ಇಂದಿನಿಂದ ಓಣಂ ಉಚಿತ ಕಿಟ್ ವಿತರಣೆ: ಜಿಲ್ಲೆಯಲ್ಲಿ 3.36 ಲಕ್ಷ ಕಿಟ್ ಪೂರೈಕೆಗೆ ಸಿದ್ಧ

             ಕಾಸರಗೋಡು: ಓಣಂ ಅಂಗವಾಗಿ ಸಾರ್ವಜನಿಕ ವಿತರಣಾ ಇಲಾಖೆಯ ಓಣಂ ಕಿಟ್‍ಗಳ ವಿತರಣಾ ಕಾರ್ಯ ಆ.23ರಿಂದ ಆರಂಭಗೊಳ್ಳಲಿದ್ದು,  ಜಿಲ್ಲೆಯಲ್ಲಿ 3,36,324 ಕಿಟ್‍ಗಳನ್ನು ಸಾರ್ವಜನಿಕ ಪೂರೈಕೆ ಇಲಾಖೆ ಗೋದಾಮುಗಳಲ್ಲಿ  ವಿತರಣೆಗಾಗಿ ಸಿದ್ಧಪಡಿಸಲಾಗಿದೆ. ಪಡಿತರ ಅಂಗಡಿಗಳ ಮೂಲಕ ಕಿಟ್‍ಗಳ ವಿತರಣೆ ನಡೆಯಲಿದ್ದು, ಪ್ರತಿ ವರ್ಗದ ಕಾರ್ಡುದಾರರಿಗೆ ವಿತರಣೆಗೆ ಪ್ರತ್ಯೇಕ ದಿನಾಂಕಗಳನ್ನು ನಿಗದಿಪಡಿಸಲಾಗಿದೆ. ಮೊದಲ ಹಂತದಲ್ಲಿ ವಿತರಿಸುವ ಕಿಟ್‍ಗಳನ್ನು ಪಡಿತರ ಅಂಗಡಿಗಳಿಗೆ ತಲುಪಿಸಲಾಗಿದ್ದು, ನಿಗದಿತ ದಿನಾಂಕದೊಳಗೆ ಕಿಟ್ ಖರೀದಿಸಲು ಸಾಧ್ಯವಾಗದವರಿಗೆ ಸೆಪ್ಟೆಂಬರ್ 4 ರಿಂದ 7 ರವರೆಗೆ ಕಿಟ್ ವಿತರಿಸಲಾಗುವುದು.  ಓಣಂ ನಂತರ ಕಿಟ್‍ಗಳು ಲಭ್ಯವಿರುವುದಿಲ್ಲ ಎಂದು ಜಿಲ್ಲಾ ಸರಬರಾಜು ಅಧಿಕಾರಿ ಶಾಜಿಮೋನ್.ಎನ್.ಜೆ ತಿಳಿಸಿದ್ದಾರೆ.
ಕಲ್ಯಾಣ ಸಂಸ್ಥೆಗಳು, ಅನಾಥಾಲಯಗಳು ಮತ್ತು ಕಾನ್ವೆಂಟ್‍ಗಳಿಗೂ ಕಿಟ್ ನೀಡಲಾಗುತ್ತದೆ. ಪ್ರತಿ ನಾಲ್ಕು ಕೈದಿಗಳಿಗೆ ಒಂದರಂತೆ 527 ಕಿಟ್‍ಗಳನ್ನು ಪ್ರತ್ಯೇಕವಾಗಿ ವಿತರಿಸಲಾಗುವುದು.
             ಜಿಲ್ಲೆಯ 383 ಪಡಿತರ ಅಂಗಡಿಗಳ ಮೂಲಕ ಬಟ್ಟೆ ಚೀಲ ಸೇರಿದಂತೆ 14 ಅಗತ್ಯ ವಸ್ತುಗಳನ್ನು ಒಳಗೊಂಡ ಆಹಾರ ಕಿಟ್ ವಿತರಣೆಗೆ ಈಗಾಗಲೇ ಪೂರೈಕೆಯಾಗಿದೆ. 31015 ಹಳದಿ ಕಾರ್ಡ್ (ಎಎವೈ)ದಾರರಿಗೆ ಆಗಸ್ಟ್ 23 ಮತ್ತು 24 ರಂದು ಕಿಟ್ ವಿತರಿಸಲಾಗುವುದು. 114012 ಪಿಂಕ್ ಕಾರ್ಡ್ ಹೊಂದಿರುವವರಿಗೆ (ಪಿಎಚ್‍ಎಚ್) 25 ರಿಂದ 27 ರವರೆಗೆ ಮತ್ತು 98667 ಬ್ಲೂ ಕಾರ್ಡ್(ಎನ್‍ಪಿಎಸ್)ದಾರರಿಗೆ 29 ರಿಂದ 31 ರವರೆಗೆ ಲಭ್ಯವಿರುತ್ತದೆ. 92,456 ಬಿಳಿಕಾರ್ಡು(ಎನ್‍ಪಿಎನ್‍ಎಸ್)ದಾರರು ಸೆ. 1ರಿಂದ 3ರ ವರೆಗೆ ಪಡಿತರ ಅಂಗಡಿಗಳಿಂದ ಕಿಟ್‍ಗಳನ್ನು ಖರೀದಿಸಬಹುದಾಗಿದೆ.