ಕ್ಷುದ್ರಗ್ರಹದಿಂದ ಭೂಮಿ ರಕ್ಷಿಸುವ ಡಾರ್ಟ್, ನಾಸಾದಿಂದ ಜಗತ್ತಿನ ಮೊಟ್ಟಮೊದಲ ಗ್ರಹ ರಕ್ಷಣಾ ಗಗನನೌಕೆ ಉಡಾವಣೆ

             ವಾಷಿಂಗ್ಟನ್: ಜಗತ್ತಿನ ಮೊಟ್ಟ ಮೊದಲ ಗ್ರಹ ರಕ್ಷಣಾ ವ್ಯವಸ್ಥೆ 'ಡಾರ್ಟ್' (Double Asteroid Redirection Test-DART) ಗಗನನೌಕೆಯನ್ನು ಅಮೆರಿಕದ ಬಾಹ್ಯಾಕಾಶ ಸಂಶೋಧನಾ ಸಂಸ್ಥೆ ನಾಸಾ ಸ್ಥಳೀಯ ಕಾಲಮಾನ ಮಂಗಳವಾರ ರಾತ್ರಿ 10.21ಕ್ಕೆ ಯಶಸ್ವಿಯಾಗಿ ಉಡಾವಣೆ ಮಾಡಿದೆ. ವಂಡೆನ್​ಬರ್ಗ್ ವಾಯುನೆಲೆಯಿಂದ ಸ್ಪೇಸ್ ಎಕ್ಸ್​ನ ಫಾಲ್ಕೋನ್ 9 ರಾಕೆಟ್ ಮೂಲಕ ಈ ಉಡಾವಣಾ ಕಾರ್ಯ ನಡೆದಿದೆ.

            ಉಡಾವಣೆಗೊಂಡ 55 ನಿಮಿಷಗಳ ಬಳಿಕ ಫಾಲ್ಕೋನ್ 9ರ ಸೆಕೆಂಡ್ ಸ್ಟೇಜ್​ನಿಂದ ಗಗನ ನೌಕೆ ಪ್ರತ್ಯೇಕವಾಗಿದ್ದು, ಶೀಘ್ರವೇ ಸೂರ್ಯನ ಕಡೆಗೆ ತನ್ನಿಂತಾನೇ ಸಂಚರಿಸಲಿದೆ. ಡಾರ್ಟ್ ನೌಕೆಯು ಗಂಟೆಗೆ 24,000 ಕಿ.ಮೀ. (ಸೆಕೆಂಡ್​ಗೆ 6.6 ಕಿ.ಮೀ.)ವೇಗದಲ್ಲಿ ಡಿಡಿಮೋಸ್ ಎಂಬ ಕ್ಷುದ್ರಗ್ರಹದ ಪಕ್ಕದಲ್ಲಿರುವ ಸಣ್ಣ 160 ಮೀಟರ್ ವ್ಯಾಸದ ಮೂನ್​ಲೆಟ್ ಎಂಬ ಡಿಮೋಫೋಸ್ ಕ್ಷುದ್ರಗ್ರಹದ ಮೇಲೆ 2022ರ ಸೆ.26 ಮತ್ತು ಅ.1ರ ನಡುವೆ ಅಪ್ಪಳಿಸಲಿದೆ. ಮೆರಿಲ್ಯಾಂಡ್​ನಲ್ಲಿರುವ ಜಾನ್ಸ್ ಹಾಪ್ಕಿನ್ಸ್ ಅಪ್ಲೈಡ್ ಫಿಸಿಕ್ಸ್ ಲ್ಯಾಬ್ ಡಾರ್ಟ್ ನೌಕೆಯನ್ನು ನಿರ್ವಿುಸಿದೆ.

                                         ಕ್ಷುದ್ರಗ್ರಹದ ಪಥ ಬದಲಿಸುವ ಮಹತ್ವಾಕಾಂಕ್ಷೆಯ ಯೋಜನೆ

             100 ವರ್ಷ ಭೂಮಿಗೆ ಅಪಾಯವಿಲ್ಲ: ಈಗ ಪರೀಕ್ಷೆಗೊಳಪಡಿಸುತ್ತಿರುವ ಮೂನ್​ಲೆಟ್​ನಿಂದಲೂ ಭೂಮಿಗೆ ಅಪಾಯ ಇಲ್ಲ. ಮುಂದಿನ 100 ವರ್ಷ ತನಕ ಭೂಮಿಗೆ ಕ್ಷುದ್ರಗ್ರಹ ಅಪ್ಪಳಿಸುವ ಯಾವುದೇ ಅಪಾಯ ಇಲ್ಲ. ಆದಾಗ್ಯೂ, ಮುನ್ನೆಚ್ಚರಿಕೆ ಕ್ರಮವಾಗಿ ಈ ಪರೀಕ್ಷೆ ನಡೆಸಲಾಗುತ್ತಿದೆ. ಯಾವುದೇ ಕ್ಷುದ್ರಗ್ರಹ ಬಂದರೂ ಅದು 140 ಮೀಟರ್ ವ್ಯಾಸಕ್ಕಿಂತ ದೊಡ್ಡದಾಗಿರಲ್ಲ. ಭೂಕಕ್ಷೆಗೆ ಸಮೀಪವಾಗಿ 25,00ಕ್ಕೂ ಹೆಚ್ಚು ಆಕಾಶಕಾಯಗಳಿವೆ ಎಂದು ನಾಸಾ ವಿಜ್ಞಾನಿಗಳು ಹೇಳಿದ್ದಾರೆ.

                                                     ಉದ್ದೇಶವೇನು?:

•               ಕ್ಷುದ್ರಗ್ರಹದ ಚಲನಶೀಲ ಪ್ರಭಾವವನ್ನು ಪ್ರದರ್ಶಿಸುವುದು
• ಕ್ಷುದ್ರಗ್ರಹದ ದ್ವಿಪಥದ ಅವಧಿಯನ್ನು ಬದಲಾಯಿಸುವುದು
• ಭೂಮಿ ಮೇಲಿನ ಟೆಲಿಸ್ಕೋಪ್ ಬಳಸಿ ದ್ವಿಪಥದ ಅವಧಿ ಬದಲಾವಣೆ ಮೊದಲಿನ ಮತ್ತು ನಂತರದ ಪರಿಣಾಮಗಳನ್ನು ಅಳೆಯುವುದು