ಗಾಳಿ ಮಾತ್ರ: ಲೇಸ್ ಪ್ಯಾಕೆಟ್ನಲ್ಲಿ ಕಡಿಮೆ ತೂಕ; ಪೆಪ್ಸಿಗೆ 85,000 ರೂ ದಂಡ ವಿಧಿಸಿದ ರಾಜ್ಯ ಸರ್ಕಾರ

                   ತ್ರಿಶೂರ್: ಆಲೂಗೆಡ್ಡೆ ಚಿಪ್ ಬ್ರ್ಯಾಂಡ್ ಲೇಸ್ ಪ್ಯಾಕೆಟ್ ನಲ್ಲಿ ತೂಕ ಕಡಿಮೆ ಇರುವ ದೂರಿನ ಹಿನ್ನೆಲೆಯಲ್ಲಿ ರಾಜ್ಯ ಸರ್ಕಾರ ಕ್ರಮ ಕೈಗೊಂಡಿದೆ. ಪ್ಯಾಕೆಟ್‍ನಲ್ಲಿ ತೋರಿಸಿದ್ದಕ್ಕಿಂತ ಕಡಿಮೆ ಚಿಪ್ಸ್ ಗಳು ಇದ್ದ ಕಾರಣ ಕ್ರಮ ಕೈಗೊಳ್ಳಲಾಗಿದೆ. ಲೇಸ್ ಬ್ರಾಂಡ್‍ನ ಮಾಲೀಕರಾದ ಪೆಪ್ಸಿಕೋ ಇಂಡಿಯಾ ಹೋಲ್ಡಿಂಗ್ಸ್ ಪ್ರೈವೇಟ್ ಲಿಮಿಟೆಡ್‍ಗೆ ಸರ್ಕಾರ ದಂಡ ವಿಧಿಸಿದೆ. ದಂಡ ಶುಲ್ಕ 85,000 ರೂ. ವಿಧಿಸಲಾಗಿದೆ.

               ತ್ರಿಶೂರ್ ಮೂಲದ ಸಾಮಾಜಿಕ ನ್ಯಾಯ ಸಂರಕ್ಷಣಾ ಕೇಂದ್ರದ ಅಧ್ಯಕ್ಷ ಪಿ.ಡಿ.ಜಯಶಂಕರ್ ಅವರ ದೂರಿನ ಮೇರೆಗೆ ಈ ಕ್ರಮ ಕೈಗೊಳ್ಳಲಾಗಿದೆ. ಒಂದು ಪ್ಯಾಕೆಟ್ ಲೇಸ್ 115 ಗ್ರಾಂ ತೂಗುತ್ತದೆ. ಆದರೆ, ಮೂರು ಪ್ಯಾಕೆಟ್‍ಗಳು ಕೇವಲ 50.930 ಗ್ರಾಂ, 72.730 ಗ್ರಾಂ ಮತ್ತು 86.380 ಗ್ರಾಂ ತೂಕವಿತ್ತು ಎಂದು ದೂರಿನಲ್ಲಿ ತಿಳಿಸಿದ್ದಾರೆ.

                ಪೆಪ್ಸಿ ಕಂಪನಿಗೆ ತ್ರಿಶೂರ್ ಲೀಗಲ್ ಮೆಟ್ರೋಲಜಿ ಫ್ಲೈಯಿಂಗ್ ಸ್ಕ್ವಾಡ್ ನ ಉಪ ನಿಯಂತ್ರಕರು ದಂಡ ವಿಧಿಸಿದ್ದಾರೆ. ತ್ರಿಶೂರ್ ತಾಲೂಕಿನ ಕಂಜನಿಯಲ್ಲಿರುವ ಬಹುಪಯೋಗಿ ಸಹಕಾರಿ ಸಂಸ್ಥೆಯೊಂದರ ಮಾಲೀಕತ್ವದ ಸೂಪರ್ ಮಾರ್ಕೆಟ್ ನಲ್ಲಿ ತಪಾಸಣೆ ನಡೆಸಿದಾಗ ಕಡಿಮೆ ತೂಕದ ಲೇಸ್ ವಶಪಡಿಸಿಕೊಳ್ಳಲಾಗಿದೆ.