ಗಾಳಿಯ ರಭಸಕ್ಕೆ ಹಾರಿಹೋದ ಮನೆಯ ಮಾಡು

       ಬದಿಯಡ್ಕ: ವಿಪರೀತ ಗಾಳಿ ಮಳೆಯಿಂದ ಬದಿಯಡ್ಕ ಸಮೀಪದ ಮೂಕಂಪಾರೆ ಆನಂದ ಎಂಬವರ ಮನೆಯ ಮಾಡು ಹಾರಿಹೋದ ಘಟನೆ ನಡೆದಿದೆ. ಗುರುವಾರ ಮಧ್ಯಾಹ್ನ 1.30ರ ವೇಳೆ ಬೀಸಿದ ಗಾಳಿಗೆ ಮಾಡಿಗೆ ಹೊದೆಸಿದ ಸಿಮೆಂಟ್ ಶೀಟ್ ಹಾರಿ ಮನೆಯ ಮತ್ತೊಂದು ಭಾಗಕ್ಕೆ ಬಿದ್ದಿದೆ. ಈ ವೇಳೆ ಮನೆಯಲ್ಲಿ ಯಾರೂ ಇರಲಿಲ್ಲ. ಆನಂದ ಅವರು ಪತ್ನಿ ಹಾಗೂ ಇಬ್ಬರು ಮಕ್ಕಳೊಂದಿಗೆ ದೇವಸ್ಥಾನಕ್ಕೆ ತೆರಳಿದ್ದರು. ಕೇವಲ 4 ಸೆಂಟ್ಸ್ ಸ್ಥಳ ಹೊಂದಿರುವ ಅವರು ಕೂಲಿಕಾರ್ಮಿಕರಾಗಿದ್ದಾರೆ. ಸುಮಾರು 50,000 ರೂಪಾಯಿ ನಷ್ಟ ಅಂದಾಜಿಸಲಾಗಿದೆ. ಕಳೆದ ವಾರ ಈ ಮನೆಯ ಸಮೀಪದ ಇನ್ನೊಂದು ಮನೆಯ ಮಾಡು ಇದೇ ರೀತಿ ಹಾನಿಗೊಂಡಿತ್ತು.