143 ವಸ್ತುಗಳ ಬೆಲೆ ಹೆಚ್ಚಿಸುವ ಕುರಿತು ರಾಜ್ಯಗಳ ಅಭಿಪ್ರಾಯ ಕೇಳಿದ ಜಿಎಸ್‌ಟಿ ಕೌನ್ಸಿಲ್

              ನವದೆಹಲಿ :ದೇಶದ ಆದಾಯವನ್ನು ಹೆಚ್ಚಿಸಲು ಜಿಎಸ್‌ಟಿ ಕೌನ್ಸಿಲ್ 143 ವಸ್ತುಗಳ ಮೇಲಿನ ದರಗಳನ್ನು ಹೆಚ್ಚಿಸುವ ಬಗ್ಗೆ ರಾಜ್ಯ ಸರ್ಕಾರಗಳ ಅಭಿಪ್ರಾಯಗಳನ್ನು ಕೇಳಿದೆ ಎಂದು Indianexpress.com ವರದಿ ಮಾಡಿದೆ.

            ಹಪ್ಪಳ, ಬೆಲ್ಲ, ಪವರ್ ಬ್ಯಾಂಕ್‌, ಕೈಗಡಿಯಾರ, ಸೂಟ್‌ಕೇಸ್‌, ಕೈಚೀಲ, ಸುಗಂಧ ದ್ರವ್ಯ/ಡಿಯೋಡರೆಂಟ್‌, ಟಿವಿ ಸೆಟ್‌, ಚಾಕೊಲೇಟ್‌, ಚೂಯಿಂಗ್ ಗಮ್‌, ವಾಲ್‌ನಟ್ಸ್, ಕಸ್ಟರ್ಡ್ ಪೌಡರ್, ಆಲ್ಕೊಹಾಲ್ ಮುಕ್ತ ಪಾನೀಯ, ಸೆರಾಮಿಕ್ ಸಿಂಕ್‌, ವಾಶ್ ಬೇಸಿನ್‌, ಕನ್ನಡಕ, ಕನ್ನಡಕ/ಗಾಗಲ್ಸ್‌ ಫ್ರೇಮ್ ಗಳು, ಚರ್ಮದ ಉಡುಪುಗಳು ಮತ್ತು ಬಟ್ಟೆ ಬಿಡಿಭಾಗಗಳು ಸೇರಿದಂತೆ 143 ವಸ್ತುಗಳ ಪಟ್ಟಿಯನ್ನು ರಾಜ್ಯ ಸರ್ಕಾರಗಳಿಗೆ ಕಳುಹಿಸಲಾಗಿದೆ.

             ಈ 143 ವಸ್ತುಗಳ ಪೈಕಿ ಶೇ 92ರಷ್ಟರ ತೆರಿಗೆಯನ್ನು ಶೇ 18ರಿಂದ ಶೇ 28 ರಷ್ಟು ಏರಿಸಲು ಪ್ರಸ್ತಾಪಿಸಲಾಗಿದೆ. ಈ ಪ್ರಸ್ತಾವಿತ ದರ ಬದಲಾವಣೆಗಳಲ್ಲಿ ಹೆಚ್ಚಿನವು 2019 ರ ಸಾರ್ವತ್ರಿಕ ಚುನಾವಣೆಗಿಂತ ಮುಂಚೆ, ನವೆಂಬರ್ 2017 ಮತ್ತು ಡಿಸೆಂಬರ್ 2018 ರಲ್ಲಿ ಕೌನ್ಸಿಲ್ ತೆಗೆದುಕೊಂಡ ದರ ಕಡಿತದ ನಿರ್ಧಾರಗಳ ಬಗ್ಗೆ ಸೂಚಿಸುತ್ತವೆ.

             ನವೆಂಬರ್ 2017 ರ ಗುವಾಹಟಿಯಲ್ಲಿ ನಡೆದ ಸಭೆಯಲ್ಲಿ ಸುಗಂಧ ದ್ರವ್ಯಗಳು, ಚರ್ಮದ ಉಡುಪುಗಳು ಮತ್ತು ಪರಿಕರಗಳು, ಚಾಕೊಲೇಟ್‌ಗಳು, ಕೋಕೋ ಪೌಡರ್, ಸೌಂದರ್ಯ ಅಥವಾ ಮೇಕಪ್ ಸಿದ್ಧತೆಗಳು, ಪಟಾಕಿಗಳು, ಪ್ಲಾಸ್ಟಿಕ್‌ಗಳ ನೆಲದ ಹೊದಿಕೆಗಳು, ದೀಪಗಳು, ಧ್ವನಿ ರೆಕಾರ್ಡಿಂಗ್ ಉಪಕರಣಗಳು ಮತ್ತು ಶಸ್ತ್ರಸಜ್ಜಿತ ಟ್ಯಾಂಕ್‌ ಗಳಂತಹ ವಸ್ತುಗಳ ದರಗಳನ್ನು ಕಡಿಮೆ ಮಾಡಲಾಗಿತ್ತು. ಆದರೆ, ಈಗ ಮತ್ತೊಮ್ಮೆ ದರ ಹೆಚ್ಚಳ ಮಾಡಲು ಪ್ರಸ್ತಾಪಿಸಲಾಗಿದೆ.