ಸಿಲ್ವರ್‍ಲೈನ್ ಸಮೀಕ್ಷೆ ಮುಂದುವರಿಯಬಹುದು; ವಿರೋಧಕ್ಕೆ ಹಿನ್ನಡೆ; ವಿಭಾಗೀಯ ಪೀಠದ ಆದೇಶ ರದ್ದು

                ಕೊಚ್ಚಿ: ಕೆ ರೈಲ್- ಸಿಲ್ವರ್ ಲೈನ್ ಯೋಜನೆಯ ಸಾಮಾಜಿಕ ಪರಿಣಾಮ ಮೌಲ್ಯಮಾಪನ ಸಮೀಕ್ಷೆಗೆ ತಡೆ ನೀಡಿದ್ದ ಏಕ ಪೀಠದ ಆದೇಶವನ್ನು ಕೇರಳ ಹೈಕೋರ್ಟ್ ವಿಭಾಗೀಯ ಪೀಠ ರದ್ದುಗೊಳಿಸಿದೆ. ಯೋಜನೆಯ ಡಿಪಿಆರ್ ಹೇಗೆ ತಯಾರಿಸಲಾಗಿದೆ ಎಂಬುದನ್ನು ತಿಳಿಸುವಂತೆ ಏಕ ಪೀಠ ನೀಡಿದ್ದ ಆದೇಶವನ್ನೂ ವಿಭಾಗೀಯ ಪೀಠ ರದ್ದುಗೊಳಿಸಿದೆ. ಇದರೊಂದಿಗೆ ಯೋಜನೆಗೆ ತೀವ್ರ ವಿರೋಧದ ನಡುವೆಯೂ ಸರ್ಕಾರ ಸಮೀಕ್ಷೆಗೆ ಮುಂದಾಗಿದೆ.

                  ಕೇರಳ ಹೈಕೋರ್ಟ್‍ನ ಮುಖ್ಯ ನ್ಯಾಯಮೂರ್ತಿ ನೇತೃತ್ವದ ವಿಭಾಗೀಯ ಪೀಠವು ಅರ್ಜಿಯ ವಿಚಾರಣೆ ನಡೆಸಿತು. ಯೋಜನೆಗೆ ಕೇಂದ್ರ ಸರ್ಕಾರದಿಂದ ತಾತ್ವಿಕ ಒಪ್ಪಿಗೆ ದೊರೆತಲ್ಲಿ ಸಾಮಾಜಿಕ ಪರಿಣಾಮದ ಮೌಲ್ಯಮಾಪನ ಸೇರಿದಂತೆ ಕ್ರಮಗಳಿಗೆ ಸರ್ಕಾರ ಮುಂದಾಗಲಿದೆ. ಆದರೆ ಜಿಲ್ಲಾಧಿಕಾರಿಗಳ ನೇತೃತ್ವದ ಅಧ್ಯಯನದ ಭಾಗವಾಗಿ ಭೂಸ್ವಾಧೀನಪಡಿಸಿಕೊಳ್ಳುವುದನ್ನು ವಿರೋಧಿಸಿ ವಿವಿಧ ಜಿಲ್ಲೆಗಳಲ್ಲಿ ಪ್ರತಿಭಟನೆಗಳು ಬಲವಾಗಿವೆ. ಈ ಹಿನ್ನೆಲೆಯಲ್ಲಿ ಯೋಜನೆ ವಿರುದ್ಧದ ಅರ್ಜಿಯನ್ನು ಹೈಕೋರ್ಟ್‍ನಲ್ಲಿ ಸ್ವೀಕರಿಸಲಾಗಿತ್ತು. ಸಾಮಾಜಿಕ ಪರಿಣಾಮಗಳ ಅಧ್ಯಯನವನ್ನು ನಿಲ್ಲಿಸಬೇಕು ಮತ್ತು ಸಿಲ್ವರ್‍ಲೈನ್ ಯೋಜನೆಯ ಡಿಪಿಆರ್ ಅನ್ನು ಹೇಗೆ ಸಿದ್ಧಪಡಿಸಲಾಗಿದೆ ಎಂಬ ಮಾಹಿತಿಯನ್ನು ನ್ಯಾಯಾಲಯಕ್ಕೆ ಸಲ್ಲಿಸಬೇಕು ಎಂದು ಏಕ ಪೀಠ ಸೂಚಿಸಿತ್ತು. ಆದರೆ, ವಿಭಾಗೀಯ ಪೀಠವು ಅರ್ಜಿಯನ್ನು ವಜಾಗೊಳಿಸುವುದರೊಂದಿಗೆ, ಸಮೀಕ್ಷೆಯನ್ನು ಮುಂದುವರಿಸಲು ಸರ್ಕಾರದ ಮುಂದಿದ್ದ ಕಾನೂನು ಅಡ್ಡಿಯು ನಿವಾರಣೆಯಾಗಿದೆ. 

                  ಸರ್ಕಾರದ ವಾದವನ್ನು ನಿರ್ಲಕ್ಷಿಸಿ ಏಕಪಕ್ಷೀಯ ತೀರ್ಪು ನೀಡಿದ್ದು, ಸರ್ವೆ ನಿಲ್ಲಿಸಿದರೆ ಯೋಜನಾ ವೆಚ್ಚ ತೀವ್ರವಾಗಿ ಏರಿಕೆಯಾಗಲಿದೆ ಎಂದು ವಿಭಾಗೀಯ ಪೀಠದ ಮುಂದೆ ಸರ್ಕಾರ ವಾದ ಮಂಡಿಸಿತ್ತು.

             ಏತನ್ಮಧ್ಯೆ, ವಿಭಾಗೀಯ ಪೀಠದ ತೀರ್ಪಿನ ವಿರುದ್ಧ ಏನು ಮಾಡಬಹುದು ಎಂಬುದನ್ನು ಪರಿಗಣಿಸುವುದಾಗಿ ಮುಷ್ಕರ ಸಮಿತಿ ತಿಳಿಸಿದೆ. ಯೋಜನೆಯ ವಿರುದ್ಧ ಮುಷ್ಕರ ಮುಂದುವರಿಯಲಿದೆ ಎಂದು ತಿಳಿಸಿದರು.

                ಇದೇ ವೇಳೆ ಈ ಯೋಜನೆ ಲಾಭದಾಯಕವಾಗುವುದೇ ಎಂಬ ಅನುಮಾನವಿದೆ ಎಂದು ಕೇಂದ್ರ ಸರ್ಕಾರ ಹೈಕೋರ್ಟ್ ಗೆ ಮಾಹಿತಿ ನೀಡಿದೆ. ಸಿಲ್ವರ್ ಲೈನ್ ಯೋಜನೆಯ ಲಾಭದ ಕುರಿತು ರಾಜ್ಯ ಸರ್ಕಾರ ಸಲ್ಲಿಸಿರುವ ಅಂಕಿಅಂಶಗಳು ನಂಬಲರ್ಹವಾಗಿಲ್ಲ ಎಂದು ಕೇಂದ್ರ ಹೇಳಿತ್ತು.

                 ಯೋಜನೆಗೆ ತಾತ್ವಿಕ ಒಪ್ಪಿಗೆ ಮಾತ್ರ ನೀಡಲಾಗಿದ್ದು, ಡಿಪಿಆರ್ ಸಿದ್ಧಪಡಿಸುವುದು ಸೇರಿದಂತೆ ಪ್ರಾಥಮಿಕ ಹಂತಗಳಿಗೆ ಮಾತ್ರ ಎಂದು ಕೇಂದ್ರ ರೈಲ್ವೆ ಸಚಿವಾಲಯ ನ್ಯಾಯಾಲಯಕ್ಕೆ ತಿಳಿಸಿದೆ. ಯೋಜನೆಯ ಸಮೀಕ್ಷೆ ಪ್ರಕ್ರಿಯೆಗೆ ಅಡ್ಡಿಯಾಗುವುದಿಲ್ಲ. ಆದರೆ, ಅಂತಿಮ ಒಪ್ಪಿಗೆ ಸಿಗದ ಹೊರತು ಭೂಮಿಗೆ ಕಲ್ಲು ಹಾಕುವುದಿಲ್ಲ ಮತ್ತು ಭೂ ಸ್ವಾಧೀನಪಡಿಸಿಕೊಳ್ಳುವುದಿಲ್ಲ ಎಂದು ರೈಲ್ವೆ ಇಲಾಖೆ ಸ್ಪಷ್ಟಪಡಿಸಿದೆ. ಯೋಜನೆಯ ಡಿಪಿಆರ್ ಅನ್ನು ಇನ್ನೂ ರೈಲ್ವೆ ಮಂಡಳಿಯು ಪರಿಗಣಿಸುತ್ತಿದೆ ಎಂದು ಅವರು ಅಫಿಡವಿಟ್‍ನಲ್ಲಿ ತಿಳಿಸಿದ್ದಾರೆ.

                 ತಿರುವನಂತಪುರದಿಂದ ಕಾಸರಗೋಡಿನವರೆಗಿನ ದೂರವನ್ನು ನಾಲ್ಕು ಗಂಟೆಗಳಲ್ಲಿ ಕ್ರಮಿಸುವ ಹೊಸ ಗ್ರೀನ್‍ಫೀಲ್ಡ್ ರೈಲು ಮಾರ್ಗವನ್ನು ನಿರ್ಮಿಸಲು ರಾಜ್ಯ ಸರ್ಕಾರ ಯೋಜಿಸುತ್ತಿದೆ. ಅಸ್ತಿತ್ವದಲ್ಲಿರುವ ರೈಲು ಮಾರ್ಗದಿಂದ ಸ್ವತಂತ್ರವಾಗಿ ನಿರ್ಮಿಸಲಾಗುತ್ತಿರುವ ಹೊಸ ಸ್ಟ್ಯಾಂಡರ್ಡ್ ಗೇಜ್ ಮಾರ್ಗವು ಕೇರಳದ ಅಭಿವೃದ್ಧಿಯಲ್ಲಿ ಒಂದು ಮೈಲಿಗಲ್ಲು ಎಂದು ಎಲ್ಡಿಎಫ್ ಸರ್ಕಾರ ಹೇಳಿಕೊಂಡಿದೆ. ವಿರೋಧ ಪಕ್ಷಗಳು ಇದು ರಾಜ್ಯಕ್ಕೆ ದೊಡ್ಡ ಆರ್ಥಿಕ ಹೊರೆ ಮತ್ತು ಪರಿಸರ ನಾಶಕ್ಕೆ ಕಾರಣವಾಗಲಿದೆ ಎಂದು ಪ್ರತಿಭಟಿಸುತ್ತಿದೆ.