ಸೇತುವೆ ಕೆಳಗೆ ಸಿಲುಕಿಕೊಂಡ ಬೃಹತ್​ ಕಂಟೈನರ್​ ಟ್ರಕ್​: ಚಾಲಕ ಕೊಟ್ಟ ಕಾರಣವಿದು.

            ಮುಂಬೈ: ಕಂಟೈನರ್​ ಟ್ರಕ್​ ಒಂದು ಸೇತುವೆ ಕೆಳಗಡೆ ಸಿಲುಕಿದ ವಿರಳಾತಿ ವಿರಳ ಘಟನೆ ಮುಂಬೈನ ಕಿಂಗ್​ ಸರ್ಕಲ್​​ ರೈಲ್ವೆ ಸೇತುವೆಯಲ್ಲಿ ನಡೆದಿದೆ.

           ಈ ಘಟನೆ ಮಂಗಳವಾರ ತಡರಾತ್ರಿ 2 ಗಂಟೆ ಸುಮಾರಿಗೆ ನಡೆಸಿದ್ದು, ತಕ್ಷಣ ಅಗ್ನಿಶಾಮಕ ಸಿಬ್ಬಂದಿ ಸ್ಥಳಕ್ಕೆ ಆಗಮಿಸಿ ನಸುಕಿನ ಜಾವ 4 ಗಂಟೆ ಸುಮಾರಿಗೆ ಸೇತುವೆ ಅಡಿ ಸಿಲುಕಿದ್ದ ಕಂಟೈನರ್​ ಟ್ರಕ್​ ಅನ್ನು ತೆರವುಗೊಳಿಸಲಾಗಿದೆ.

             ಟ್ರಕ್​ ಚಾಲನನ್ನು ಪೊಲೀಸರು ವಶಕ್ಕೆ ಪಡೆದಿದ್ದು, ವಿಚಾರಣೆಗೆಂದು ಮಾತುಂಗ ಪೊಲೀಸ್​ ಠಾಣೆಗೆ ಕರೆದೊಯ್ಯಲಾಗಿದೆ. ಚಾಲಕನಿಗೆ ಸೇತುವೆಯ ಎತ್ತರದ ಬಗ್ಗೆ ತಿಳಿಯದೇ ವಾಹನ ಚಲಾಯಿಸಿದ್ದರಿಂದ ಸೇತುವೆ ಅಡಿಗೆ ಸಿಲುಕಿರುವುದಾಗಿ ತಿಳಿದುಬಂದಿದೆ.

           ಈ ಬಗ್ಗೆ ಮಾತನಾಡಿರುವ ಟ್ರಕ್​ ಚಾಲಕ ಕಿಶನ್​, ಟ್ರಕ್​ ದೆಹಲಿಯಿಂದ ಬರುತ್ತಿತ್ತು. ನಾನು ಇದೇ ಮೊದಲ ಬಾರಿಗೆ ಈ ರಸ್ತೆಯಲ್ಲಿ ಚಾಲನೆ ಮಾಡುತ್ತಿದ್ದೆ, ಆದ್ದರಿಂದ ಸೇತುವೆಯ ಎತ್ತರವನ್ನು ತಕ್ಷಣಕ್ಕೆ ತಿಳಿಯಲು ಆಗಲಿಲ್ಲ ಎಂದು ಹೇಳಿದ್ದಾನೆ.

             ಘಟನೆಗೆ ಸಂಬಂಧಿಸಿದ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್​ ಆಗಿದೆ. ಸೇತುವೆ ಕೆಳಗೆ ನುಗ್ಗಿದ ಟ್ರಕ್​ ಅಲ್ಲಿಯೇ ಸಿಲುಕಿದ್ದು, ಕಂಟೈನರ್​ ಜಖಂ ಆಗಿರುವುದನ್ನು ಫೋಟೋದಲ್ಲಿ ಕಾಣಬಹುದಾಗಿದೆ. ಇನ್ನು ಕಿಂಗ್ಸ್ ಸರ್ಕಲ್ ಸೇತುವೆಯ ಕೆಳಗೆ ಟ್ರಕ್ ಸಿಲುಕಿಕೊಂಡಿರುವುದು ಇದೇ ಮೊದಲಲ್ಲ. ಈ ಹಿಂದೆಯು ಇಂತಹ ಘಟನೆ ನಡೆದಿದೆ.

             ಕಿಂಗ್ಸ್ ಸರ್ಕಲ್ ರೈಲ್ವೆ ಸೇತುವೆಯನ್ನು ಸಿಯಾನ್ ಆಸ್ಪತ್ರೆಯಿಂದ ಮಾತುಂಗಾ ಮತ್ತು ದಾದರ್‌ಗೆ ಹೋಗುವ ರಸ್ತೆಯಲ್ಲಿ ನಿರ್ಮಿಸಲಾಗಿದೆ. ಕೆಲವು ಟ್ರಕ್ ಅಥವಾ ದೊಡ್ಡ ಕಂಟೈನರ್ ಸಿಕ್ಕಿಹಾಕಿಕೊಳ್ಳುವುದು ಬಹುತೇಕ ಪ್ರತಿ ವರ್ಷವು ವರದಿಯಾಗುತ್ತಿರುತ್ತದೆ.