ಕೆನರಾ ಬ್ಯಾಂಕ್ ಪ್ರಬಂಧಕಿಯ ಆತ್ಮಹತ್ಯೆ ಘಟನೆ: ಸ್ವ ಪ್ರೇರಣೆಯಿಂದ ಪ್ರಕರಣ ದಾಖಲಿಸಿದ ಮಾನವ ಹಕ್ಕುಗಳ ಆಯೋಗ

              ಕಣ್ಣೂರು: ಕಣ್ಣೂರಿನಲ್ಲಿ ಕೆನರಾ ಬ್ಯಾಂಕ್ ಪ್ರಬಂಧಕಿ ಆತ್ಮಹತ್ಯೆ ಪ್ರಕರಣದಲ್ಲಿ ರಾಜ್ಯ ಮಾನವ ಹಕ್ಕುಗಳ ಆಯೋಗ ಪ್ರಕರಣ ದಾಖಲಿಸಿದೆ.  ಕೆನರಾ ಬ್ಯಾಂಕಿನ ಕೂತುಪರಂಬು ತೆಕ್ಕಿಲಂಗಾಡಿ ಶಾಖಾ ಪ್ರಬಂಧಕಿ ಸ್ವಪ್ನಾ ಅವರು ಬ್ಯಾಂಕ್ ಸಂಬಂಧಿತ ಒತ್ತಡದಿಂದಾಗಿ ಆತ್ಮಹತ್ಯೆ ಮಾಡಿಕೊಂಡಿದ್ದಾರೆ ಎಂಬ ಮಾಧ್ಯಮ ವರದಿಗಳ ಆಧಾರದ ಮೇಲೆ ಆಯೋಗ ಸ್ವಯಂಪ್ರೇರಣೆಯಿಂದ ಪ್ರಕರಣ ದಾಖಲಿಸಿದೆ.

                  ಬ್ಯಾಂಕುಗಳ ಒತ್ತಡದ ಪರಿಣಾಮವಾಗಿ ನೌಕರರ ಆತ್ಮಹತ್ಯೆಗಳ ಬಗ್ಗೆ ತನಿಖೆಗೆ ರಾಜ್ಯ ಮಾನವ ಹಕ್ಕುಗಳ ಆಯೋಗ ಆದೇಶಿಸಿದೆ. ಈ ಪ್ರಕರಣವನ್ನು ಆಯೋಗ ಸ್ವಯಂಪ್ರೇರಣೆಯಿಂದ ದಾಖಲಿಸಿದೆ. ಜುಡೀಶಿಯಲ್ ಸದಸ್ಯ ಬೈಜುನಾಥ್ ಆದೇಶ ಈ ಬಗ್ಗೆ ಆದೇಶ ನೀಡಿದ್ದಾರೆ.

               ಕೆನರಾ ಬ್ಯಾಂಕ್ ಕೇರಳ ಸರ್ಕಲ್ ಮುಖ್ಯ ಪ್ರಬಂಧಕರಿಗೆ ನೀಡಿದ ನೋಟೀಸಲ್ಲಿ ಪ್ರಬಂಧಕಿ ಆತ್ಮಹತ್ಯೆ ಮಾಡಿಕೊಂಡ ಕಾರಣಗಳ ಬಗ್ಗೆ ವಿವರವಾದ ತನಿಖೆ ನಡೆಸಿದ ನಂತರ ವರದಿಯನ್ನು ಸಲ್ಲಿಸಬೇಕು. ಕೆನರಾ ಬ್ಯಾಂಕ್ ಪ್ರಾದೇಶಿಕ ವ್ಯವಸ್ಥಾಪಕರು ಸಹ ವರದಿ ಮಾಡಬೇಕು. ರಾಜ್ಯದ ವಿವಿಧ ಬ್ಯಾಂಕುಗಳ ನೌಕರರ ಮೇಲಿನ ಒತ್ತಡವನ್ನು ಪರಿಶೀಲಿಸಿದ ನಂತರ ನಾಲ್ಕು ವಾರಗಳಲ್ಲಿ ವರದಿ ಸಲ್ಲಿಸುವಂತೆ ಆಯೋಗ ರಾಜ್ಯ ಮಟ್ಟದ ಬ್ಯಾಂಕರ್‍ಗಳ ಸಮಿತಿ ಕನ್ವೀನರ್‍ಗೆ ಸೂಚಿಸಿದೆ.

               ಬ್ಯಾಂಕ್ ಗಳು ನೌಕರರ ಮೇಲೆ ಹೇರುವ ಒತ್ತಡದ ವಿರುದ್ಧ ಕಲ್ಪೆಟ್ಟಾದ ವಕೀಲ ಎ. ಜೆ. ಆಂಟನಿ ಕೂಡ ಆಯೋಗಕ್ಕೆ ದೂರು ನೀಡಿದ್ದರು. ನೌಕರರನ್ನು ಭಾರೀ ಪ್ರಮಾಣದಲ್ಲಿ ಕಡಿತಗೊಳಿಸಿದ ಬಳಿಕ ಅಸ್ತಿತ್ವದಲ್ಲಿರುವ ನೌಕರರ ಮೇಲೆ ಒತ್ತಡ ಹೇರುವ ಮೂಲಕ ಬ್ಯಾಂಕುಗಳು ಲಾಭ ಗಳಿಸುತ್ತಿವೆ ಎಂದು ದೂರಿನಲ್ಲಿ ತಿಳಿಸಲಾಗಿದೆ. ಮೂರು ತಿಂಗಳ ಹಿಂದೆ ಗುರುವಾಯೂರಿನಲ್ಲಿ ಮತ್ತು ಎಂಟು ತಿಂಗಳ ಹಿಂದೆ ಪಾಲಕ್ಕಾಡ್‍ನಲ್ಲಿ ಬ್ಯಾಂಕ್ ನೌಕರರು ಆತ್ಮಹತ್ಯೆಗೆ ಶರಣಾಗಿದ್ದರು.