ಜಾಮೀನು ಇಲ್ಲ; ಪಿಸಿ ಜಾರ್ಜ್ ಗೆ ರಿಮಾಂಡ್; ಪೂಜಾಪುರಕ್ಕೆ ಸ್ಥಳಾಂತರ

                ತಿರುವನಂತಪುರ: ಧರ್ಮ ವಿರೋಧಿ ಭಾಷಣ ಪ್ರಕರಣದಲ್ಲಿ ಪಿಸಿ ಜಾರ್ಜ್‍ಗೆ ರಿಮಾಂಡ್ ನೀಡಲಾಗಿದೆ. ನ್ಯಾಯಾಂಗ ಪ್ರಥಮ ದರ್ಜೆ ಮ್ಯಾಜಿಸ್ಟ್ರೇಟ್ ನ್ಯಾಯಾಲಯ ಈ ಆದೇಶ ಹೊರಡಿಸಿದೆ. ಪಿಸಿ ಜಾರ್ಜ್ ಅವರನ್ನು 14 ದಿನಗಳ ಕಾಲ ಕಸ್ಟಡಿಗೆ ನೀಡಲಾಗಿದೆ. ವಿಚಾರಣೆ ವೇಳೆ ಪಿಸಿ ಜಾರ್ಜ್ ಅವರನ್ನು ಪೂಜಾಪುರ ಕೇಂದ್ರ ಕಾರಾಗೃಹಕ್ಕೆ ಸ್ಥಳಾಂತರಿಸಲಾಗುವುದು.

               ಇದಕ್ಕೂ ಮುನ್ನ ಜಾಮೀನು ಷರತ್ತುಗಳನ್ನು ಉಲ್ಲಂಘಿಸಿದ್ದಕ್ಕಾಗಿ ನ್ಯಾಯಾಲಯ ಅವರ ಜಾಮೀನನ್ನು ರದ್ದುಗೊಳಿಸಿತ್ತು. ಬಳಿಕ ಪಿಸಿ ಜಾರ್ಜ್ ಅವರನ್ನು ಪೆÇಲೀಸರು ಮತ್ತೆ ಬಂಧಿಸಿದ್ದರು. ನಂತರ ಜಾರ್ಜ್ ತಿರುವನಂತಪುರ ಎಆರ್ ಕ್ಯಾಂಪ್ ನಲ್ಲಿ ತಂಗಿದ್ದರು. ವೈದ್ಯಕೀಯ ಪರೀಕ್ಷೆಯ ನಂತರ ಜಾರ್ಜ್ ಅವರನ್ನು ಇಂದು ಬೆಳಿಗ್ಗೆ ನ್ಯಾಯಾಲಯಕ್ಕೆ ಕರೆದೊಯ್ಯಲಾಯಿತು.

                  ಜಾರ್ಜ್ ಅವರನ್ನು ಬೆಳಗ್ಗೆ 7:30ಕ್ಕೆ ಮ್ಯಾಜಿಸ್ಟ್ರೇಟ್ ಚೇಂಬರ್ ಎದುರು ಹಾಜರುಪಡಿಸಲಾಯಿತು. ನಂತರ ಅವರು ಆರೋಗ್ಯ ಸಮಸ್ಯೆಗಳನ್ನು ಉಲ್ಲೇಖಿಸಿ ಜಾಮೀನು ಕೋರಿದರು ಆದರೆ ನ್ಯಾಯಾಲಯವು ಮಂಜೂರು ಮಾಡಲಿಲ್ಲ. ಈ ಹಿಂದೆ ಜಾಮೀನು ಷರತ್ತುಗಳನ್ನು ಉಲ್ಲಂಘಿಸಿದ್ದರಿಂದ ಜಾಮೀನು ನೀಡಲು ನಿರಾಕರಿಸಲಾಗಿದೆ.