ಅಜಾನೂರು ಪಂಚಾಯಿತಿಯಲ್ಲಿ ಧೀರ ಯೋಜನೆ ಆರಂಭ

            ಮುಳ್ಳೇರಿಯ:  ಹೆಣ್ಣುಮಕ್ಕಳಲ್ಲಿ ಆತ್ಮಭದ್ರತೆ, ಆತ್ಮವಿಶ್ವಾಸ ಬೆಳೆಸಲು ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಇಲಾಖೆ ಜಾರಿಗೊಳಿಸಿರುವ 'ಧೀರ' ಯೋಜನೆಗೆ ಅಜಾನೂರು ಪಂಚಾಯಿತಿಯಲ್ಲಿ ಚಾಲನೆ ನೀಡಲಾಗಿದೆ. ಧೀರ ಯೋಜನೆಯು ಮಹಿಳೆಯರಿಗೆ ರಕ್ಷಣಾತ್ಮಕ ತರಬೇತಿಯನ್ನು ಒದಗಿಸುವ ಮತ್ತು ದೌರ್ಜನ್ಯದ ಸಂದರ್ಭದಲ್ಲಿ ಅವರ ಆತ್ಮರಕ್ಷಣೆಯನ್ನು ಖಚಿತಪಡಿಸಿಕೊಳ್ಳಲು ಆತ್ಮವಿಶ್ವಾಸವನ್ನು ಹೆಚ್ಚಿಸುವ ಗುರಿಯನ್ನು ಹೊಂದಿದೆ. ಹತ್ತರಿಂದ ಹದಿನೈದು ವರ್ಷದೊಳಗಿನ ಮೂವತ್ತು  ಬಾಲಕಿಯರನ್ನು ಪಂಚಾಯಿತಿಯಿಂದ ತರಬೇತಿಗೆ ಆಯ್ಕೆ ಮಾಡಿ ಅವರ ಆತ್ಮರಕ್ಷಣೆಯ ತರಬೇತಿಯನ್ನು ಖಚಿತಪಡಿಸಿಕೊಳ್ಳಲಾಗುವುದು. ಅಂಗನವಾಡಿ ಕೇಂದ್ರಿತ ಹದಿಹರೆಯದ ಕ್ಲಬ್‍ಗಳು ಪ್ರಾಥಮಿಕ ತನಿಖೆ ನಡೆಸಿ ಸಿದ್ಧಪಡಿಸಿದ ಪಟ್ಟಿಯಿಂದ ಜಿಲ್ಲಾ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಅಧಿಕಾರಿ ನೇತೃತ್ವದ ಸಮಿತಿಯು ಬಾಲಕಿಯರನ್ನು ತರಬೇತಿಗೆ ಆಯ್ಕೆ ಮಾಡುತ್ತದೆ. ಪೋಷಕರನ್ನು ಕಳೆದುಕೊಂಡವರು, ದೌರ್ಜನ್ಯಕ್ಕೆ ಒಳಗಾದವರು ಮತ್ತು ಅಸುರಕ್ಷಿತ ಸ್ಥಿತಿಯಲ್ಲಿ ಬದುಕುತ್ತಿರುವವರಿಗೆ ಆದ್ಯತೆ ನೀಡಲಾಗುತ್ತದೆ. 

                ತರಬೇತಿ ಅವಧಿಯು ಶನಿವಾರ ಮತ್ತು ಭಾನುವಾರದಂದು ಎರಡು ಗಂಟೆಗಳ ಸತತ ಹತ್ತು ತಿಂಗಳುಗಳ ಕಾಲವಿರುತ್ತದೆ. ಮಾನಸಿಕ ಮತ್ತು ದೈಹಿಕ ಆರೋಗ್ಯವನ್ನು ಸುಧಾರಿಸುವುದು, ಹಿಂಸೆಯ ಬಗ್ಗೆ ಜಾಗೃತಿ ಮೂಡಿಸುವುದು ಮತ್ತು ಸ್ವಯಂ ಸಂರಕ್ಷಣೆಯನ್ನು ಖಚಿತಪಡಿಸಿಕೊಳ್ಳುವುದು ಯೋಜನೆಯ ಮುಖ್ಯ ಉದ್ದೇಶಗಳಾಗಿವೆ. ಸಮರ ಕಲೆಯಾದ ಟೈಕ್ವಾಂಡೋವನ್ನು ಕಲಿಸಲಾಗುತ್ತದೆ. ಸೂಕ್ತ ಸಮವಸ್ತ್ರ ನೀಡಲಾಗುವುದು. ತರಬೇತಿಯ ನಂತರ ಪ್ರತಿ ದಿನ ಮಕ್ಕಳಿಗೆ ಪೌಷ್ಟಿಕ ಆಹಾರ ನೀಡಲಾಗುವುದು. 

              ಯೋಜನೆಯ ಅಜಾನೂರು ಪಂಚಾಯಿತಿ ಮಟ್ಟದ ಉದ್ಘಾಟನೆಯನ್ನು ಪಂಚಾಯಿತಿ ಸಭಾಂಗಣದಲ್ಲಿ ಹೊಸದುರ್ಗ ಸಬ್ ಇನ್ಸ್ ಪೆಕ್ಟರ್ ಕೆ. ರಾಜೀವ್ ನಿರ್ವಹಿಸಿದರು. ಪಂಚಾಯಿತಿ ಅಧ್ಯಕ್ಷ ಟಿ. ಶೋಭಾ ಅಧ್ಯಕ್ಷತೆ ವಹಿಸಿದ್ದರು. ಜಿಲ್ಲಾ ಮಹಿಳಾ ಮತ್ತು ಮಕ್ಕಳ ಅಭಿವೃದ್ಧಿ ಅಧಿಕಾರಿ ಎಸ್ ಶಿಮ್ನಾ ಸಮಾರಂಭದಲ್ಲಿ ಮುಖ್ಯ ಅತಿಥಿಗಳಾಗಿ ಭಾಗವಹಿಸಿದ್ದರು. ಅಜಾನೂರು ಗ್ರಾಮ ಪಂಚಾಯಿತಿ ಉಪಾಧ್ಯಕ್ಷ ಕೆ.ಸಬೀಶ್, ಸ್ಥಾಯಿ ಸಮಿತಿ ಅಧ್ಯಕ್ಷ ಕೆ.ವಿ ಮೀನಾ, ಕೆ.ಕೃಷ್ಣನ್ ಮಾಸ್ತರ್, ಕಾಞಂಗಾಡು ಬ್ಲಾಕ್ ಪಂಚಾಯತಿ ಸದಸ್ಯರಾದ ಎಂ.ಜಿ.ಪುಷ್ಪಾ, ಲಕ್ಷ್ಮೀ ತಂಬಾನ್, ಕಾಸರಗೋಡು ಜಿಲ್ಲಾ ಮಕ್ಕಳ ರಕ್ಷಣಾ ಘಟಕದ ಸಮಾಜ ಸೇವಕ ಬಿ.ಅಶ್ವಿನ್, ಟೇಕ್ವಾಂಡೋ ತರಬೇತುದಾರ ವಿ. ವಿ.ಮಧು ಮತ್ತಿತರರು ಮಾತನಾಡಿದರು. ಕಾಞಂಗಾಡು ಐಸಿಡಿಎಸ್ ಶಿಶು ಅಭಿವೃದ್ಧಿ ಯೋಜನಾಧಿಕಾರಿ ಲತಿಕಾ ಪತ್ರವಳಪ್ಪಿಲ್ ಸ್ವಾಗತಿಸಿ, ಐಸಿಡಿಎಸ್ ಮೇಲ್ವಿಚಾರಕಿ ಕೆ.ವಿ.ಗೌರಿಶ್ರೀ ವಂದಿಸಿದರು.