ಕೆ ರೈಲ್ ಕೇರಳವನ್ನು ಎರಡು ವಿಭಾಗ ಮಾಡುತ್ತದೆ; ಬಿಜೆಪಿಯಿಂದ ಮುಷ್ಕರಕ್ಕೆ ಸಿದ್ಧತೆ: ಮುಷ್ಕರ ಸಮಿತಿ ಅಧ್ಯಕ್ಷರಾಗಿ ಮೆಟ್ರೋಮ್ಯಾನ್ ಇಶ್ರೀಧರನ್ ಆಯ್ಕೆ

                                                 

                     ಕೊಚ್ಚಿ: ಕೇರಳವನ್ನು ಎರಡು ವಿಭಾಗ ಮಾಡುವ ಕೆ ರೈಲು ಯೋಜನೆ ವಿರೋಧಿಸಿ ಬಿಜೆಪಿ ಧರಣಿ ನಡೆಸಲಿದೆ. ಮೆಟ್ರೋಮ್ಯಾನ್ ಇ.ಶ್ರೀಧರನ್ ಅವರ ಅಧ್ಯಕ್ಷತೆಯಲ್ಲಿ ಮುಷ್ಕರ ಸಮಿತಿಯನ್ನು ರಚಿಸಲಾಗಿದೆ. ಈ ಬಗ್ಗೆ ನಿನ್ನೆ ನಡೆದ ಸಭೆಯನ್ನು ಶ್ರೀಧರನ್ ಉದ್ಘಾಟಿಸಿದರು.

                      ಕೇರಳದ ಹೆಮ್ಮೆಯ ಯೋಜನೆ ಎಂದು ರಾಜ್ಯ ಸರ್ಕಾರ ಎತ್ತಿ ಹಿಡಿಯುತ್ತಿರುವ ಕೆ ರೈಲು ಯೋಜನೆ ಪರಿಸರ ವಿಕೋಪಕ್ಕೆ ಕಾರಣವಾಗಲಿದೆ ಎಂದರು. ಯೋಜನೆಗೆ ಸಂಬಂಧಿಸಿದಂತೆ ಭೂ ಸಮೀಕ್ಷೆ ನಡೆಸಿಲ್ಲ. ಕೇರಳವನ್ನು ಎರಡು ವಿಭಾಗ ಮಾಡುವ ಎಂಟು ಅಡಿ ಎತ್ತರದ ಗೋಡೆಯನ್ನು ನಿರ್ಮಿಸಬೇಕಾಗುತ್ತದೆ ಮತ್ತು ಇದು ನೈಸರ್ಗಿಕ ನೀರಿನ ಹರಿವನ್ನು ತಡೆಯುತ್ತದೆ ಮತ್ತು ಪ್ರವಾಹದ ಅಪಾಯವನ್ನು ಹೆಚ್ಚಿಸುತ್ತದೆ ಎಂದು ಅವರು ಸೂಚಿಸಿದರು. ಗೋಡೆಯ ಮೇಲೆ ತಂತಿ ಬೇಲಿ ಅಗತ್ಯವಿದೆ. ಕಿಲೋಮೀಟರ್ ಗೋಡೆ ನಿರ್ಮಿಸಲು 8 ಕೋಟಿ ರೂ. ಬೇಕಾಗುತ್ತದೆ. ಇದನ್ನು ಡಿಪಿಆರ್‍ನಲ್ಲಿ ನಿರ್ದಿಷ್ಟಪಡಿಸಲಾಗಿಲ್ಲ. ಯೋಜನೆಗೆ ಅಗತ್ಯವಿರುವ ಮೇಲ್ಸೇತುವೆಗಳು ಮತ್ತು ಸುರಂಗಮಾರ್ಗಗಳ ನಿರ್ಮಾಣ ವೆಚ್ಚವನ್ನು ಡಿಪಿಆರ್‍ನಲ್ಲಿ ದಾಖಲಿಸಲಾಗಿಲ್ಲ ಎಂದು ಅವರು ಬೊಟ್ಟುಮಾಡಿದರು. ಪರಿಸರ ಪರಿಣಾಮ ಅಧ್ಯಯನ ನಡೆಸದಿರುವುದು ಗಂಭೀರ ಲೋಪ ಎಂದು ಟೀಕಿಸಿದರು.

                ಮುಖ್ಯಮಂತ್ರಿಗಳೇಕೆ ಜನರನ್ನು ದಿಕ್ಕು ತಪ್ಪಿಸುತ್ತಿದ್ದಾರೆ? ಎಂದು ಶ್ರೀಧರನ್ ಕೇಳಿದರು. ಸರ್ಕಾರ ವಾಸ್ತವಾಂಶಗಳನ್ನು ಮರೆಮಾಚಿ ವೆಚ್ಚ ಕಡಿಮೆ ಮಾಡುತ್ತಿರುವುದು ಏಕೆ ಎಂದು ಪ್ರಶ್ನಿಸಿದರು. ಯೋಜನೆ ಜಾರಿಯಾದರೆ ಕೇರಳ ಇಬ್ಭಾಗವಾಗುವುದಿಲ್ಲ ಎಂಬ ಮುಖ್ಯಮಂತ್ರಿ ಹೇಳಿಕೆ ತಪ್ಪು. ಈ ಯೋಜನೆಯು ಪರಿಸರದ ಮೇಲೆ ಪರಿಣಾಮ ಬೀರುತ್ತದೆ ಎಂದು ಅವರು ಹೇಳಿದರು. ಇದಕ್ಕೆ 16,000 ಕೋಟಿ ರೂ.ಬೇಕಾಗುತ್ತದೆ. ಇದು ಪೂರ್ವ ಅಂದಾಜಿನಲ್ಲಿಲ್ಲ.

              ಸರ್ಕಾರ ಭೂ ಸಮೀಕ್ಷೆ ನಡೆಸಿಲ್ಲ. 20 ಸಾವಿರಕ್ಕೂ ಹೆಚ್ಚು ಜನರ ಒತ್ತುವರಿ ತೆರವಿಗೆ ಬೇಕಾಗಿರುವ ವೆಚ್ಚ ಹಾಗೂ ಜಮೀನಿನ ವಿವರಗಳನ್ನು ಡಿಪಿಆರ್ ನಲ್ಲಿ ನೀಡಿಲ್ಲ ಎಂದರು.

              ಜನರಿಗೆ ಬೇಕಾಗಿದ್ದ ಹಲವು ಯೋಜನೆಗಳು ಸ್ಥಗಿತಗೊಂಡಿವೆ. ಕೆ ರೈಲು ಯೋಜನೆ ಜನರಿಗಾಗಿ ಅಲ್ಲ ಎಂದು ಆರೋಪಿಸಿದರು. ಇದರ ಹಿಂದೆ ಇನ್ನೂ ಹಲವು ಗುರಿಗಳಿವೆ. ಜನರ ಹಿತದೃಷ್ಟಿಯಿಂದ ಮೊದಲು ನಿಲಂಬೂರು-ನಂಜನಗೂಡು ರೈಲ್ವೆ ಯೋಜನೆ ಜಾರಿಯಾಗಬೇಕು ಎಂದರು. ಅದನ್ನು ಸ್ಥಗಿತಗೊಳಿಸಲಾಗಿದೆ. ಅದೇ ರೀತಿ ತಿರುವನಂತಪುರ ಲೈಟ್ ಮೆಟ್ರೋ, ಕೋಝಿಕ್ಕೋಡ್ ಲೈಟ್ ಮೆಟ್ರೋದಂತಹ ಜನರಿಗೆ ಅನುಕೂಲವಾಗುವ ಯೋಜನೆಗಳನ್ನು ಮೊದಲು ಜಾರಿಗೊಳಿಸಬೇಕು ಎಂದು ಶ್ರೀಧರನ್ ಅಭಿಪ್ರಾಯಪಟ್ಟಿದ್ದಾರೆ.