ಬಿಜೆಪಿ ರಾಜ್ಯ ಸಮಿತಿಯ ಆಂತರಿಕ ಭಿನ್ನಮತ-ದೆಹಲಿಗೆ ದೌಡಾಯಿಸಿದ ಕೆ ಸುರೇಂದ್ರನ್-ಆರೋಪಗಳನ್ನು ನಿರಾಕರಿಸಿದ ರಾಜ್ಯಾಧ್ಯಕ್ಷ

                      

        ನವದೆಹಲಿ: ರಾಜ್ಯ ಬಿಜೆಪಿಯಲ್ಲಿ ಹುಟ್ಟಿಕೊಂಡಿರುವ ಭಿನ್ನಮತ ಮುಂದುವರಿಯುತ್ತಿರುವಂತೆ ಕೇಂದ್ರ ಅಧ್ಯಕ್ಷರನ್ನು ಭೇಟಿ ಮಾಡಲು ರಾಜ್ಯ ಅಧ್ಯಕ್ಷ ಕೆ.ಸುರೇಂದ್ರನ್ ದೆಹಲಿಗೆ ತೆರಳಿದ್ದಾರೆ.  ರಾಜ್ಯ ನಾಯಕತ್ವದಲ್ಲಿ ನಡೆಯುತ್ತಿರುವ ವಿವಾದಗಳ ಮಧ್ಯೆ ಸುರೇಂದ್ರನ್ ದೆಹಲಿಗೆ ತೆರಳಿರುವುದು ಕುತೂಹಲಕ್ಕೆ ಕಾರಣವಾಗಿದೆ. 

        ಕೇಂದ್ರ ಬಿಜೆಪಿ ನಾಯಕಿ ಶೋಭಾ ಸುರೇಂದ್ರನ್ ಅವರು ರಾಜ್ಯ ಬಿಜೆಪಿ ಅಧ್ಯಕ್ಷ ಕೆ.ಸುರೇಂದ್ರನ್ ವಿರುದ್ಧ ಎರಡು ಬಾರಿ ಕೇಂದ್ರ ನಾಯಕತ್ವಕ್ಕೆ ಪತ್ರ ಬರೆದಿದ್ದರು. ಈ ಹಿನ್ನೆಲೆಯಲ್ಲಿ ಅವರನ್ನು ದೆಹಲಿಗೆ ಕರೆಸಲಾಗಿದೆ ಎಂಬ ಆರೋಪವನ್ನು ಸುರೇಂದ್ರನ್ ನಿರಾಕರಿಸಿದ್ದಾರೆ. ನಾಯಕತ್ವ ತನ್ನನ್ನು ಕರೆದಿಲ್ಲ ಮತ್ತು ಸ್ಥಳೀಯ ಚುನಾವಣೆ ಸೇರಿದಂತೆ ವಿಷಯಗಳ ಬಗ್ಗೆ ಚರ್ಚಿಸಲು ಬಂದಿದ್ದೇನೆ ಎಂದು ಅವರು ಹೇಳಿದರು.

         ಮಾಜಿ ಉಪಾಧ್ಯಕ್ಷ ಮತ್ತು ರಾಷ್ಟ್ರೀಯ ಕಾರ್ಯಕಾರಿ ಸಮಿತಿ ಸದಸ್ಯ ಪಿ.ಎಂ.ವೇಲಾಯುಧನ್, ಕೆ.ಪಿ.ಶ್ರೀಧರನ್ ಸೇರಿದಂತೆ ಹಿರಿಯ ನಾಯಕರು ರಾಜ್ಯ ನಾಯಕತ್ವದ ವಿರುದ್ಧ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಪಕ್ಷದ ಮರುಸಂಘಟನೆಯಲ್ಲಿ ಜಿಲ್ಲೆಗಳಲ್ಲೂ ಹೆಚ್ಚಿನ ಸಂಖ್ಯೆಯ ಭಿನ್ನಮತೀಯರಿದ್ದಾರೆ ಎಂದು ವರದಿಯಾಗಿದೆ. ಕೆ ಸುರೇಂದ್ರನ್ ವಿರುದ್ಧ ಇಪ್ಪತ್ನಾಲ್ಕು ರಾಜ್ಯ ನಾಯಕರು ಕೇಂದ್ರ ನಾಯಕತ್ವಕ್ಕೆ ದೂರು ನೀಡಿದ್ದರು. ನಾಯಕರು ಬಿಜೆಪಿ ರಾಷ್ಟ್ರೀಯ ಕಾರ್ಯಕಾರಿ ಸಮಿತಿ ಸದಸ್ಯೆ ಶೋಭಾ ಸುರೇಂದ್ರನ್ ಅವರನ್ನು ಬೆಂಬಲಿಸಿರುವರು.

      ಸುರೇಂದ್ರನ್ ಅಧ್ಯಕ್ಷ ಸ್ಥಾನವನ್ನು ವಹಿಸಿಕೊಂಡ ಬಳಿಕ 24 ಮುಖಂಡರು ಕೇಂದ್ರ ಗೃಹ ಸಚಿವ ಅಮಿತ್ ಷಾ ಮತ್ತು ಪಕ್ಷದ ರಾಷ್ಟ್ರೀಯ ಅಧ್ಯಕ್ಷ ಜೆ.ಪಿ.ನಡ್ಡಾ ಅವರಿಗೆ ಪತ್ರ ಬರೆದಿದ್ದು, ಪಕ್ಷದಲ್ಲಿ ಗುಂಪುಗಾರಿಕೆ ತೀವ್ರಗೊಂಡು ಕೇವಲ ಒಂದು ವಿಭಾಗದ ನಾಯಕರು ಪಕ್ಷದಲ್ಲಿ ಹಿಡಿತ ಸಾಧಿಸಲು ಸಂಚು ರೂಪಿಸುತ್ತಿದೆ ಎಂದು ಆರೋಪಿಸಲಾಗಿದೆ.  ಬಿಜೆಪಿ ಆಂತರಿಕ ತಿಕ್ಕಾಟ ಕೊನೆಗೊಳಿಸಲು ಆರ್.ಎಸ್.ಎಸ್. ಪ್ರಯತ್ನ ಪ್ರಾರಂಭಿಸಿತ್ತು. ಪಕ್ಷದ ಶಿಸ್ತನ್ನು ಉಲ್ಲಂಘಿಸುವ ಪ್ರವೃತ್ತಿಯನ್ನು ಒಪ್ಪುವುದಿಲ್ಲ ಎಂದು ಆರ್‍ಎಸ್‍ಎಸ್ ಸ್ಪಷ್ಟಪಡಿಸಿದೆ.