ಮೀಯಪದವಿನಲ್ಲಿ ಮೇಳೈಸಿದ ಧರ್ಮಸ್ಥಳ ಕ್ಷೇತ್ರ ಮಹಾತ್ಮೆ- ಹರಿದು ಬಂದ ಜನಸಾಗರ

       ಮಂಜೇಶ್ವರ: ಶ್ರೀ ಧರ್ಮಸ್ಥಳ ಮಂಜುನಾಥೇಶ್ವರ ಕೃಪಾಪೋಷಿತ ಯಕ್ಷಗಾನ ಮಂಡಳಿಯವರಿಂದ ಶುಕ್ರವಾರ ರಾತ್ರಿ ಮೀಯಪದವು ಶಾಲಾ ಮೈದಾನದಲ್ಲಿ ಯಕ್ಷಗಾನ ಬಯಲಾಟ ಶ್ರೀ ಧರ್ಮಸ್ಥಳ ಕ್ಷೇತ್ರ ಮಹಾತ್ಮೆ ಪ್ರದರ್ಶನಗೊಂಡಿತು.  ಸುಮಾರು ಎರಡೂವರೆ ಸಾವಿರಕ್ಕೂ ಅಧಿಕ ಪ್ರೇಕ್ಷಕರು ಯಕ್ಷಗಾನ ಕಣ್ತುಂಬಿಕೊಂಡರು.

       ಐತಿಹಾಸಿಕವಾಗಿ ಮೂಡಿಬಂದ ಯಕ್ಷಗಾನ ಸದಬಿರುಚಿಯ ಕಾಲಮಿತಿ ಯಕ್ಷಗಾನಕ್ಕೂ ಜನ ಬೆಂಬಲ ಹೇಗಿದೆ ಎನ್ನುವುದಕ್ಕೆ ಸಾಕ್ಷಿಯಾಯಿತು. ಶ್ರೀ ಕ್ಷೇತ್ರ ಧರ್ಮಸ್ಥಳ ಗ್ರಾಮಾಭಿವೃದ್ಧಿ ಯೋಜನೆ ಪ್ರಗತಿ ಬಂಧು ಸ್ವಸಹಾಯ ಸಂಘಗಳ ಮೀಂಜ ಒಕ್ಕೂಟ-ಪೈವಳಿಕೆ ವಲಯ, ಅಖಿಲ ಕರ್ನಾಟಕ ಜನಜಾಗೃತಿ ವೇದಿಕೆ ಪೈವಳಿಕೆ ವಲಯ, ನವಜೀವನ ಸಮಿತಿ ಕಾಸರಗೋಡು ಜಿಲ್ಲೆ ಇವರ ಸೇವಾರೂಪವಾಗಿ ಊರ ಹತ್ತು ಸಮಸ್ತರ ಸಹಾಯ ಸಹಕಾರದೊಂದಿಗೆ ಸೇವಾ ಬಯಲಾಟ ಆಯೋಜಿಸಲಾಗಿತ್ತು. 
      ಯಕ್ಷಗಾನ ಪ್ರದರ್ಶನದ ಅಂಗವಾಗಿ ಚಿಗುರುಪಾದೆ ಶ್ರೀ ಮಹಾಲಿಂಗೇಶ್ವರ ದೇವಸ್ಥಾನದಿಂದ ಮೀಯಪದವು ಮೈದಾನದವರೆಗೆ  ವಿವಿಧ ಕುಣಿತ ಭಜನಾ ಸಂಘಗಳ ಪಾಲ್ಗೊಳ್ಳುವಿಕೆಯಲ್ಲಿ ಮೇಳದ ಗಣಪತಿ ದೇವರ ಶೋಭಾಯಾತ್ರೆ ನಡೆಸಲಾಗಿತ್ತು.