ಹತ್ತಿಯ ಬದಲಿಗೆ ಬಳಸಿದ ಮಾಸ್ಕ್​ಗಳನ್ನು ತುಂಬುತ್ತಿದ್ದ ಮ್ಯಾಟ್ರೆಸ್​​ ಫ್ಯಾಕ್ಟರಿ !

          ಮುಂಬೈ: ಮಹಾರಾಷ್ಟ್ರದಲ್ಲಿ ಮ್ಯಾಟ್ರೆಸ್​​(ಹಾಸಿಗೆ) ತಯಾರಿಸುವ ಕಾರ್ಖಾನೆಯೊಂದು ತನ್ನ ಉತ್ಪನ್ನಗಳಿಗೆ ಸ್ಟಫ್​ ಮಾಡಲು ಹತ್ತಿ ಅಥವಾ ಇತರ ಕಚ್ಚಾವಸ್ತುಗಳ ಬದಲಿಗೆ ಉಪಯೋಗಿಸಿ ಎಸೆದಿರುವ ಮಾಸ್ಕ್​ಗಳನ್ನು ಬಳಸುತ್ತಿದ್ದುದು ಪೊಲೀಸರ ಗಮನಕ್ಕೆ ಬಂದಿದೆ. ಘಟಕದ ಮಾಲೀಕರ ವಿರುದ್ಧ ಪ್ರಕರಣ ದಾಖಲಿಸಿರುವ ಪೊಲೀಸರು, ಕಾರ್ಖಾನೆಯ ಆವರಣದಲ್ಲಿ ಕಂಡುಬಂದ ಮಾಸ್ಕ್​ಗಳ ರಾಶಿಯನ್ನು ಬೆಂಕಿಹಚ್ಚಿ ನಾಶಪಡಿಸಿದ್ದಾರೆ.

       'ಜಲಗಾವ್​​ನ ಮಹಾರಾಷ್ಟ್ರ ಇಂಡಸ್ಟ್ರಿಯಲ್ ಡೆವಲಪ್​ಮೆಂಟ್​ ಕಾರ್ಪೆರೇಷನ್​(ಎಂಐಡಿಸಿ) ಪೊಲೀಸ್ ಠಾಣೆಗೆ ಮಹಾರಾಷ್ಟ್ರ ಮ್ಯಾಟ್ರೆಸ್​ ಸೆಂಟರ್​​ ಎಂಬಲ್ಲಿ ಬಳಸಿದ ಮಾಸ್ಕ್​ಗಳನ್ನು ಹಾಸಿಗೆ ತಯಾರಿಸಲು ಬಳಸಲಾಗುತ್ತಿದೆ ಎಂಬ ಮಾಹಿತಿ ಬಂತು. ಅಧಿಕಾರಿಗಳು ಕುಸುಂಬಾ ಗ್ರಾಮದಲ್ಲಿರುವ ಕಾರ್ಖಾನೆಯ ಆವರಣಕ್ಕೆ ಭೇಟಿ ನೀಡಿದಾಗ, ಬಳಸಿದ ಮಾಸ್ಕ್​​ಗಳನ್ನು ಹಾಸಿಗೆಯೊಂದಕ್ಕೆ ತುಂಬುತ್ತಿರುವುದನ್ನು ಕಂಡರು' ಎಂದು ಹೆಚ್ಚುವರಿ ಪೊಲೀಸ್ ವರಿಷ್ಠಾಧಿಕಾರಿ ಚಂದ್ರಕಾಂತ್ ಗವಾಲಿ ಹೇಳಿದ್ದಾರೆ.

          ಕಾರ್ಖಾನೆಯ ಮಾಲೀಕ ಅಮ್ಜದ್ ಅಹ್ಮದ್ ಮನ್ಸೂರಿ ಎಂಬುವರ ವಿರುದ್ಧ ಪ್ರಕರಣ ದಾಖಲಿಸಲಾಗಿದೆ. ಈ ದಂಧೆಯಲ್ಲಿ ಇನ್ನೂ ಎಷ್ಟು ಜನ ಭಾಗಿಯಾಗಿದ್ದಾರೆ ಎಂಬ ಬಗ್ಗೆ ಪೊಲೀಸರು ತನಿಖೆ ನಡೆಸುತ್ತಿದ್ದಾರೆ. ಘಟಕದ ಆವರಣದಲ್ಲಿ ರಾಶಿ ರಾಶಿ ಬಿದ್ದಿದ್ದ ಬಳಸಿದ ಮಾಸ್ಕ್​​ಗಳನ್ನು ನಿಯಮಾನುಸಾರ ಬೆಂಕಿಹಚ್ಚಿ ನಾಶ ಮಾಡಲಾಗಿದೆ ಎಂದು ಗವಾಲಿ ತಿಳಿಸಿದ್ದಾರೆ.

ತ್ಯಾಜ್ಯ ಸಮಸ್ಯೆ : ಕರೊನಾ ಹಿನ್ನೆಲೆಯಲ್ಲಿ ಮಾಸ್ಕ್​ ಉತ್ಪಾದನೆ ಹೆಚ್ಚಿರುವಂತೆಯೇ ಬಳಸಿದ ಮಾಸ್ಕ್​ಗಳನ್ನು ವಿಲೇವಾರಿ ಮಾಡುವ ಸಮಸ್ಯೆಯೂ ಹೆಚ್ಚಿದೆ. ಅದಾಗಲೇ ಹೆಚ್ಚು ಒತ್ತಡದಲ್ಲಿರುವ ತ್ಯಾಜ್ಯ ನಿರ್ವಹಣಾ ವ್ಯವಸ್ಥೆಯ ಮೇಲೆ ಈಗ ಟನ್​​ಗಟ್ಟಲೆ ಬಯೋಮೆಡಿಕಲ್ ವೇಸ್ಟ್​​ಅನ್ನು ನಿರ್ವಹಿಸುವ ಹೊರೆ ಬಿದ್ದಿದೆ. 2020ರ ಜೂನ್​ನಿಂದ ಸೆಪ್ಟೆಂಬರ್​ವರೆಗೆ ಗ್ಲೌಸ್​ ಮತ್ತು ಮಾಸ್ಕ್​​ಗಳನ್ನು ಒಳಗೊಂಡ 18,000 ಟನ್ ಕರೊನಾ ಉತ್ತೇಜಿತ ತ್ಯಾಜ್ಯವನ್ನು ಸಂಗ್ರಹಿಸಲಾಯಿತು ಎಂದು ಕೇಂದ್ರೀಯ ಮಾಲಿನ್ಯ ನಿಯಂತ್ರಣ ಮಂಡಳಿಯ ಅಂಕಿಅಂಶಗಳು ತಿಳಿಸಿವೆ.