ಷವರ್ಮಾ ತಯಾರಿಕೆಯ ಕಳಪೆ ಗುಣಮಟ್ಟ; ರಾಜ್ಯದಲ್ಲಿ ಏಕೀಕೃತ ಮಾನದಂಡ ತರಲಾಗುವುದು: ಸಚಿವೆ ವೀಣಾ ಜಾರ್ಜ್

                   ಪತ್ತನಂತಿಟ್ಟ: ರಾಜ್ಯದಲ್ಲಿ ಷವರ್ಮಾ ತಯಾರಿಕೆಯ ಗುಣಮಟ್ಟವಿಲ್ಲದಿರುವುದನ್ನು ಹೋಗಲಾಡಿಸಲು ಏಕೀಕೃತ ಮಾನದಂಡವನ್ನು ಜಾರಿಗೆ ತರಲಾಗುವುದು ಎಂದು ಆರೋಗ್ಯ ಸಚಿವೆ ವೀಣಾ ಜಾರ್ಜ್ ಹೇಳಿದ್ದಾರೆ. ಷವರ್ಮಾ ತಯಾರಿಸುವ ಖಾದ್ಯಗಳು  ಚೆನ್ನಾಗಿ ಬೇಯುವಂತೆ ನೋಡಿಕೊಳ್ಳಬೇಕು ಎಂದು ಸಚಿವರು ಹೇಳಿದರು.

                  ಕಾಸರಗೋಡಲ್ಲಿ ಷವರ್ಮಾ ಮೂಲಕ ಆಹಾರ ವಿಷವಾಗಿ ಬಾಲಕಿ ಸಾವನ್ನಪ್ಪಿದ್ದು, ಹಲವರು ಆಸ್ಪತ್ರೆಯಲ್ಲಿ ಚಿಕಿತ್ಸೆ ಪಡೆಯುತ್ತಿದ್ದಾರೆ. ಈ ಹಿನ್ನೆಲೆಯಲ್ಲಿ ಪರೀಕ್ಷೆಗಳು ಮತ್ತು ಕಾರ್ಯವಿಧಾನಗಳನ್ನು ಬಿಗಿಗೊಳಿಸಲಾಯಿತು.

             ಷವರ್ಮಾ ತಯಾರಿಕೆಯಲ್ಲಿ ಗುಣಮಟ್ಟವನ್ನು ಖಚಿತಪಡಿಸಿಕೊಳ್ಳಲು ರಾಜ್ಯ ಮಟ್ಟದಲ್ಲಿ ಮಾನದಂಡಗಳನ್ನು ತರಲಾಗುವುದು ಎಂದು ಸಚಿವರು ಹೇಳಿದರು. ಈ ಬಗ್ಗೆ ಈಗಾಗಲೇ ಸೂಚನೆ ನೀಡಲಾಗಿದೆ. ಪಾಶ್ಚರೀಕರಿಸದ ಮೊಟ್ಟೆಗಳನ್ನು ಸಾಮಾನ್ಯವಾಗಿ ಬಳಸಲಾಗುತ್ತದೆ. ಮಾಂಸವನ್ನು ಸಾಕಷ್ಟು ಬೇಯಿಸಿರುವುದು ಖಚಿತಪಡಿಸಿಕೊಳ್ಳಲು ಆಧುನಿಕ ತಂತ್ರಜ್ಞಾನದ ಯಂತ್ರದ ಅಗತ್ಯವಿದೆ ಎಂದು ಹೇಳಿದರು.

                       ಆಹಾರ ಸುರಕ್ಷತಾ ಇಲಾಖೆ ನಿರ್ದೇಶಕರಿಂದ ವರದಿ ಕೇಳಲಾಗಿದೆ. ಆಸ್ಪತ್ರೆಯಲ್ಲಿ ಮಕ್ಕಳ ಸ್ಥಿತಿ ನಿಯಂತ್ರಣಕ್ಕೆ ಬರುತ್ತಿದೆ. ಮಕ್ಕಳಿಗೆ ಉಚಿತ ಚಿಕಿತ್ಸೆ ನೀಡಲಾಗುವುದು ಎಂದು ಸಚಿವರು ತಿಳಿಸಿದರು.

                 ಘಟನೆ ಹಿನ್ನೆಲೆಯಲ್ಲಿ ಆಹಾರ ಸುರಕ್ಷತಾ ಇಲಾಖೆ ಷವರ್ಮಾ ಅಂಗಡಿಗಳಲ್ಲಿ ತಪಾಸಣೆಯನ್ನು ಬಿಗಿಗೊಳಿಸಿದೆ. ಇದೇ ವೇಳೆ ವಿಪತ್ತು ಸಂಭವಿಸಿದಾಗ ಮಾತ್ರ ಸರ್ಕಾರ ಮತ್ತು ಸಂಬಂಧಿಸಿದ ಇಲಾಖೆಗಳು ಇಂತಹ ಕ್ರಮಕ್ಕೆ ಮುಂದಾಗುತ್ತವೆ ಎಂಬ ಟೀಕೆಯೂ ತೀವ್ರವಾಗಿದೆ.