ಕೋಲ್ಕತ್ತದಲ್ಲಿ ಮಕ್ಕಳಿಗಾಗಿ ದೋಣಿ ಗ್ರಂಥಾಲಯ ಪ್ರಾರಂಭ

         ಕೋಲ್ಕತ್ತ: ಪಶ್ಚಿಮ ಬಂಗಾಳದ ಕೋಲ್ಕತ್ತದಲ್ಲಿ ಮೊದಲ ಬಾರಿ ದೋಣಿಯಲ್ಲಿ ಮಕ್ಕಳ ಗ್ರಂಥಾಲಯವನ್ನು ಪ್ರಾರಂಭಿಸಲಾಗಿದೆ.

        ಪಶ್ಚಿಮ ಬಂಗಾಳ ಸಾರಿಗೆ ನಿಗಮವು ಸ್ಥಳೀಯ ಪಾರಂಪರಿಕ ಪುಸ್ತಕದ ಅಂಗಡಿಯ ಸಹಯೋಗದೊಂದಿಗೆ ಈ ಗ್ರಂಥಾಲಯವನ್ನು ಪ್ರಾರಂಭಿಸಿದೆ ಎಂದು ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

'ಹೂಗ್ಲಿ ನದಿಯಲ್ಲಿ ದೋಣಿಯ ಮೂಲಕ ಪ್ರಯಣಿಸುತ್ತಾ ಕೋಲ್ಕತ್ತದ ಸೌಂದರ್ಯವನ್ನು ವೀಕ್ಷಿಸುವುದರ ಜತೆಗೆ ಪುಸ್ತಕವನ್ನು ಓದಬಹುದು ಎಂಬ ಕಾರಣಕ್ಕಾಗಿ ಈ ಗ್ರಂಥಾಲಯವನ್ನು ತೆರೆಯಲಾಗಿದೆ' ಎಂದು ಅವರು ಹೇಳಿದರು.

         'ಈ ಗ್ರಂಥಾಲಯಕ್ಕೆ 'ಯಂಗ್‌ ರೀಡರ್ಸ್‌ ಬೋಟ್‌ ಲೈಬ್ರರಿ' ಎಂದು ಹೆಸರಿಡಲಾಗಿದೆ. ಇಲ್ಲಿ ಮಕ್ಕಳಿಗಾಗಿ ಇಂಗ್ಲಿಷ್‌ ಮತ್ತು ಬಂಗಾಳಿ ಭಾಷೆಯ 500 ಪುಸ್ತಕಗಳನ್ನು ಇಡಲಾಗಿದೆ. ಈ ದೋಣಿ ಗ್ರಂಥಾಲಯವು ಜನರಿಗೆ ಮೂರು ಗಂಟೆಗಳ ಕಾಲ ಪ್ರವಾಸವನ್ನೂ ಕೈಗೊಳ್ಳಬಹುದು' ಎಂದು ಅವರು ಮಾಹಿತಿ ನೀಡಿದರು.

'ಮಿಲೇನಿಯಂ ಪಾರ್ಕ್‌ನಿಂದ ಆರಂಭಗೊಂಡ ಪಯಣವು ಬೇಲೂರು ಮಠ ಜೆಟ್ಟಿವರೆಗೆ ಹೋಗಿ, ಅಲ್ಲಿಂದ ಹಿಂದಕ್ಕೆ ಮರಳಲಿದೆ. ವಾರಾಂತ್ಯದಲ್ಲಿ ಮೂರು ಬಾರಿ ಈ ಗ್ರಂಥಾಲಯವು ಚಲಿಸಲಿದೆ. ಇಲ್ಲಿ ಉಚಿತ ವೈಫೈ ಸೌಲಭ್ಯ ಕಲ್ಪಿಸಲಾಗಿದೆ. ಬೋಟ್‌ನಲ್ಲಿ ಪ್ರಯಾಣಿಸುವ ವಯಸ್ಕರಿಗೆ ₹100 ಮತ್ತು ಮಕ್ಕಳಿಗೆ ₹50 ಶುಲ್ಕ ನಿಗದಿಪಡಿಸಲಾಗಿದೆ. ಅಲ್ಲದೆ ಗ್ರಂಥಾಲಯದಲ್ಲಿ ಕಥೆ ಹೇಳುವುದು, ಕವನ ವಾಚನ, ಪುಸ್ತಕ ಬಿಡುಗಡೆ ಮತ್ತು ಸಂಗೀತ ಸೇರಿದಂತೆ ವಿವಿಧ ಕಾರ್ಯಕ್ರಮಗಳೂ ನಡೆಯಲಿವೆ' ಎಂದು ಅವರು ತಿಳಿಸಿದರು.