ಮತ ಎಣಿಕೆಗೆ ಕೆಲವೇ ದಿನಬಾಕಿ: ಚುರುಕುಗೊಂಡ ಸಿದ್ಧತೆ

       ಕಾಸರಗೋಡು: ಲೋಕಸಭಾ ಚುನಾವಣೆ ನಡೆದು, ಮತ ಎಣಿಕೆಗೆ ಕೆಲವೇ ದಿನಗಳು ಬಾಕಿಯಿದ್ದು, ಈ ಸಂಬಂಧ ಸಿದ್ಧತೆ ಚುರುಕಿನಿಂದ ನಡೆಯುತ್ತಿದೆ. 
       ಮತ ಎಣಿಕೆ ಕೇಂದ್ರವಾಗಿರುವ ಪಡನ್ನಕ್ಕಾಡ್ ನೆಹರೂ ಕಲಾ-ವಿ ಜ್ಞಾ ನ ಕಾಲೇಜಿನಲ್ಲಿ ಮತ ಎಣಿಕೆಯ ದಿನ 250 ಸಿಬ್ಬಂದಿಯನ್ನು ನೇಮಿಸಲಾಗುವುದು ಎಂದು ಜಿಲ್ಲಾ ಚುನಾವಣೆ ಅಧಿಕಾರಿಯೂ ಆಗಿರುವ ಜಿಲ್ಲಾಧಿಕಾರಿ ಡಾ.ಡಿ.ಸಜಿತ್ ಬಾಬು ತಿಳಿಸಿರುವರು. 
      ಕರ್ತವ್ಯದಲ್ಲಿರುವ ಸಿಬ್ಬಂದಿಗಾಗಿ ಸಮಗ್ರ ತರಬೇತಿ ಮೇ 17ರಂದು ಜಿಲ್ಲಾಧಿಕಾರಿ ಕಚೇರಿಯಲ್ಲಿ ನಡೆಯಲಿದೆ. ಕಾಸರಗೋಡು ಲೋಕಸಭೆ ಕ್ಷೇತ್ರದಲ್ಲಿ ಅಳವಡಗೊಳ್ಳುವ 7 ವಿಧಾನಸಭೆ ಕ್ಷೇತ್ರಗಳ ಮತ ಎಣಿಕೆ ಪಡನ್ನಕ್ಕಾಡ್ ನೆಹರೂ ಕಾಲೇಜಿನಲ್ಲಿ ಜರುಗುವುದು. ಇದಕ್ಕಾಗಿ ಪ್ರತಿ ವಿಧಾನಸಭೆಕ್ಷೇತ್ರದ ಮತಗಣನೆಗೆ ತಲಾ 14 ಮೇಜುಗಳನ್ನು ಇರಿಸಲಾಗುವುದು.
       ಏಕಕಾಲಕ್ಕೆ ಪ್ರತಿ ವಿಧಾನಸಭೆ ಕ್ಷೇತ್ರದ ಮತಗಟ್ಟೆ ಹಿನ್ನೆಲೆಯಲ್ಲಿ ಮತ ಎಣಿಕೆ ನಡೆಯಲಿದೆ. ನಂತರ ಪ್ರತಿ ಮತಗಟ್ಟೆಯ ಫಲಿತಾಂಶ 17 ಸಿ ಫಾರಂನಲ್ಲಿ ಮಾಹಿತಿ ರೂಪದಲ್ಲಿ ಕೌಂಟಿಂಗ್ ಏಜೆಂಟರ ಸಮಕ್ಷದಲ್ಲಿ ಮತಗಣನೆ ಸಿಬ್ಬಂದಿ ಹೋಲಿಸಿ ನೋಡುವರು. ಆಯಾ ಪೋಲಿಂಗ್ ಸ್ಟೇಷನ್ ಕುರಿತು ಚುನಾವಣೆ ಅಧಿಕಾರಿ ನೀಡಿರುವ ಮಾಹಿತಿಗಳು 17 ಸಿ ಫಾರಂನ ಮೊದಲ ಭಾಗದಲ್ಲಿ ಇರುವುದು. ಪೋಲಿಂಗ್ ಸ್ಟೇಷನ್ ನ ಹೆಸರು, ನಂಬ್ರ, ಬಳಸಿದ ಮೆಷಿನ್ ಗಳು, ಒಟ್ಟು ಮತದಾರರು, ಮತಯಂತ್ರದಲ್ಲಿ ದಾಖಲಾದ ಮತಗಳು, ಪೋಲಿಂಗ್ ಸ್ಟೇಷನ್ ನಲ್ಲಿ ಬಳಸಲಾದ ಟೆಂಡರ್ಡ್ ಬ್ಯಾಲೆಟ್ ಪೇಪರ್ ಗಳು, ಟೆಸ್ಟ್ ವೋಟುಗಳ ಸಂಖ್ಯೆ ಇತ್ಯಾದಿ ಮೂಲಭೂತ ಮಾಹಿತಿಗಳು 17 ಸಿ ಫಾರಂನ ಮೊದಲ ಭಾಗದಲ್ಲಿರುವುದು. ಎರಡನೇ ಬಾಗದಲ್ಲಿ ಮತ ಗಣನೆ ಕೇಂದ್ರದ ಕೌಂಟಿಂಗ್ ಸೂಪರ್ ವೈಸರ್ ನೋಟ್ಟ ಸಹಿತ ಪ್ರತಿ ಅಭ್ಯರ್ಥಿಗೆ ಲಭಿಸಿದ ಒಟ್ಟು ಮತಗಳನ್ನು ದಾಖಲಿಸುವರು. ಈ ಫಲಿತಾಂಶಕ್ಕೆ ಕೌಂಟಿಂಗ್ ಏಜೆಂಟರ ಸಮಕ್ಷದಲ್ಲಿ ಕೌಂಟಿಂಗ್ ಸೂಪರ್ ವೈಸರ್ ಸಹಿ ಮಾಡಲಿದ್ದಾರೆ. ನಂತರ ಪ್ರತಿ ಮತಗಟ್ಟೆಯ ಫಲಿತಾಂಶ ಗಣನೆ ಮಾಡಿ ಆಯಾ ಸಮಯದಲ್ಲಿ ಸ್ಕ್ರೀನ್ ನಲ್ಲಿ ಪ್ರಕಟಿಸಲಾಗುವುದು. ಮತಗಣನೆ ಕೇಂದ್ರದಲ್ಲಿ ಉಪಚುನಾವಣೆ ಅಧಿಕಾರಿ, ನಿರೀಕ್ಷಕರು, ಮೈಕ್ರೋ ನಿರೀಕ್ಷಕರು, ಸುರಕ್ಷೆ ಹೊಣೆಯ ಹಿರಿಯ ಅಧಿಕಾರಿಗಳು ನೇತೃತ್ವ ವಹಿಸುವರು.