'ಅಣು ಸ್ಥಾವರಗಳ ಸುರಕ್ಷತೆ ಖಚಿತಪಡಿಸಿಕೊಳ್ಳಿ': ರಷ್ಯಾ-ಉಕ್ರೇನ್ ಗೆ ಚೀನಾ ಕಿವಿಮಾತು.. ಕೊಟ್ಟ ಮಾತಿಗೆ ಮೌನದ ಉತ್ತರ!!

          ಬೀಜಿಂಗ್: ಉಕ್ರೇನ್ ಮೇಲೆ ದಾಳಿ ಮಾಡುತ್ತಿರುವ ರಷ್ಯಾ ವಿಚಾರವಾಗಿ ಇದೀಗ ಚೀನಾ ಹೇಳಿಕೆ ಬಿಡುಗಡೆ ಮಾಡಿದ್ದು, ಉಭಯ ದೇಶಗಳ ಅಣು ಸ್ಥಾವರಗಳ ಸುರಕ್ಷತೆ   ಖಚಿತಪಡಿಸಿಕೊಳ್ಳಿ ಎಂದು ಕಿವಿಮಾತು ಹೇಳಿದೆ.

              ಹಿಂದಿನ ಸೋವಿಯತ್ ಒಕ್ಕೂಟದ ದೇಶದಲ್ಲಿ ರಷ್ಯಾದಿಂದ ತೀವ್ರಗೊಳ್ಳುತ್ತಿರುವ ಮಿಲಿಟರಿ ದಾಳಿಯ ನಡುವೆ ಸಂಭಾವ್ಯ ಪರಿಸರ ವಿಪತ್ತಿನ ಬಗ್ಗೆ ಆತಂಕಗಳು ಹೆಚ್ಚುತ್ತಿರುವ ಬೆನ್ನಲ್ಲೇ ಉಕ್ರೇನ್‌ನ ಪರಮಾಣು ಸೌಲಭ್ಯಗಳ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಚೀನಾ ಸರ್ಕಾರ ರಷ್ಯಾ ಮತ್ತು ಉಕ್ರೇನ್‌ಗೆ ಕರೆ ನೀಡಿದೆ.

           ಬುಧವಾರ ವಿಯೆನ್ನಾದಲ್ಲಿ ಅಂತಾರಾಷ್ಟ್ರೀಯ ಪರಮಾಣು ಶಕ್ತಿ ಸಂಸ್ಥೆಯ ಉನ್ನತ ಅಧಿಕಾರಿಗಳ ತುರ್ತು ಸಭೆಯನ್ನು ಉದ್ದೇಶಿಸಿ ಮಾತನಾಡಿದ ಚೀನಾದ ರಾಯಭಾರಿ ವಾಂಗ್ ಕ್ಯುನ್ ಅವರು, "ಮಾನವ ನಿರ್ಮಿತ ಪರಮಾಣು ಸುರಕ್ಷತೆ ಮತ್ತು ಭದ್ರತಾ ಆಂತಕಕ್ಕೆ ಕಾರಣವಾಗುವುದನ್ನು ತಪ್ಪಿಸಲು ಸಂಬಂಧಿತತರು ಎಚ್ಚರಿಕೆಯಿಂದ ಕಾರ್ಯನಿರ್ವಹಿಸುತ್ತವೆ ಎಂದು ಚೀನಾ ಭಾವಿಸುತ್ತದೆ ಎಂದು ಹೇಳಿದರು.

                 "ಉಕ್ರೇನ್‌ನಲ್ಲಿನ ಪರಮಾಣು ಸೌಲಭ್ಯಗಳ ಸುರಕ್ಷತೆ, ಭದ್ರತೆ ಮತ್ತು ಸುರಕ್ಷತೆಗಳ ಬಗ್ಗೆ ಚೀನಾ ಕಾಳಜಿ ವಹಿಸುತ್ತಿದೆ.  ಪರಮಾಣು ಸೌಲಭ್ಯಗಳ ಸುರಕ್ಷತೆಯನ್ನು ಖಚಿತಪಡಿಸಿಕೊಳ್ಳಲು ಎರಡು ದೇಶಗಳು ಕೆಲಸ ಮಾಡಬೇಕು. ಐಎಇಎ ತನ್ನ ಆದೇಶಕ್ಕೆ ಅನುಗುಣವಾಗಿ ಉಕ್ರೇನ್‌ನಲ್ಲಿನ ಭದ್ರತಾ ಪರಿಸ್ಥಿತಿಯ ಸಂಪೂರ್ಣ ಪರಿಗಣನೆಯನ್ನು ತೆಗೆದುಕೊಳ್ಳಬೇಕು ಮತ್ತು ಉಕ್ರೇನ್‌ನಲ್ಲಿನ ಭದ್ರತಾ ರಕ್ಷಣೆಯ ಸಮಸ್ಯೆಯನ್ನು ಸರಿಯಾಗಿ ಪರಿಹರಿಸಬೇಕು ಎಂದು ವಾಂಗ್ ವಿಶ್ವಸಂಸ್ಥೆ ಪರಮಾಣು ವಿಚಕ್ಷಣ ಗವರ್ನರ್ ಮಂಡಳಿಗೆ ತಿಳಿಸಿದರು.

                              ಕೊಟ್ಟ ಮಾತಿಗೆ ಮೌನದ ಉತ್ತರ
              ಉಕ್ರೇನ್‌ನ ಪರಮಾಣು ಶಕ್ತಿಯ ಅಭಿವೃದ್ಧಿಯು ಸೋವಿಯತ್ ಯುಗದಲ್ಲಿ ಪ್ರಾರಂಭವಾಯಿತು, 1970 ರ ದಶಕದಲ್ಲಿ ರಾಜಧಾನಿ ಕೀವ್ ಬಳಿ ಚೆರ್ನೋಬಿಲ್ ಅಣು ವಿದ್ಯುತ್ ಸ್ಥಾವರವನ್ನು ನಿರ್ಮಿಸಲಾಗಿತ್ತು.  2013 ರಲ್ಲಿ ಚೀನಾ ಉಕ್ರೇನ್‌ನೊಂದಿಗೆ ಜಂಟಿ ಹೇಳಿಕೆಗೆ ಸಹಿ ಹಾಕಿದ್ದು, ಉಕ್ರೇನ್ ನ ಪರಮಾಣು ಶಸ್ತ್ರಾಸ್ತ್ರಗಳನ್ನು ಬಳಸಿಕೊಂಡು ಯಾರೇ ಆಕ್ರಮಣ ಮಾಡಿದರೆ ಅಥವಾ ಅಂತಹ ಆಕ್ರಮಣದಿಂದ ಬೆದರಿಕೆ ಹಾಕಿದರೆ ಚೀನಾ ಸರ್ಕಾರವು ಕೀವ್‌ ಗೆ ಭದ್ರತೆಯನ್ನು ನೀಡುತ್ತದೆ ಎಂದು ಭರವಸೆ ನೀಡಿದೆ.

             ಇದೇ ವಿಚಾರವಾಗಿ ಈಗ ಮಾತ್ರ ಚೀನಾ ಮೌನಕ್ಕೆ ಶರಣಾಗಿದೆ. ರಷ್ಯಾದ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ದೇಶದ ಪರಮಾಣು ಪಡೆಗಳಿಗೆ ಹೆಚ್ಚಿನ ಎಚ್ಚರಿಕೆ ನೀಡಿರುವುದರಿಂದ ಉಕ್ರೇನ್‌ನ ಭದ್ರತೆಯನ್ನು ರಕ್ಷಿಸಲು ಚೀನಾ ಕ್ರಮಗಳನ್ನು ತೆಗೆದುಕೊಳ್ಳುತ್ತದೆಯೇ ಎಂಬ ಪ್ರಶ್ನೆಗೆ ಚೀನಾ ಮೌನದ ಉತ್ತರ ನೀಡಿದೆ. 

               ಇದೇ ವಿಚಾರವಾಗಿ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದ್ದ ಚೀನಾ ವಿದೇಶಾಂಗ ಸಚಿವಾಲಯದ ವಕ್ತಾರ ವಾಂಗ್ ವೆನ್ಬಿನ್, 'ದೇಶಗಳು ಮತ್ತು ಯುಎನ್ ಸೆಕ್ಯುರಿಟಿ ಕೌನ್ಸಿಲ್ ರೆಸಲ್ಯೂಶನ್ 984 ರ ಪ್ರಕಾರ, ಪರಮಾಣು-ಶಸ್ತ್ರಾಸ್ತ್ರ ರಾಜ್ಯಗಳು ಉಕ್ರೇನ್ ಮತ್ತು ಇತರ ಪರಮಾಣು-ಶಸ್ತ್ರ-ಅಲ್ಲದ ದೇಶಗಳಿಗೆ ಭದ್ರತಾ ಭರವಸೆಗಳನ್ನು ನೀಡುತ್ತವೆ. ಸುರಕ್ಷತಾ ಭರವಸೆಗಳು ವಿಷಯದ ಮೇಲೆ ಸ್ಪಷ್ಟ ಮಿತಿಗಳನ್ನು ಹೊಂದಿವೆ ಮತ್ತು ನಿರ್ದಿಷ್ಟ ಪರಿಸ್ಥಿತಿಗಳಲ್ಲಿ ಪ್ರಚೋದಿಸಲ್ಪಡುತ್ತವೆ. ಉಕ್ರೇನ್ ವಿಷಯದ ಕುರಿತು, ಎಲ್ಲಾ ಕಡೆಯವರು ಶಾಂತವಾಗಿರುವುದು ಮತ್ತು ಸಂಯಮದಿಂದ ವರ್ತಿಸುವುದು, ಪರಿಸ್ಥಿತಿಯ ಗಂಭೀರತೆಯನ್ನು ತಗ್ಗಿಸುವುದು ಮತ್ತು ರಾಜಕೀಯ ಇತ್ಯರ್ಥವನ್ನು ಉತ್ತೇಜಿಸುವುದು ಈಗ ಸಮಯೋಚಿತ ಕಾರ್ಯವಾಗಿದೆ" ಎಂದು ಅವರು ಹೇಳಿದರು.

                1991 ರಲ್ಲಿ ಸೋವಿಯತ್ ಒಕ್ಕೂಟದಿಂದ ಸ್ವತಂತ್ರವಾದ ಉಕ್ರೇನ್ ಈಗ ಪರಮಾಣು ಶಕ್ತಿಯ ಮೇಲೆ ಹೆಚ್ಚು ಅವಲಂಬಿತವಾಗಿದೆ. ನಾಲ್ಕು ಕಡೆಗಳಲ್ಲಿ 15 ಕಾರ್ಯನಿರ್ವಹಿಸುವ ರಿಯಾಕ್ಟರ್‌ಗಳು ಉಕ್ರೇನ್ ನಲ್ಲಿದ್ದು ಈ ಪೈಕಿ ಅದರ ಅರ್ಧದಷ್ಟು ವಿದ್ಯುತ್ ರಿಯಾಕ್ಟರ್ ಗಳಿಂದ ವಿದ್ಯುತ್ ಉತ್ಪಾದನೆಯಾಗುತ್ತಿದೆ.  ಇದೇ ಚೆರ್ನೋಬಿಲ್ ಅಣುಸ್ಥಾವರದಲ್ಲಿ 1986 ರಲ್ಲಿ ಮಾರಣಾಂತಿಕ ಮತ್ತು ಪರಿಸರಕ್ಕೆ ಹಾನಿಕಾರಕ ರಿಯಾಕ್ಟರ್ ದುರಂತ ಸಂಭವಿಸಿತ್ತು. ಇದೀಗ ಇದೇ ಚೆರ್ನೋಬಿಲ್ ಪರಮಾಣು ವಿದ್ಯುತ್ ಸ್ಥಾವರವನ್ನು ರಷ್ಯಾದ ಸಶಸ್ತ್ರ ಪಡೆಗಳು ಕಳೆದ ಗುರುವಾರ ವಶಪಡಿಸಿಕೊಂಡಾಗಿನಿಂದ ಈ ಪರಮಾಣು ಸೌಲಭ್ಯಗಳ ಸುರಕ್ಷತೆಯ ಬಗ್ಗೆ ಕಳವಳಗಳು ತೀವ್ರಗೊಳ್ಳುತ್ತಿವೆ.

                                      ವರದಿ ಅಲ್ಲ ಗಳೆದ ಚೀನಾ
              ಬೀಜಿಂಗ್ ವಿಂಟರ್ ಒಲಿಂಪಿಕ್ಸ್‌ನ ನಂತರ ಉಕ್ರೇನ್‌ ಮೇಲೆ ಆಕ್ರಮಣ ಮಾಡುವುದನ್ನು ವಿಳಂಬ ಮಾಡುವಂತೆ ರಷ್ಯಾವನ್ನು ಚೀನಾ ಕೇಳಿಕೊಂಡಿತ್ತು ಎಂಬ ವರದಿಯನ್ನು ಚೀನಾ ಗುರುವಾರ ಅಲ್ಲಗಳೆದಿದೆ. ಅದು "ನಕಲಿ ಸುದ್ದಿ" ಮತ್ತು ಸಂಘರ್ಷದ ಬಗ್ಗೆ ಗಮನವನ್ನು ಬೇರೆಡೆಗೆ ತಿರುಗಿಸುವ ಮತ್ತು ಆಪಾದನೆಯನ್ನು ಬದಲಾಯಿಸುವ "ಅತ್ಯಂತ ಹೇಯ" ಪ್ರಯತ್ನವಾಗಿದೆ ಎಂದು ಟೀಕಿಸಿದೆ. ಉಕ್ರೇನ್‌ಗೆ NATO ಸದಸ್ಯತ್ವವನ್ನು ತಳ್ಳಿಹಾಕದೆ ವಾಷಿಂಗ್ಟನ್ ಯುದ್ಧವನ್ನು ಪ್ರಚೋದಿಸಿತು ಎಂಬ ಚೀನಾದ ಆರೋಪಗಳನ್ನು ವಿದೇಶಾಂಗ ಸಚಿವಾಲಯದ ವಕ್ತಾರ ವಾಂಗ್ ವೆನ್‌ಬಿನ್ ಪುನರಾವರ್ತಿಸಿದರು.