ತೈಲ ಸೇವೆ ವ್ಯತ್ಯಯದ ಸೈಬರ್ ದಾಳಿ ಹಿಂದೆ ಅಮೆರಿಕ, ಇಸ್ರೇಲ್‌ ಕೈವಾಡ: ಇರಾನ್ ಶಂಕೆ

               ಟೆಹರಾನ್: ಇಂಧನ ಪೂರೈಕೆ ಸೇವೆ ತೀವ್ರಸ್ವರೂಪದಲ್ಲಿ ವ್ಯತ್ಯಯವಾಗಲು ಕಾರಣವಾವಾಗಿದ್ದ ಸೈಬರ್ ದಾಳಿಯ ಹಿಂದೆ ಇಸ್ರೇಲ್‌ ಮತ್ತು ಅಮೆರಿಕದ ಕೈವಾಡ ಇರುವ ಶಂಕೆಯಿದೆ ಎಂದು ಇರಾನ್‌ನ ಜನರಲ್‌ ಘೋಲಂರೆಜಾ ಜಲಾಲಿ ಹೇಳಿದ್ದಾರೆ.

              ಮಂಗಳವಾರ ನಡೆದಿದ್ದ ಸೈಬರ್‌ ದಾಳಿಯ ತಂತ್ರಜ್ಞಾನದ ಹಿನ್ನೆಲೆ ಮತ್ತು ಈ ಹಿಂದೆ ನಡೆದಿದ್ದ ದಾಳಿಗೂ ಸಾಮ್ಯತೆ ಇದೆ. ಇದು, ನಮ್ಮ ವೈರಿಗಳಾದ ಅಮೆರಿಕ ಮತ್ತು ಇಸ್ರೇಲ್‌ನ ಉದ್ದೇಶಪೂರ್ವಕ ಕೃತ್ಯ ಎಂದು ಅವರು ಹೇಳಿದ್ದಾರೆ.

           ನಾವು ಶಾಹಿದ್‌ ರಾಜೈ ಪೋರ್ಟ್‌ ಅಪಘಾತ ಮತ್ತು ರೈಲ್ವೆ ಅಪಘಾತ ಈ ಎರಡೂ ಘಟನೆಗಳನ್ನು ಅಧ್ಯಯನ ಮಾಡಿದ್ದೇವೆ. ಪರಸ್ಪರ ಹೋಲಿಕೆ ಇದೆ ಎಂದು ನಾಗರಿಕ ರಕ್ಷಣಾ ಘಟಕದ ಮುಖ್ಯಸ್ಥರೂ ಆದ ಜಲಾಲಿ ಅವರು ಹೇಳಿದರು.

              ಜುಲೈ ತಿಂಗಳಲ್ಲಿ ಇರಾನ್‌ನ ಸಾರಿಗೆ ಸಚಿವಾಲಯವು ಸೈಬರ್ ದಾಳಿಯ ಪರಿಣಾಮ ಕಂಪ್ಯೂಟರ್‌ ವ್ಯವಸ್ಥೆ, ವೆಬ್‌ಸೈಟ್‌ ಕಾರ್ಯನಿರ್ವಹಣೆಗೆ ಧಕ್ಕೆಯಾಗಿತ್ತು ಎಂದು ಫಾರ್ಸ್ ನ್ಯೂಸ್‌ ವರದಿ ಮಾಡಿದೆ.