ಚೆರಾಟ್ ರಕ್ಷಣಾ ಕಾರ್ಯಾಚರಣೆಯಲ್ಲಿ ಗಂಭೀರ ಲೋಪ!: ಪಾಲಕ್ಕಾಡ್ ಜಿಲ್ಲಾ ಅಗ್ನಿಶಾಮಕ ಅಧಿಕಾರಿಗೆ ಶೋಕಾಸ್ ನೋಟಿಸ್

       ಪಾಲಕ್ಕಾಡ್: ಚೆರಾಟ್ ರಕ್ಷಣಾ ಕಾರ್ಯಾಚರಣೆಯಲ್ಲಿ ಲೋಪವೆಸಗಿದ್ದಕ್ಕಾಗಿ ಪಾಲಕ್ಕಾಡ್ ಜಿಲ್ಲಾ ಅಗ್ನಿಶಾಮಕ ಅಧಿಕಾರಿಗೆ ಶೋಕಾಸ್ ನೋಟಿಸ್ ಜಾರಿಗೊಳಿಸಲಾಗಿದೆ.  ರಕ್ಷಣಾ ಕಾರ್ಯಾಚರಣೆಯಲ್ಲಿ ಗಂಭೀರ ವೈಫಲ್ಯ ಕಂಡುಬಂದಿದೆ ಎಂದು ಅಂದಾಜಿಸಲಾಗಿದೆ.  ಯುವಕರು ಪರ್ವತದಲ್ಲಿ ಸಿಕ್ಕಿಬಿದ್ದಿರುವ ಬಗ್ಗೆ ಸಕಾಲದಲ್ಲಿ ಮೇಲಧಿಕಾರಿಗಳು ಮಾಹಿತಿ ನೀಡದಿರುವುದು ಕಂಡು ಬಂದಿದೆ.  ಅಗ್ನಿಶಾಮಕ ಮತ್ತು ರಕ್ಷಣಾ ಸೇವೆಗಳ ಮಹಾನಿರ್ದೇಶಕರು ವಿವರಣೆ ಕೇಳಿದ್ದಾರೆ.  ಕುರ್ಂಬಚಿಮಳದಲ್ಲಿ ಬಾಬು  ಸಿಲುಕಿದ್ದ ಘಟನೆಯಲ್ಲಿ ಜಿಲ್ಲಾ ಅಗ್ನಿಶಾಮಕ ಅಧಿಕಾರಿ ಕೈಗೊಂಡಿರುವ ಕ್ರಮ ಯಾವುದೇ ರೀತಿಯಲ್ಲೂ ಸಮ್ಮತವಲ್ಲ ಎಂದು ನೋಟಿಸ್ ನಲ್ಲಿ ತಿಳಿಸಲಾಗಿದೆ.

        43 ಗಂಟೆಗಳ ಕಾಲ ಕಲ್ಲುಬಂಡೆಯ ಕೊರಕಲುಗಳಲ್ಲಿ ಸಿಕ್ಕಿಹಾಕಿಕೊಂಡ ಅಮೂಲ್ಯ ಜೀವ, ಬಾಯಾರಿ ನೀರಿಗಾಗಿ ಪರಿತಪಿಸುತ್ತಿರುವ ದಾರುಣ ದೃಶ್ಯ ಮಾಧ್ಯಮಗಳ ಕೇಂದ್ರಬಿಂದುವಾಗಿತ್ತು.  ಈ ಮಾಹಿತಿಯನ್ನು ರಾಜ್ಯ ನಿಯಂತ್ರಣ ಕೊಠಡಿ, ಕೇಂದ್ರ ಕಚೇರಿ, ಮಹಾನಿರ್ದೇಶಕರು ಮತ್ತು ತಾಂತ್ರಿಕ ನಿರ್ದೇಶಕರಂತಹ ಮೇಲಧಿಕಾರಿಗಳಿಗೆ ಸಕಾಲದಲ್ಲಿ ತಿಳಿಸದಿರುವುದು ಗಂಭೀರ ಲೋಪವಾಗಿದೆ.

         ಅಗತ್ಯವಿರುವ ಸಿಬ್ಬಂದಿಯನ್ನು ಸಮಯಕ್ಕೆ ನಿಯೋಜಿಸದಿರುವುದು ಮತ್ತು ಹೆಚ್ಚಿನ ರಕ್ಷಣಾ ಕಾರ್ಯಾಚರಣೆಗಳನ್ನು ಅಳವಡಿಸಿಕೊಳ್ಳದಿರುವುದು ಗಂಭೀರ ಲೋಪವಾಗಿದೆ ಎಂದು ನೋಟಿಸ್‌ನಲ್ಲಿ ಉಲ್ಲೇಖಿಸಲಾಗಿದೆ.  ಈ ಕುರಿತು 48 ಗಂಟೆಯೊಳಗೆ ಉತ್ತರ ನೀಡುವಂತೆ ಸೂಚಿಸಲಾಗಿದೆ.