ಕೋವಿಡ್‌: 'ಬಲಿ ತರ್ಪಣಂ' ಆಚರಣೆ ಇಲ್ಲ- ಟಿಡಿಬಿ

               ತಿರುವನಂತಪುರ: ಕೋವಿಡ್‌ ಕಾರಣದಿಂದಾಗಿ, ತನ್ನ ಅಧೀನದಲ್ಲಿರುವ ದೇವಸ್ಥಾನಗಳಲ್ಲಿ ಈ ವರ್ಷ 'ಬಲಿ ತರ್ಪಣಂ' ಆಚರಿಸದಿರಲು ಕೇರಳದ ತಿರುವಾಂಕೂರು ದೇವಸ್ವಂ ಮಂಡಳಿ (ಟಿಡಿಬಿ) ನಿರ್ಧರಿಸಿದೆ.

           ಇತ್ತೀಚಿಗೆ ನಡೆದ ಮಂಡಳಿಯ ಉನ್ನತ ಸಭೆಯಲ್ಲಿ ಈ ನಿರ್ಧಾರವನ್ನು ಕೈಗೊಳ್ಳಲಾಗಿದೆ.

ಪ್ರತಿವರ್ಷ ಕೇರಳದ ದೇವಸ್ಥಾನಗಳ ಆವರಣದಲ್ಲಿ ಸಾವಿರಾರು ಭಕ್ತರು ಪೂರ್ವಜರಿಗೆ ಶ್ರದ್ಧಾಂಜಲಿ ಸಲ್ಲಿಸುವ ಸಲುವಾಗಿ 'ಬಲಿ ತರ್ಪಣಂ' ವಿಧಿಯನ್ನು ನೆರವೇರಿಸುತ್ತಾರೆ.

           ಹಿಂದೂ ಸಮುದಾಯದವರು 'ಕರ್ಕಿಡಕ ವಾವು' ನಿಮಿತ್ತ ಸಮುದ್ರ ಮತ್ತು ನದಿ ತೀರದಲ್ಲೂ ಈ ಧಾರ್ಮಿಕ ವಿಧಿಯನ್ನು ನೆರವೇರಿಸುತ್ತಾರೆ. ಈ ದಿನದಂದು 'ಬಲಿ ತರ್ಪಣಂ' ಸಮರ್ಪಿಸಿದರೆ, ಪೂರ್ವಜರ ಆತ್ಮಕ್ಕೆ ಶಾಂತಿ ಸಿಗಲಿದೆ ಎಂಬ ನಂಬಿಕೆಯಿದೆ.