'ಹುರಿ ಮೀಸೆ' ಬಿಟ್ಟಿದ್ದಕ್ಕೆ ವ್ಯಕ್ತಿಗೆ ಥಳಿತ!

     ಇಂದೋರ್: ಮಧ್ಯಪ್ರದೇಶದ ಇಂದೋರ್‌ನಲ್ಲಿ ಹುರಿ ಮೀಸೆಯನ್ನು ಬಿಟ್ಟಿದ್ದಕ್ಕೆ 30 ವರ್ಷದ ವ್ಯಕ್ತಿಯನ್ನು ನಿಂದಿಸಿ, ಥಳಿಸಲಾಗಿದೆ ಎಂದು ಪೊಲೀಸರು ತಿಳಿಸಿದ್ದಾರೆ.

     ಈ ಘಟನೆಗೆ ಸಂಬಂಧಿಸಿದಂತೆ ರವಿ ತಿರೋಡಿಯಾ ಮಲ್ಹಾರಗಂಜ್ ಪೊಲೀಸ್ ಠಾಣೆಯಲ್ಲಿ ದೂರು ದಾಖಲಿಸಿದ್ದಾರೆ ಎಂದು ಪೊಲೀಸ್ ಅಧಿಕಾರಿಯೊಬ್ಬರು ತಿಳಿಸಿದ್ದಾರೆ.

     ಪ್ರಕರಣದ ಆರೋಪಿಗಳಾದ ಬಂಟಿ ಗೋಧಾ, ಆತನ ಸಹೋದರ ನವೀನ್ ಗೋಧಾ ಮತ್ತು ಸಹಚರ ತಾರಾಚಂದ್ ಅಲಿಯಾಸ್ ಬಾಮ್ ಅವರು ತಿರೋಡಿಯಾ ಅವರ ಮೀಸೆಯ ಬಗ್ಗೆ ಆಕ್ರೋಶ ವ್ಯಕ್ತಪಡಿಸಿದ್ದು ಅವಾಚ್ಯ ಶಬ್ದಗಳಿಂದ ನಿಂದಿಸಿದ್ದಾರೆ ಎಂದು ದೂರನ್ನು ಉಲ್ಲೇಖಿಸಿ ಪೊಲೀಸರು ತಿಳಿಸಿದ್ದಾರೆ.

     ಇದನ್ನು ವಿರೋಧಿಸಿದ್ದಕ್ಕೆ ತಿರೋಡಿಯಾ ಮೇಲೆ ಆರೋಪಿಗಳಲ್ಲಿ ಒಬ್ಬನು ಕೋಲಿನಿಂದ ಥಳಿಸಿದನು ಎಂದು ಅವರು ಹೇಳಿದರು.

       ಈ ಬಗ್ಗೆ ಪೊಲೀಸರು ಕೂಲಂಕುಷವಾಗಿ ತನಿಖೆ ನಡೆಸುತ್ತಿದ್ದು, ಇದುವರೆಗೂ ಆರೋಪಿಗಳನ್ನು ಬಂಧಿಸಿಲ್ಲ ಎಂದು ತಿಳಿಸಿದರು.