ಮೀಡಿಯಾ ಒನ್ ಪ್ರಸಾರ ತಡೆ: ಕೇಂದ್ರದ ನಿರ್ಬಂಧಕ್ಕೆ ತಡೆ ನೀಡಿದ ಮಧ್ಯಂತರ ಆದೇಶ ವಿಸ್ತರಿಸಿದ ಕೇರಳ ಹೈಕೋರ್ಟ್

               ಕೊಚ್ಚಿ: ಮಲಯಾಳಂ ಸುದ್ದಿ ವಾಹಿನಿ 'ಮೀಡಿಯಾ ಒನ್' ಪ್ರಸಾರದಲ್ಲಿ ಕೇಂದ್ರದ ನಿರ್ಬಂಧದ ಅನುಷ್ಠಾನವನ್ನು ತಡೆ ಹಿಡಿಯುವ ಮಧ್ಯಂತರ ಆದೇಶವನ್ನು ಕೇರಳ ಹೈಕೋರ್ಟ್ ಬುಧವಾರ ಫೆಬ್ರವರಿ 7 ರವರೆಗೆ ವಿಸ್ತರಿಸಿದೆ.

             ಮಧ್ಯಂತರ ಆದೇಶವನ್ನು ವಿಸ್ತರಿಸುವ ಸಂದರ್ಭದಲ್ಲಿ ಸುದ್ದಿ ವಾಹಿನಿಗೆ ಭದ್ರತಾ ಕ್ಲಿಯರೆನ್ಸ್ ನಿರಾಕರಣೆಗೆ ಸಂಬಂಧಿಸಿದಂತೆ ಗೃಹ ವ್ಯವಹಾರಗಳ ಸಚಿವಾಲಯ ಕಡತಗಳನ್ನು ಸಹ ಹೈಕೋರ್ಟ್ ಕೇಳಿದೆ.

           ಗುಪ್ತಚರ ಮಾಹಿತಿಯ ಆಧಾರದ ಮೇಲೆ ರಾಷ್ಟ್ರೀಯ ಭದ್ರತಾ ಕಳವಳದಿಂದಾಗಿ ಮೀಡಿಯಾ ಒನ್ ಗೆ ಭದ್ರತಾ ಅನುಮತಿಯನ್ನು ಎಂಎಚ್ ಎ ನಿರಾಕರಿಸಿದೆ ಎಂದು ಕೇಂದ್ರ ಸರಕಾರವು ನ್ಯಾಯಾಲಯಕ್ಕೆ ತಿಳಿಸಿದ ನಂತರ ನ್ಯಾಯಮೂರ್ತಿ ಎನ್. ನಾಗರೇಶ್ ಅವರು ಕಡತಗಳನ್ನು ಕೇಳಿದ್ದಾರೆ.

           ಮತ್ತೊಂದೆಡೆ, ಹೊಸ ಅನುಮತಿ/ಪರವಾನಗಿಗೆ ಮಾತ್ರ ಎಂಎಚ್ ಎ ಕ್ಲಿಯರೆನ್ಸ್ ಅಗತ್ಯವಿದೆಯೇ ಹೊರತು ನವೀಕರಣದ ಸಮಯದಲ್ಲಿ ಅಲ್ಲ ಎಂದು ಚಾನೆಲ್ ವಾದಿಸಿದೆ.

               ಆದ್ದರಿಂದ, ಚಾನೆಲ್ ನ ಪ್ರಸಾರವನ್ನು ತಡೆಹಿಡಿಯಲು ಕೇಂದ್ರವು ಅನುಸರಿಸಿದ ಕಾರ್ಯವಿಧಾನವು ಕಾನೂನುಬಾಹಿರವಾಗಿದೆ ಎಂದು 'ಮೀಡಿಯಾ ಒನ್' ಅನ್ನು ನಿರ್ವಹಿಸುವ ಮಾಧ್ಯಮಮ್ ಬ್ರಾಡ್ಕಾಸ್ಟಿಂಗ್ ಲಿಮಿಟೆಡ್ ನ್ಯಾಯಾಲಯಕ್ಕೆ ತಿಳಿಸಿದೆ.