ಉಪ್ಪಳ: ಸಾಹಿತ್ಯದ ಮೂಲಕ ಒಳ್ಳೆಯ ವಿಚಾರಗಳನ್ನು ಪ್ರಸಾರಿಸಿ ಜನರ ಮನಸ್ಸನ್ನು ಸಂಸ್ಕಾರಗೊಳಿಸಬೇಕೇ ಹೊರತು ಕೆಡುಕು ವಿಚಾರಗಳನ್ನು ಹರಡಬಾರದು ಎಂದು ಪ್ರಸಿದ್ಧ ವೈದ್ಯ ಮತ್ತು ಸಾಹಿತಿ ಡಾ. ರಮಾನಂದ ಬನಾರಿ ಹೇಳಿದರು.
ಮಂಜೇಶ್ವರ ಸಮೀಪ ಬಾಯಿಕಟ್ಟೆಯಲ್ಲಿ ಕೇರಳದ ಸಾಹಿತ್ಯ-ಸಾಂಸ್ಕøತಿಕ ಸಂಘಟನೆಯಾದ ತಪಸ್ಯ ಮತ್ತು ಕಾಸರಗೋಡು ಜಿಲ್ಲಾ ಕನ್ನಡ ಲೇಖಕರ ಸಂಘ ಸಂಯುಕ್ತವಾಗಿ ಭಾನುವಾರ ಆಯೋಜಿಸಿದ ಒಂದು ದಿನದ ಕನ್ನಡ ಕಥಾನುವಾದ ಕಮ್ಮಟವನ್ನು ಉದ್ಘಾಟಿಸಿ ಅವರು ಮಾತಾಡಿದರು.
ಸಾಹಿತ್ಯವು ಒಳ್ಳೆಯ ಸಮಾಜ ನಿರ್ಮಾಣದ ಆಶಯವನ್ನು ಇರಿಸಿಕೊಂಡಿದೆ. ಸಮನ್ವಯ ಮತ್ತು ಭಾವೈಕ್ಯಗಳು ಸಾಹಿತ್ಯದ ಮುಖ್ಯ ನೆಲೆಯಲ್ಲಿ ಇದ್ದಾಗ ಸಮಾಜದ ಹಲವಾರು ಸಮಸ್ಯೆಗಳು ದೂರವಾಗಬಹುದು ಎಂದು ಅವರು ಹೇಳಿದರು.
ಮುಖ್ಯ ಅತಿಥಿಯಾಗಿ ಭಾಗವಹಿಸಿದ ಖ್ಯಾತ ಕವಿ ಹಾಗೂ ಸಾಹಿತಿ ಡಾ. ವಸಂತಕುಮಾರ ಪೆರ್ಲ ಅವರು ಮಲಯಾಳದಿಂದ ಕನ್ನಡಕ್ಕೆ ಸಾಕಷ್ಟು ಅನುವಾದಗಳು ಆಗಿವೆ. ಆದರೆ ಕನ್ನಡದಿಂದ ಮಲಯಾಳಕ್ಕೆ ಅನುವಾದ ಆಗಿರುವುದು ಕಡಿಮೆ. ಕನ್ನಡದ ಆಯ್ದ ಉತ್ತಮ ಇಪ್ಪತ್ತೈದು ಕಥೆಗಳು ಮಲಯಾಳಕ್ಕೆ ಅನುವಾದ ಆಗುತ್ತಿರುವುದು ಒಂದು ಅಪೂರ್ವ ಸಂಗತಿ. ಪರಸ್ಪರ ಅರಿವು, ತಿಳಿವಳಿಕೆ ಮತ್ತು ಭಾಷಾ ಬಾಂಧವ್ಯವನ್ನು ಬೆಳೆಸುವ ನಿಟ್ಟಿನಲ್ಲಿ ಇಂತಹ ಅನುವಾದಗಳು ಹೆಚ್ಚೆಚ್ಚು ಆಗಬೇಕು ಎಂದು ಹೇಳಿದರು.
ಇಂತಹ ವಿಶಿಷ್ಟ ಅನುವಾದ ಕಮ್ಮಟವು ಈ ಪ್ರದೇಶದಲ್ಲಿ ಇದೇ ಮೊದಲ ಸಲ ನಡೆಯುತ್ತಿದೆ. ಕನ್ನಡದಿಂದ ಮಲಯಾಲಕ್ಕೆ ಮತ್ತು ಮಲಯಾಳದಿಂದ ಕನ್ನಡಕ್ಕೆ ಸಾಹಿತ್ಯಾನುವಾದ ಮಾಡಲು ಕಾಸರಗೋಡಿನಂತಹ ಪ್ರದೇಶ ಅತ್ಯಂತ ಪ್ರಶಸ್ತವಾದದ್ದು ಎಂದು ಡಾ. ಪೆರ್ಲ ಹೇಳಿದರು.
ಅಧ್ಯಕ್ಷತೆ ವಹಿಸಿದ ತಪಸ್ಯ ಕಾಸರಗೋಡು ಘಟಕಾಧ್ಯಕ್ಷ ಬಾಲಚಂದ್ರನ್ ಕೆ. ಅವರು ಅನುವಾದಗೊಂಡ ಕಥೆಗಳನ್ನು ತಪಸ್ಯದ ಮೂಲಕ ಪುಸ್ತಕರೂಪದಲ್ಲಿ ತರಲಾಗುವುದು ಎಂದರಲ್ಲದೆ ಮುಂದೆ ಇಂತಹ ಇನ್ನಷ್ಟು ಶಿಬಿರಗಳನ್ನು ಆಯೋಜಿಸುವ ಉದ್ದೇಶವಿದೆ ಎಂದರು.
ತಪಸ್ಯ ಕೇರಳದ ಕಣ್ಣಾನ್ನೂರು ಜಿಲ್ಲಾಧ್ಯಕ್ಷ ಪ್ರಶಾಂತಬಾಬು ಕೈತಪ್ರಂ ಅವರು ನಮ್ಮ ಸಂಸ್ಕøತಿಯ ಅರಿವು ವಿಸ್ತಾರವಾಗಬೇಕಾದರೆ ಇಂತಹ ಕೊಳುಕೊಡೆ ಅಧಿಕ ಪ್ರಮಾಣದಲ್ಲಿ ನಡೆಯಬೇಕು ಎಂದರು. ತಪಸ್ಯ ಕೇರಳದ ರಾಜ್ಯ ಸಂಘಟನಾ ಕಾರ್ಯದರ್ಶಿ ಶ್ರೀಜಿತ್ ಉಪಸ್ಥಿತರಿದ್ದರು.
ಕಾಸರಗೋಡು ಜಿಲ್ಲಾ ಕನ್ನಡ ಲೇಖಕರ ಸಂಘದ ಅಧ್ಯಕ್ಷರೂ ಶಿಬಿರ ಸಂಚಾಲಕರೂ ಆದ ನಿವೃತ್ತ ಪ್ರಾಂಶುಪಾಲ ಪ್ರೊ. ಪಿ. ಎನ್. ಮೂಡಿತ್ತಾಯ ಅವರು ಆಶಯ ಭಾಷಣ ಮಾಡಿದರು. ದಿನಪೂರ್ತಿ ಜರಗಿದ ಅನುವಾದ ಕಮ್ಮಟದಲ್ಲಿ ಕನ್ನಡ ಮತ್ತು ಮಲಯಾಳಂ ಭಾಷೆಯ ಸುಮಾರು ಅರವತ್ತು ಮಂದಿ ಕವಿಗಳು ಲೇಖಕರು ವಿದ್ವಾಂಸರು ಭಾಗವಹಿಸಿದ್ದರು. ಸಂಜೆ ಜರಗಿದ ಸಮಾರೋಪ ಸಮಾರಂಭದಲ್ಲಿ ನಿಟ್ಟೆ ವಿ. ವಿ. ಯ ಸಹಕುಲಾಧಿಪತಿ ಡಾ. ಎಂ. ಎಸ್. ಮೂಡಿತ್ತಾಯ ಪ್ರಮಾಣ ಪತ್ರಗಳನ್ನು ವಿತರಿಸಿದರು.
ತಪಸ್ಯದ ಎ. ಕೆ. ಮಾಧವನ್ ಸ್ವಾಗತಿಸಿ, ಶ್ರದ್ಧಾ ನಾಯರ್ಪಳ್ಳ ಪ್ರಾರ್ಥನೆ ಹಾಡಿದರು. ಕಾರ್ತಿಕ್ ಪಡ್ರೆ ವಂದಿಸಿದರು.
DOCTYPE html>
.jpg)
