ಪ್ರೊ.ಎ ಶ್ರೀನಾಥ್ ಗೆ ರಾಷ್ಟ್ರೀಯ ಪ್ರಶಸ್ತಿಯ ಗರಿ

           ಬದಿಯಡ್ಕ: ಹಿರಿಯ ಕನ್ನಡ ಸಂಘಟಕ, ಶೈಕ್ಷಣಿಕ ಸಾಧಕ ಕಾಸರಗೋಡಿನ ಪ್ರೊ.. ಎ. ಶ್ರೀನಾಥ್ ಅವರಿಗೆ ರಾಷ್ಟ್ರೀಯ ಮಟ್ಟದ "ಎಕ್ಸಲೆನ್ಸ್ ಎಜುಕೇಶನ್ ಲೀಡರ್ಷಿಪ್" ಪ್ರಶಸ್ತಿಯ ಗರಿ ಲಭಿಸಿದೆ.

            ಇಂಟನ್ರ್ಯಾಷನಲ್ ಪೀಸ್ ಯೂನಿವರ್ಸಿಟಿ ಹಾಗೂ ನವದೆಹಲಿಯ ನಯೀ ಉಡಾನ್ ಟ್ರಸ್ಟ್ ವತಿಯಿಂದ ಇತ್ತೀಚೆಗೆ ನವದೆಹಲಿಯಲ್ಲಿ ಜರಗಿದ ಅಂತಾರಾಷ್ಟ್ರೀಯ ಮಟ್ಟದ ಕಾರ್ಯಾಗಾರದಲ್ಲಿ ಪ್ರೊ.ಎ ಶ್ರೀನಾಥ್ ಅವರಿಗೆ ಪ್ರತಿಷ್ಠಿತ ಪ್ರಶಸ್ತಿ ಪ್ರದಾನ ಮಾಡಲಾಯಿತು. ಶೈಕ್ಷಣಿಕ, ಸೇವಾ ರಂಗದ ಅವರ ಜೀವಮಾನದ ಕೊಡುಗೆಯನ್ನು ಪರಿಗಣಿಸಿ ಈ ಪ್ರಶಸ್ತಿಗೆ ಆಯ್ಕೆ ಮಾಡಲಾಗಿತ್ತು.

                ಕೇಂದ್ರ ಸರ್ಕಾರದ ಆರೋಗ್ಯ ಇಲಾಖೆ ಸಹಾಯಕ ಆಯುಕ್ತ ಡಾ. ಸುಶೀಲ್ ಕುಮಾರ್, ಎನ್. ಎ. ಎಫ್. ಈ. ಡಿ. ಯ ಆಡಳಿತ ನಿರ್ದೇಶಕ ಅಶೋಕ್ ಠಾಕೋರ್, ಹಿರಿಯ ವಿಜ್ಞಾನಿ ಡಾ. ವಿವೇಕ್ ದೀಕ್ಷಿತ್, ಲಲಿತ ಕಲಾ ಅಕಾಡೆಮಿ ನಿರ್ದೇಶಕಿ ಸುನೀತಾ ಲಾಂಬಾ, ವಾಯುಸೇನೆ ಕಮಾಂಡರ್ ಮೇಜರ್ ಟಿ. ಸಿ. ರೋಯಿ, ಸಿ. ಬಿ. ಐ ನಿರ್ದೇಶಕ ವಿ. ಎನ್. ಸಿಂಘಲ್ ಮೊದಲಾದ ಪ್ರಮುಖರು ಉಪಸ್ಥಿತರಿದ್ದರು.

            ಸುದೀರ್ಘ ನಾಲ್ಕು ದಶಕಗಳ ಕಾಲ ಸ್ತುತ್ಯಾರ್ಹ ಸೇವೆ ಸಲ್ಲಿಸಿ ಸಾಹಸ್ರಾರು ವಿದ್ಯಾರ್ಥಿಗಳ ಮಾದರಿ ಶಿಕ್ಷಕ, ಮಾರ್ಗದರ್ಶಕರಾದ ನಿವೃತ್ತ ಪ್ರಾಧ್ಯಪಕರೂ ಕಾಸರಗೋಡು ಸರ್ಕಾರಿ ಕಾಲೇಜಿನ ನಿವೃತ್ತ  ಪ್ರಾoಶುಪಾಲರೂ ಆಗಿರುವ ಪ್ರೊ.ಎ. ಶ್ರೀನಾಥ್ ಅವರು ಕಾಲೇಜು ಎನ್ನೆಸ್ಸೆಸ್ ಘಟಕದ ಯೋಜನಾಧಿಕಾರಿಯಾಗಿ ಸದ್ರಿ ಘಟಕವನ್ನು ರಾಷ್ಟ್ರೀಯ ಮಟ್ಟಕ್ಕೆ ಬೆಳೆಸುವಲ್ಲಿ ಕಾರಣರಾದವರು. ಅವರ ಧಾರ್ಮಿಕ, ಸಾಮಾಜಿಕ, ಸಾಂಸ್ಕøತಿಕ, ಶೈಕ್ಷಣಿಕ ರಂಗದ ಸೇವೆ ಅನುಪಮವಾದುದು. ಶ್ರೇಷ್ಠ ವಾಗ್ಮಿ, ಕನ್ನಡ ಹೋರಾಟಗಾರರೂ ಆಗಿದ್ದಾರೆ. ಅವರಿಗೆ ಪ್ರತಿಷ್ಟಿತ ಪ್ರಶಸ್ತಿ ದೊರಕಿರುವುದಕ್ಕೆ ಕಾಸರಗೋಡಿನ ಅನೇಕ ಕನ್ನಡ ಪರ ಸಂಘಟನೆಗಳು ಅಭಿನಂದನೆ ಸಲ್ಲಿಸಿವೆ.