ತುಳು ಮಾತೃ ಭಾಷೆ `ಸಂಪೂರ್ಣ'ದಲ್ಲಿ ಸೇರಿಸಲು ಅವಕಾಶ

      ಮಂಜೇಶ್ವರ: ಕೇರಳದ ಶಾಲೆಗಳಲ್ಲಿ ಕಲಿಯುತ್ತಿರುವ ಎಲ್ಲಾ ಮಕ್ಕಳ ವಿವರಗಳನ್ನು `ಸಂಪೂರ್ಣ'ಎಂಬ ವೆಬ್‍ಸೈಟ್ ಮೂಲಕ ದಾಖಲೀಕರಣ ಮಾಡುವ ನೂತನ ವ್ಯವಸ್ಥೆ ಜಾರಿಯಲ್ಲಿದೆ. ಈ ವ್ಯವಸ್ಥೆಯಲ್ಲಿ ತುಳು ಮಾತೃ ಭಾಷೆಯ ಮಕ್ಕಳಿಗೆ ಮಾತೃ ಭಾಷೆ ತುಳು ಎಂದು ಸೇರಿಸುವ ಅವಕಾಶ ಇರಲಿಲ್ಲ. ಇದರಿಂದ ತುಳು ಮಾತೃಭಾಷೆಯ ಮಕ್ಕಳಿಗೆ ಉನ್ನತ ಶಿಕ್ಷಣದಲ್ಲಿಯೂ ಔದ್ಯೋಗಿಕ ರಂಗದಲ್ಲಿಯೂ ಹಲವಾರು ಅವಕಾಶಗಳು ನಷ್ಟವಾಗುವ ಭೀತಿಯಿತ್ತು. ಈ ತೊಂದರೆಯನ್ನು ಶಾಲಾ ಅಧ್ಯಾಪಕರು ತುಳು ಅಕಾಡೆಮಿಯ ಅಧ್ಯಕ್ಷರಿಗೆ ಮನವಿ ಮಾಡಿದ್ದರು. ಕೇರಳ ತುಳು ಅಕಾಡೆಮಿಯ ವತಿಯಿಂದ ಈ ಕುರಿತಾದ ಮನವಿಯನ್ನು ರಾಜ್ಯ ಸರ್ಕಾರಕ್ಕೂ, ಜಿಲ್ಲಾಧಿಕಾರಿಗಳಿಗೂ, ರಾಜ್ಯದ ಹಾಗೂ ಜಿಲ್ಲಾ  ಅಧಿಕಾರಿಗಳಿಗೂ ಸಲ್ಲಿಸಲಾಗಿತ್ತು.

     ಇದೀಗ `ಸಂಪೂರ್ಣ' ಎಂಬ ಸಾಫ್ಟ್‍ವೇರ್‍ನಲ್ಲಿ ತುಳು ಮಾತೃ ಭಾಷೆಯನ್ನು ಸೇರಿಸುವ ಅವಕಾಶ ಮಾಡಿಕೊಡಲಾಗಿದೆ. ಈ ವ್ಯವಸ್ಥೆಯನ್ನು ಮಾಡಿಕೊಟ್ಟ ಕೇರಳ ಸರ್ಕಾರಕ್ಕೂ, ರಾಜ್ಯ ಕೈಟ್ ಅಧಿಕಾರಿಗಳಿಗೂ, ಕೇರಳ ತುಳು ಅಕಾಡೆಮಿಯ ಅಧ್ಯಕ್ಷ ಉಮೇಶ್ ಎಂ.ಸಾಲಿಯಾನ್ ಹಾಗೂ ಎಲ್ಲಾ ಪದಾಧಿಕಾರಿಗಳಿಗೂ, ಇದಕ್ಕೆ ಸಹಕಾರ ನೀಡಿದ ಕಾಸರಗೋಡು ಜಿಲ್ಲಾ ಕೈಟ್ ಕೋರ್ಡಿನೇಟರ್ ಹಾಗೂ ಮಾಸ್ಟರ್ ಟ್ರೈನರ್ ಅಬ್ದುಲ್ ಜಮಾಲ್ ಅವರಿಗೂ ಶಾಲಾ ಮುಖ್ಯೋಪಾಧ್ಯಾಯರು ಅಧ್ಯಾಪಕರು ಹಾಗೂ ರಕ್ಷಕರು ಅಭಿನಂದನೆಗಳನ್ನು ಸಲ್ಲಿಸಿದ್ದಾರೆ. ಈ ಅವಕಾಶವನ್ನು ಶಾಲಾ ಅಧಿಕೃತರು ಸದುಪಯೋಗ ಮಾಡಬೇಕಾಗಿ ವಿನಂತಿಸಲಾಗಿದೆ.