ಬಸ್ ಮಾಲೀಕರನ್ನು ಮಾತುಕತೆಗೆ ಕರೆಸದ ಸರ್ಕಾರ: ಖಾಸಗಿ ಬಸ್ ಮುಷ್ಕರ ಮೂರನೇ ದಿನಕ್ಕೆ

                     ತಿರುವನಂತಪುರ: ರಾಜ್ಯದಲ್ಲಿ ಬುಧವಾರ ಮಧ್ಯರಾತ್ರಿಯಿಂದ ಆರಂಭವಾದ ಅನಿರ್ದಿಷ್ಟಾವಧಿ ಖಾಸಗಿ ಬಸ್ ಮುಷ್ಕರ ಮೂರನೇ ದಿನಕ್ಕೆ ಕಾಲಿಟ್ಟಿದೆ. ಸರ್ಕಾರ ಇನ್ನೂ ಬಸ್ ಮಾಲೀಕರನ್ನು ಚರ್ಚೆಗೆ ಕರೆದಿಲ್ಲ. ಬೇಡಿಕೆಗಳು ಅಂಗೀಕಾರವಾಗುವವರೆಗೂ ಮುಷ್ಕರ ಮುಂದುವರಿಯಲಿದೆ ಎಂದು ಬಸ್ ಮಾಲೀಕರ ಜಂಟಿ ಸಮಿತಿ ಅಭಿಪ್ರಾಯಪಟ್ಟಿದೆ. ಈ ನಡುವೆ ಸಾರಿಗೆ ಸಚಿವ ಅಂಟನಿರಾಜು ಮಾತನಾಡಿ, ಬಸ್ ಪ್ರಯಾಣ ದರ ಏರಿಕೆ ಘೋಷಣೆಯಾಗಿರುವುದರಿಂದ ಖಾಸಗಿ ಬಸ್ ಮಾಲೀಕರ ಮುಷ್ಕರ ಅನಗತ್ಯ ಎಂದಿರುವರು.

                 ಸರಕಾರದ ನಿರ್ಧಾರ ತಡವಾದರೆ ಮುಷ್ಕರವನ್ನು ತೀವ್ರಗೊಳಿಸುವುದಾಗಿ ಬಸ್ ಮಾಲೀಕರ ಜಂಟಿ ಸಮಿತಿ ಪ್ರಧಾನ ಸಂಚಾಲಕ ಟಿ.ಗೋಪಿನಾಥ್ ತಿಳಿಸಿದ್ದಾರೆ. ವಿಶೇಷ ಪರ್ಮಿಟ್ ಹೊಂದಿರುವ ಕೆಲವು ಬಸ್‍ಗಳನ್ನು ಹೊರತುಪಡಿಸಿ ತಿರುವನಂತಪುರಂನಲ್ಲಿ ನಿನ್ನೆಯೂ ಯಾವುದೇ ಖಾಸಗಿ ಬಸ್ಸುಗಳು ಸಂಚರಿಸಲಿಲ್ಲ.

                  ಹೆಚ್ಚುವರಿ ಸೇವೆಗಳನ್ನು ಘೋಷಿಸಿದ್ದ ಕೆಎಸ್‍ಆರ್‍ಟಿಸಿ ಹಲವು ಜಿಲ್ಲೆಗಳಲ್ಲಿ ಹೆಚ್ಚುವರಿ ಸೇವೆಗಳನ್ನು ನಡೆಸಲು ಸಾಧ್ಯವಾಗಲಿಲ್ಲ. ಇದರಿಂದ ಪ್ರಯಾಣಿಕರು ಪರದಾಡಿದರು.

ಗುರುವಾರ ಕೆಎಸ್‍ಆರ್‍ಟಿಸಿ 3804 ಸೇವೆ ನಡೆಸಿದೆ ಎಂದು ವರದಿಯಾಗಿದೆ. ಸಾಮಾನ್ಯಕ್ಕಿಂತ ಇನ್ನೂರಕ್ಕೂ ಹೆಚ್ಚು ಸೇವೆಗಳು ನಡೆದವು. ಆಸ್ಪತ್ರೆ, ವಿಮಾನ ನಿಲ್ದಾಣ ಮತ್ತು ರೈಲು ನಿಲ್ದಾಣಕ್ಕೆ ವಿಶೇಷ ಸೇವೆಗಳು ಇದ್ದವು. ನೌಕರರು ರಜೆ ತೆಗೆದುಕೊಳ್ಳುವುದನ್ನು ನಿಷೇಧಿಸಲಾಗಿದೆ. 

                   ಕನಿಷ್ಠ ಬಸ್ ಪ್ರಯಾಣ ದರ 12 ರೂ., ಕಿಲೋಮೀಟರ್ ಪ್ರಯಾಣ ದರ 1.10 ರೂ., ವಿದ್ಯಾರ್ಥಿ ಪ್ರಯಾಣ ದರ 6 ರೂ.ಗೆ ಏರಿಕೆ ಮಾಡುವಂತೆ ಒತ್ತಾಯಿಸಿ ಖಾಸಗಿ ಬಸ್ ಮಾಲೀಕರು ಬುಧವಾರ ಮಧ್ಯರಾತ್ರಿಯಿಂದ ಮುಷ್ಕರ ಆರಂಭಿಸಿದ್ದಾರೆ.

                   ಮುಷ್ಕರದ ಮೂಲಕ ಶುಲ್ಕ ಹೆಚ್ಚಿಸಲಾಗಿದೆ ಎಂದು ಬಸ್ ಮಾಲೀಕರ ಸಂಘ ಬಿಂಬಿಸಲು ಯತ್ನಿಸುತ್ತಿದೆ ಎಂದು ಸಾರಿಗೆ ಸಚಿವ ಆಂಟನಿರಾಜು ಹೇಳಿದ್ದಾರೆ. ಶುಲ್ಕ ಹೆಚ್ಚಿಸಬಹುದು ಎಂದು ಸ್ಪಷ್ಟನೆ ನೀಡಿದರೂ ಮಾಲೀಕರು ಹಿಂದೆ ಸರಿಯದೆ ಪರೀಕ್ಷೆ ವೇಳೆ ಮುಷ್ಕರಕ್ಕೆ ಅವಕಾಶ ನೀಡಬಾರದಿತ್ತು ಎಂದು ಸಚಿವರು ತಿಳಿಸಿದರು.

                     ಕೋವಿಡ್ ಯುಗದ ವಾಹನ ತೆರಿಗೆಯನ್ನು ಮನ್ನಾ ಮಾಡುವ ಸಮಿತಿಯ ಶಿಫಾರಸನ್ನು ಸರ್ಕಾರ ಪರಿಗಣಿಸಿಲ್ಲ ಎಂದು ಬಸ್ ಮಾಲೀಕರು ಹೇಳುತ್ತಾರೆ. ಸಾಂಕ್ರಾಮಿಕ ರೋಗದ ನಂತರ ಇದುವರೆಗೆ ಪಾವತಿಸದ ವಾಹನ ತೆರಿಗೆಯನ್ನು ಮರಳಿ ಕೊಡಬೇಕು  ಮತ್ತು ಮುಂಬರುವ ತಿಂಗಳುಗಳಲ್ಲಿ ತೆರಿಗೆ ವಿನಾಯಿತಿ ನೀಡುವಂತೆ ಮಾಲೀಕರು ಒತ್ತಾಯಿಸುತ್ತಿದ್ದಾರೆ. ಕೆಎಸ್‍ಆರ್‍ಟಿಸಿಗೆ 1000 ಕೋಟಿ ರೂ. ಮೀಸಲಿಟ್ಟಿದ್ದು, ರಾಜ್ಯ ಬಜೆಟ್‍ನಲ್ಲಿ ಖಾಸಗಿ ಬಸ್‍ಗಳನ್ನು ಪರಿಗಣಿಸಿಲ್ಲ ಎಂಬ ಆರೋಪವೂ ಇದೆ.