ಸಂಬಳದ ಬಗ್ಗೆ ಆಕ್ಷೇಪಾರ್ಹ ಭಾಷೆ ಬಳಸಿದ ಇಂಡಿಗೋ ವಿಮಾನದ ಏಳು ಪೈಲಟ್‌ಗಳು: ಡಿಜಿಸಿಎನಿಂದ ತನಿಖೆ

             ನವದೆಹಲಿ: ತುರ್ತು ಸಂವಹನಕ್ಕಾಗಿ ಬಳಸಲಾಗುವ ಆವರ್ತನದಲ್ಲಿ ಇಂಡಿಗೋ ಪೈಲಟ್‌ಗಳು ಸಂಬಳದ ಬಗ್ಗೆ ಆಕ್ಷೇಪಾರ್ಹ ಭಾಷೆಯನ್ನು ಬಳಸುತ್ತಿರುವುದು ಕಂಡುಬಂದಿದ್ದು, ನಾಗರಿಕ ವಿಮಾನಯಾನ ಮಹಾನಿರ್ದೇಶನಾಲಯ(ಡಿಜಿಸಿಎ) ತನಿಖೆ ಪ್ರಾರಂಭಿಸಿದೆ.

                  ಕನಿಷ್ಠ ಏಳು ಇಂಡಿಗೋ ಪೈಲಟ್‌ಗಳು ಸಂಬಳದ ವಿಚಾರದಲ್ಲಿ ಏಪ್ರಿಲ್ 9 ರಂದು 121.5 MHz ಆವರ್ತನದಲ್ಲಿ ಆಕ್ಷೇಪಾರ್ಹ ಭಾಷೆಯನ್ನು ಬಳಸುವ ಮೂಲಕ ಕಡಿಮೆ ಸಂಬಳದ ಬಗ್ಗೆ ತಮ್ಮ ಆಕ್ರೋಶ ಹೊರಹಾಕಿರುವುದು ಗೊತ್ತಾಗಿದೆ. ಈ ಏಳು ಇಂಡಿಗೋ ಪೈಲಟ್‌ಗಳ ವಿರುದ್ಧದ ಕ್ರಮದ ಬಗ್ಗೆ ಡಿಜಿಸಿಎ ಇನ್ನೂ ಯಾವುದೇ ಹೇಳಿಕೆ ನೀಡಿಲ್ಲ. ಆದರೆ ಪ್ರಕರಣದ ಬಗ್ಗೆ ತನಿಖೆ ಆರಂಭಿಸಿದೆ.

            ಈ ಹಿಂದೆ, ಇಂಡಿಗೋ ಕೋವಿಡ್ ಸಾಂಕ್ರಾಮಿಕ ಸಮಯದಲ್ಲಿ ವೇತನ ಕಡಿತದ ವಿರುದ್ಧ ಏಪ್ರಿಲ್ 5 ರಂದು ಮುಷ್ಕರ ನಡೆಸಲು ಯೋಜಿಸುತ್ತಿದ್ದ ಕೆಲವು ಪೈಲಟ್‌ಗಳನ್ನು ಅಮಾನತುಗೊಳಿಸಿತ್ತು. ಕೋವಿಡ್ ಸಾಂಕ್ರಾಮಿಕ ಸಮಯದಲ್ಲಿ ಏರ್‌ಲೈನ್ ತನ್ನ ಪೈಲಟ್‌ಗಳ ಸಂಬಳವನ್ನು ಶೇಕಡಾ 30 ರಷ್ಟು ಕಡಿತಗೊಳಿಸಿತ್ತು.

             ಆದಾಗ್ಯೂ, ಸೋಂಕುಗಳು ಕ್ರಮೇಣ ಇಳಿಕೆ ಮತ್ತು ಅಂತರಾಷ್ಟ್ರೀಯ ಪ್ರಯಾಣದ ಪುನರಾರಂಭದೊಂದಿಗೆ, ಅನೇಕ ವಿಮಾನಯಾನ ಸಂಸ್ಥೆಗಳು ಪೂರ್ವ-ಸಾಂಕ್ರಾಮಿಕ ವೇತನಗಳನ್ನು ಕ್ರಮೇಣವಾಗಿ ಮರುಸ್ಥಾಪಿಸಲು ಪ್ರಾರಂಭಿಸಿವೆ. ಇಂಡಿಗೋ ಪೈಲಟ್‌ಗಳ ವೇತನವನ್ನುಶೇ. 8 ರಷ್ಟು ಹೆಚ್ಚಿಸುವ ನಿರ್ಧಾರವನ್ನು ಈ ಹಿಂದೆ ಪ್ರಕಟಿಸಿತ್ತು, ಯಾವುದೇ ಅಡೆತಡೆಗಳಿಲ್ಲದಿದ್ದಲ್ಲಿ ನವೆಂಬರ್‌ನಲ್ಲಿ ಮತ್ತೆ ಶೇ. 6.5 ರಷ್ಟು ವೇತನ ಹೆಚ್ಚಳ ಮಾಡುವುದಾಗಿ ಹೇಳಿದೆ.

             ಏಪ್ರಿಲ್ 9 ರಂದು, ಈ ಪೈಲಟ್‌ಗಳು 121.5 MHz ಆವರ್ತನದಲ್ಲಿ ಆಕ್ಷೇಪಾರ್ಹ ಭಾಷೆಯನ್ನು ಬಳಸುವ ಮೂಲಕ ಕಡಿಮೆ ಸಂಬಳದ ಬಗ್ಗೆ ತಮ್ಮ ಕೋಪವನ್ನು ಹೊರಹಾಕುತ್ತಿದ್ದರು.