಕಾರಿ ಕಾಲೇಜಿನ ವಿದ್ಯಾರ್ಥಿನಿ ಅನುಶ್ರೀ ಯವರು ಮಂಗಲ್ಪಾಡಿ ಪ್ರತಾಪ್ ನಗರ್ ಇಲ್ಲಿನ ವಿಷ್ಣು ಭಟ್ ಮತ್ತು ಶ್ರೀದೇವಿ ದಂಪತಿಗಳ ಪುತ್ರಿ ಹಾಗೂ ವಿಶ್ವನಾಥ ಎ.ಬಿ. ಅವರ ಪತ್ನಿ. ಯಕ್ಷಗಾನ ಕಲಾವಿದೆಯಾಗಿರುವ ಇವರು ಕಣ್ಣೂರು ವಿ.ವಿ. ಕಲೋತ್ಸವ ಸ್ಪರ್ಧೆಯಲ್ಲಿ ಸತತ ಎರಡು ವರ್ಷ ಬಹುಮಾನ ಪಡೆದಿದ್ದಾರೆ. ಎನ್ನೆಸ್ಸೆಸ್ ಸ್ವಯಂ ಸೇವಕಿಯಾಗಿದ್ದು, ಗಿಳಿವಿಂಡು ವೇದಿಕೆಯ ಅಧ್ಯಕ್ಷರಾಗಿ ದುಡಿದಿದ್ದರು. ಸಾಹಿತ್ಯ ರಚನೆ ಮತ್ತು ಕ್ರೀಡೆಯಲ್ಲಿ ಆಸಕ್ತರಾಗಿರುವ ಇವರು ಐಲ ಶ್ರೀ ಶಾರದಾ ಬೋವಿ ಅನುದಾನಿತ ಯು.ಪಿ. ಶಾಲೆ, ಜಿ.ಎಚ್.ಎಸ್.ಎಸ್. ಬೇಕೂರು, ಜಿ.ಎಚ್.ಎಸ್.ಎಸ್. ಪೈವಳಿಕೆ ನಗರ ಈ ವಿದ್ಯಾಸಂಸ್ಥೆಗಳ ಹಳೆ ವಿದ್ಯಾರ್ಥಿ. ಸಿರಿಚಂದನ ಕನ್ನಡ ಯುವ ಬಳಗ ಕಾಸರಗೋಡು ಇದರ ಸಕ್ರಿಯ ಕಾರ್ಯಕರ್ತೆಯಾಗಿದ್ದಾರೆ. ಮುಂದೆ ಇವರು ಬಿಇಡಿ ಅಥವಾ ಎಂ.ಎ. ಅಧ್ಯಯನ ಮಾಡುವ ಇರಾದೆ ವ್ಯಕ್ತಪಡಿಸಿದ್ದಾರೆ.