ಸ್ವದೇಶಿ ನಿರ್ಮಿತ ಮಾನವ ರಹಿತ ವಿಮಾನ ಪರೀಕ್ಷಾರ್ಥ ಯಶಸ್ವಿ: ಡಿಆರ್ಡಿಒಗೆ ಶ್ಲಾಘನೆ

0 samarasasudhi ಜುಲೈ 01, 2022

ಬೆಂಗಳೂರು: ಸ್ವದೇಶಿ ನಿರ್ಮಿತ ಮಾನವ ರಹಿತ ವಿಮಾನದ ಪರೀಕ್ಷಾರ್ಥ ಯಶಸ್ವಿಯಾಗಿದ್ದು, ಈ ಕುರಿತು ಕೇಂದ್ರ ಸಚಿವ ಪ್ರಲ್ಹಾದ್ ಜೋಶಿ ಅವರು ತಮ್ಮ ಟ್ವಿಟ್ಟರ್ ಮೂಲಕ ಮಾಹಿತಿ ಹಂಚಿಕೊಂಡಿದ್ದು, ಭಾರತೀಯ ರಕ್ಷಣಾ ಸಂಶೋಧನೆ ಮತ್ತು ಅಭಿವೃದ್ಧಿ ಸಂಸ್ಥೆ (DRDO) ಮಾನವ ರಹಿತ ವಿಮಾನವನ್ನು ತಯಾರಿಸಿದ್ದು, ರಕ್ಷಣಾ ವ್ಯವಸ್ಥೆಯಲ್ಲಿ ಮಹತ್ತರ ಪಾತ್ರ ವಹಿಸಲಿದೆ ಎಂದಿದ್ದಾರೆ.

ಚಿತ್ರದುರ್ಗದಲ್ಲಿ ಶುಕ್ರವಾರ (ಜೂನ್ 1) ಇದರ ಪರೀಕ್ಷಾರ್ಥ ಪ್ರಯೋಗ ಮುಗಿದಿದ್ದು, ಭಾರತೀಯ ರಕ್ಷಣಾ ಪಡೆಗೆ ಶೀಘ್ರದಲ್ಲೇ ಸೇರ್ಪಡೆಯಾಗಲಿದೆ ಎಂದು ತಿಳಿಸಿದ್ದಾರೆ. ರಕ್ಷಣಾ ಸಚಿವ ರಾಜನಾಥ್ ಸಿಂಗ್, ಮಾನವ ರಹಿತ ವಿಮಾನ ಪರೀಕ್ಷಾರ್ಥ ಯಶಸ್ವಿಗಾಗಿ ಡಿಆರ್ಡಿಒ ವನ್ನು ಅಭಿನಂದಿಸಿದ್ದಾರೆ. ಇದು ಸ್ವಾಯತ್ತ ವಿಮಾನದ ಪ್ರಮುಖ ಸಾಧನೆಯಾಗಿದ್ದು, ಮಿಲಿಟರಿ ವ್ಯವಸ್ಥೆಗಳಲ್ಲಿ ಆತ್ಮನಿರ್ಭರ ಭಾರತಕ್ಕೆ ದಾರಿ ಮಾಡಿಕೊಡಲಿದೆ ಎಂದು ಹೇಳಿದ್ದಾರೆ.

ರಕ್ಷಣಾ ಇಲಾಖೆಯ ಕಾರ್ಯದರ್ಶಿ, ಡಿಆರ್ಡಿಒ ಅಧ್ಯಕ್ಷ ಡಾ.ಜಿ.ಸತೀಶ್ ರೆಡ್ಡಿ ಅವರು ವಿಮಾನದ ವಿನ್ಯಾಸ, ಅಭಿವೃದ್ಧಿ ಮತ್ತು ಪರೀಕ್ಷಾರ್ಥ ಯಶಸ್ವಿಗಾಗಿ ತಂಡದ ಪ್ರಯತ್ನವನ್ನು ಶ್ಲಾಘಿಸಿದರು.

ಏನಿದರ ವಿಶೇಷತೆ: ಸ್ವಯಂಚಾಲಿತ, ಚಾಲಕ ರಹಿತ ವಿಮಾನ ಇದಾಗಿದ್ದು, ಟೇಕ್ ಆಫ್ ನಿಂದ ಹಿಡಿದು ನ್ಯಾವಿಗೇಷನ್ ಮೂಲಕ ಪರಿಪೂರ್ಣ ಹಾರಾಟವನ್ನು ಮಾಡಲಿದೆ. ಭವಿಷ್ಯದಲ್ಲಿ ಮಾನವರಹಿತ ವಿಮಾನಗಳ ಅಭಿವೃದ್ಧಿಗೆ ನಿರ್ಣಾಯಕ ಪಾತ್ರ ವಹಿಸಲಿದೆ.