ನೊರೊವೈರಸ್: ತ್ರಿಶೂರ್‍ನಲ್ಲಿ ನಾಲ್ಕು ಮಂದಿಗೆ ದೃಢ: ವ್ಯಾಪಕ ಕಟ್ಟೆಚ್ಚರ

               ತ್ರಿಶೂರ್: ತೃಶೂರ್ ಜಿಲ್ಲೆಯಲ್ಲಿ ನೊರೊವೈರಸ್ ಹರಡುತ್ತಿರುವುದು ವ್ಯಾಪಕಗೊಳ್ಳುವ ಸೂಚನೆ ಕಂಡುಬಂದಿದೆ. ಇಂದು ನಾಲ್ವರಿಗೆ ಕಾಯಿಲೆ ಇರುವುದು ಪತ್ತೆಯಾಗಿದೆ. ಸೇಂಟ್ ಮೇರಿಸ್ ಕಾಲೇಜಿನ ವಿದ್ಯಾರ್ಥಿಗಳಲ್ಲಿ ಸೋಂಕು ದೃಢಪಟ್ಟಿದೆ. ಇದರೊಂದಿಗೆ ತ್ರಿಶೂರ್ ಜಿಲ್ಲೆಯಲ್ಲಿ ಸೋಂಕಿತರ ಸಂಖ್ಯೆ 60ಕ್ಕೆ ಏರಿಕೆಯಾಗಿದೆ.

                ರೋಗ ಹರಡುವ ಹಿನ್ನೆಲೆಯಲ್ಲಿ ಸೇಂಟ್ ಮೇರಿಸ್ ಕಾಲೇಜಿನಲ್ಲಿ ತರಗತಿಗಳನ್ನು ಆನ್ ಲೈನ್ ಮಾಡುವಂತೆ ಆರೋಗ್ಯ ಇಲಾಖೆ ಸೂಚಿಸಿದೆ. ಹಾಸ್ಟೆಲ್‍ನಲ್ಲಿರುವ ಕುಡಿಯುವ ನೀರಿನಿಂದ ವೈರಸ್ ಹರಡಿದೆ ಎಂಬುದು ಪ್ರಾಥಮಿಕ ತೀರ್ಮಾನ. ನಂತರ ಡಿಎಂಒ ನೇತೃತ್ವದ ತಂಡ ಕಾಲೇಜು ಹಾಸ್ಟೆಲ್ ಮತ್ತು ಸುತ್ತಮುತ್ತಲಿನ ಪ್ರದೇಶಗಳಿಗೆ ಭೇಟಿ ನೀಡಿತು.

                ಆರೋಗ್ಯಾಧಿಕಾರಿಗಳ ಪ್ರಕಾರ ಕಾಲೇಜು ಹಾಸ್ಟೆಲ್‍ನ ಬಾವಿಯ ನೀರಿನಲ್ಲಿ ಇ ಕೊಲಿ ಬ್ಯಾಕ್ಟೀರಿಯಾಗಳ ಸಂಖ್ಯೆ ಹೆಚ್ಚಿದ್ದರಿಂದ ವೈರಸ್ ಹರಡಿದೆ. ನಂತರ ಆರೋಗ್ಯ ಇಲಾಖೆಯು ಆ ಪ್ರದೇಶದಲ್ಲಿನ ಬಾವಿಗಳನ್ನು ಸೋಂಕುರಹಿತಗೊಳಿಸುತ್ತಿದೆ. ಸದ್ಯ ಆತಂಕಪಡುವ ಅಗತ್ಯವಿಲ್ಲ ಎಂದು ಆರೋಗ್ಯ ಇಲಾಖೆ ತಿಳಿಸಿದೆ. ಹಾಸ್ಟೆಲ್‍ನಲ್ಲಿರುವ ವಿದ್ಯಾರ್ಥಿಗಳು ಮತ್ತು ಸಿಬ್ಬಂದಿ ಜಾಗರೂಕರಾಗಿರಲು ಆರೋಗ್ಯ ಇಲಾಖೆ ಸೂಚನೆ ನೀಡಿದೆ.

                 ನೊರೊವೈರಸ್‍ನ ಮುಖ್ಯ ಲಕ್ಷಣಗಳೆಂದರೆ ಅತಿಸಾರ, ಹೊಟ್ಟೆ ನೋವು, ವಾಂತಿ, ವಾಕರಿಕೆ, ಜ್ವರ, ತಲೆನೋವು ಮತ್ತು ದೇಹದಲ್ಲಿ ನೋವು. ವಾಂತಿ ಮತ್ತು ಅತಿಸಾರದ ಉಲ್ಬಣವು ನಿರ್ಜಲೀಕರಣ ಮತ್ತು ರೋಗದ ಉಲ್ಬಣಕ್ಕೆ ಕಾರಣವಾಗಬಹುದು. ಕಲುಷಿತ ನೀರು ಮತ್ತು ಆಹಾರದ ಮೂಲಕ ರೋಗ ಹರಡುತ್ತದೆ. ಸೋಂಕಿತ ವ್ಯಕ್ತಿಗಳ ಸಂಪರ್ಕದ ಮೂಲಕವೂ ರೋಗ ಹರಡಬಹುದು.