ಯೂಕ್ರೇನ್​ ವಿರುದ್ಧ ರಷ್ಯಾ ಯುದ್ಧ: ಭಾರತದಲ್ಲಿ ತುಟ್ಟಿಯಾದ ಚಿನ್ನ, ಇಂಧನ ದರ ಏರಿಕೆ ಸಾಧ್ಯತೆ

           ನವದೆಹಲಿ: ಯೂಕ್ರೇನ್​ ವಿರುದ್ಧ ರಷ್ಯಾ ಯುದ್ಧ ಸಾರಿದ ಬೆನ್ನಲ್ಲೇ ಜಾಗತಿಕ ಮಾರುಕಟ್ಟೆಯ ಮೇಲೆ ತೀವ್ರ ಪರಿಣಾಮ ಬೀರಿದ್ದು, ಯುದ್ಧದ ಬಿಸಿ ಭಾರತಕ್ಕೂ ತಟ್ಟಿದೆ. ಒಂದೇ ದಿನದಲ್ಲಿ ಚಿನ್ನದ ಬೆಲೆಯಲ್ಲಿ ಭಾರೀ ಏರಿಕೆ ಕಂಡಿದ್ದು, ಬಹು ಸರಕು ವಿನಿಮಯ (ಎಂಸಿಎಕ್ಸ್​) ಕೇಂದ್ರದಲ್ಲಿ  ಚಿನ್ನದ ಬೆಲೆಯಲ್ಲಿ 1400 ರೂಪಾಯಿ ಏರಿಕೆಯಾಗಿದೆ.

           10 ಗ್ರಾಂ ಚಿನ್ನದ ಬೆಲೆ 51,750 ರೂ.ಗೆ ತಲುಪಿದೆ. ಇದರೊಂದಿಗೆ ಇಂಧನ ದರದ ಮೇಲೂ ರಷ್ಯಾ ಯುದ್ಧ ಘೋಷಣೆ ಪರಿಣಾಮ ಬೀರಲಿದೆ.

          ಪ್ರತಿ 10 ಗ್ರಾಂ ಚಿನ್ನಕ್ಕೆ 1400 ರೂ. ಬೆಲೆ ಏರಿಕೆಯಾಗಿದ್ದು, ಈ ವರ್ಷದಲ್ಲಿ ಅತ್ಯಧಿಕ ಬೆಲೆ ಹೆಚ್ಚಳ ಇದಾಗಿದೆ. ಸ್ಪಾಟ್​ ಮಾರುಕಟ್ಟೆಯಲ್ಲಿ ಪ್ರತಿ ಔನ್ಸ್​ (1 ಔನ್ಸ್​=28.3495 ಗ್ರಾಂ) ಚಿನ್ನದ ಬೆಲೆ 1925 ಡಾಲರ್​ನಿಂದ 1950 ಡಾಲರ್​ಗೆ ಏರಿಕೆಯಾಗಿದೆ. ಕಳೆದ 13 ತಿಂಗಳಲ್ಲೇ ಇದು ಅತ್ಯಧಿಕ ಏರಿಕೆಯಾಗಿದೆ.

ಚಿನ್ನದ ಬೆಲೆ ಏರಿಕೆಗೆ ರಷ್ಯಾ ಮತ್ತು ಯೂಕ್ರೇನ್​ ನಡುವಿನ ಬಿಕ್ಕಟ್ಟೇ ಕಾರಣ ಎಂದು ಆರ್ಥಿಕ ಪರಿಣಿತರು ವಿಶ್ಲೇಷಿಸಿದ್ದಾರೆ. ಪರಿಸ್ಥಿತಿ ಹೀಗೆ ಮುಂದುವರಿದರೆ ಚಿನ್ನದ ಬೆಲೆ ಪ್ರತಿ ಔನ್ಸ್​ಗೆ 2000 ಡಾಲರ್​ ತಲುಪಲಿದೆ ಎಂದು ಹೇಳಿದ್ದಾರೆ.

                       ಇಂಧನ ದರವೂ ಏರಿಕೆ
       ಯುದ್ಧದ ಕಾರ್ಮೋಡದಿಂದಾಗಿ ಹಣದುಬ್ಬರವೂ ಏರಿಕೆಯಾಗಿದ್ದು, ಕಚ್ಚಾ ತೈಲ ಬೆಲೆ ಪ್ರತಿ ಬ್ಯಾರೆಲ್​ಗೆ 100 ಡಾಲರ್​ ಮುಟ್ಟಿದ್ದು, ಪರಿಸ್ಥಿತಿ ಹೀಗೆ ಮುಂದುವರಿದರೆ ಜಾಗತಿಕ ಮಾರುಕಟ್ಟೆಯಲ್ಲಿ ಶೇ. 10 ರಷ್ಟು ಏರಿಕೆಯೊಂದಿಗೆ ಪ್ರತಿ ಬ್ಯಾರೆಲ್​ಗೆ 110 ಡಾಲರ್​ ತಲುಪಲಿದೆ ಎಂದು ಐಐಎಫ್​ಎಲ್​ ಸೆಕ್ಯುರಿಟಿಯ ಉಪಾಧ್ಯಕ್ಷ ಅಜುಜ್​ ಗುಪ್ತಾ ತಿಳಿಸಿದ್ದಾರೆ. ಈಗಾಗಲೇ ಎಚ್ಚರಿಕೆಯ ಮಟ್ಟ ತಲುಪಿದ್ದು, ಭಾರತದಲ್ಲಿ ಇಂಧರ ಏರಿಕೆ ಆಗುವ ಸಾಧ್ಯತೆ ಇದೆ ಎಂದು ಹೇಳಲಾಗುತ್ತಿದೆ.