ಬಿಗ್‌ಬಾಸ್ಕೆಟ್‌ ಕಂಪನಿಯನ್ನು ಖರೀದಿಸಿದ ಟಾಟಾ

          ಬೆಂಗಳೂರು: ಆನ್‌ಲೈನ್‌ ಮೂಲಕ ದಿನಸಿ ಹಾಗೂ ತರಕಾರಿಗಳನ್ನು ಮಾರಾಟ ಮಾಡುವ ಬಿಗ್‌ಬಾಸ್ಕೆಟ್ ಕಂಪನಿಯನ್ನು ಟಾಟಾ ಸನ್ಸ್ ಖರೀದಿಸಿದೆ. ಇದರಿಂದಾಗಿ ಭಾರತದ ಅತಿದೊಡ್ಡ ಉದ್ಯಮ ಸಮೂಹಗಳಲ್ಲಿ ಒಂದಾಗಿರುವ ಟಾಟಾ, ಇ-ಕಾಮರ್ಸ್‌ ವಿಭಾಗದಲ್ಲಿ ಅಮೆಜಾನ್, ಫ್ಲಿಪ್‌ಕಾರ್ಟ್‌ ಹಾಗೂ ರಿಲಯನ್ಸ್ ಜೊತೆ ಸ್ಪರ್ಧೆಗೆ ಇಳಿಯಲಿದೆ.

          ಬಿಗ್‌ಬಾಸ್ಕೆಟ್‌ನ ಷೇರುಗಳನ್ನು ಟಾಟಾ ಡಿಜಿಟಲ್ ಲಿಮಿಟೆಡ್ ಕಂಪನಿಯು ಖರೀದಿಸಿದೆ. ಇದು ಟಾಟಾ ಸನ್ಸ್‌ನ ಒಂದು ಅಂಗಸಂಸ್ಥೆ. ಖರೀದಿ ವಿಚಾರವಾಗಿ ಹೆಚ್ಚಿನ ವಿವರ ನೀಡಲು ಟಾಟಾ ನಿರಾಕರಿಸಿದೆ. ಸುದ್ದಿಸಂಸ್ಥೆಗೆ ಬಿಗ್‌ಬಾಸ್ಕೆಟ್‌ ಕಡೆಯಿಂದ ಪ್ರತಿಕ್ರಿಯೆ ಸಿಕ್ಕಿಲ್ಲ.

           ಉಪ್ಪಿನಿಂದ ಆರಂಭಿಸಿ ಐಷಾರಾಮಿ ಕಾರುಗಳು, ಸಾಫ್ಟ್‌ವೇರ್‌ ಉತ್ಪನ್ನಗಳವರೆಗೆ ವಿವಿಧ ಉದ್ಯಮಗಳಲ್ಲಿ ತೊಡಗಿಸಿಕೊಂಡಿರುವ ಟಾಟಾ ಸಮೂಹವು, ಎಲ್ಲ ಬಗೆಯ ಗ್ರಾಹಕ ವ್ಯವಹಾರಗಳನ್ನು ಒಂದೇ ಕಡೆ ತರುವ 'ಸೂಪರ್‌ ಆಯಪ್‌' ಅಭಿವೃದ್ಧಿಗೆ ಚಿಂತನೆ ನಡೆಸಿದೆ ಎಂಬ ವರದಿ ಇದೆ.