ಜಿಲ್ಲೆ ಸಂಪೂರ್ಣ ಡಿಜಿಟಲ್ ಬ್ಯಾಂಕಿಂಗ್ ನತ್ತ: ಇಂದು ಘೋಷಣೆ

             ಕಾಸರಗೋಡು: ಜಿಲ್ಲಾಧಿಕಾರಿ ಭಂಡಾರಿ ಸ್ವಾಗತ್ ರಣವೀರಚಂದ್ ಅವರು ಆಗಸ್ಟ್ 22 ರಂದು (ಇಂದು-ಸೋಮವಾರ) ಜಿಲ್ಲೆಯ ಸಂಪೂರ್ಣ ಡಿಜಿಟಲ್ ಬ್ಯಾಂಕಿಂಗ್ ಅನ್ನು ಘೋಷಿಸಲಿದ್ದಾರೆ. ಕೇಂದ್ರ ಸರ್ಕಾರದ ಡಿಜಿಟಲ್ ಇಂಡಿಯಾ ಯೋಜನೆಯ ಭಾಗವಾಗಿ ಕೇರಳ ಸರ್ಕಾರ, ಭಾರತೀಯ ರಿಸರ್ವ್ ಬ್ಯಾಂಕ್ ಮತ್ತು ರಾಜ್ಯ ಮಟ್ಟದ ಬ್ಯಾಂಕರ್ ಸಮಿತಿಯ ಆದೇಶದ ಆಧಾರದ ಮೇಲೆ ರಾಜ್ಯದ ಎಲ್ಲಾ ಬ್ಯಾಂಕ್ ಗಳು ಡಿಜಿಟಲ್ ಬ್ಯಾಂಕಿಂಗ್ ನಲ್ಲಿ ಸಕ್ರಿಯ ಆಂದೋಲನವನ್ನು ಸೃಷ್ಟಿಸಿವೆ. ಇದರಿಂದ ಜಿಲ್ಲೆಗೆ ಯಶಸ್ಸು ಲಭಿಸಿದೆ.
           ಜಿಲ್ಲೆಯಲ್ಲಿ 276 ಶಾಖೆಗಳನ್ನು ಹೊಂದಿರುವ 26 ಬ್ಯಾಂಕ್‍ಗಳು ಕಾರ್ಯನಿರ್ವಹಿಸುತ್ತಿವೆ. ಇವುಗಳಲ್ಲಿ 11 ಸಾರ್ವಜನಿಕ ವಲಯದ ಬ್ಯಾಂಕ್‍ಗಳು, 12 ಖಾಸಗಿ ಬ್ಯಾಂಕ್‍ಗಳು ಮತ್ತು ಉಳಿದ ಪ್ರಾದೇಶಿಕ ಗ್ರಾಮೀಣ ಬ್ಯಾಂಕ್, ಕೇರಳ ಬ್ಯಾಂಕ್, ಸಣ್ಣ ಹಣಕಾಸು ಬ್ಯಾಂಕ್ ಮತ್ತು ಇಂಡಿಯನ್ ಪೋಸ್ಟ್ ಪೇಮೆಂಟ್ಸ್ ಬ್ಯಾಂಕ್ ಸೇರಿವೆ. ಈ ಬ್ಯಾಂಕ್‍ಗಳಲ್ಲಿನ 18.62 ಲಕ್ಷ ಖಾತೆಗಳಿಗೆ ಕನಿಷ್ಠ ಒಂದು ಡಿಜಿಟಲ್ ಸೌಲಭ್ಯವನ್ನು ಒದಗಿಸುವ ಮೂಲಕ ಜಿಲ್ಲೆಯು ಸಂಪೂರ್ಣ ಡಿಜಿಟಲ್ ಬ್ಯಾಂಕಿಂಗ್ ಆಗುತ್ತಿದೆ.
          ಗ್ರಾಹಕರಿಗೆ ಯುಪಿಐ ವಹಿವಾಟು, ಡೆಬಿಟ್/ರುಪೇ ಕಾರ್ಡ್ ವಿತರಣೆ, ಮೊಬೈಲ್ ಬ್ಯಾಂಕಿಂಗ್, ಇಂಟರ್ನೆಟ್ ಬ್ಯಾಂಕಿಂಗ್, ಎಇಪಿಎಸ್ ಮತ್ತು ಪಿಒಎಸ್ ಸೌಲಭ್ಯಗಳನ್ನು ಬ್ಯಾಂಕ್‍ಗಳು ಒದಗಿಸಿವೆ.
       ಡಿಜಿಟಲ್ ಬ್ಯಾಂಕಿಂಗ್ ಅನ್ನು ಬಳಸುವ ಪ್ರಯೋಜನಗಳು:
 1. ನಗದು ಸಾಗಿಸುವ ಅಗತ್ಯವಿಲ್ಲ, 2. ಸುರಕ್ಷಿತ ಕ್ರೆಡಿಟ್/ಡೆಬಿಟ್ ವಹಿವಾಟುಗಳು, 3. ಎಲ್ಲಾ ವಹಿವಾಟುಗಳನ್ನು ನಿಜವಾದ ಮೊತ್ತಕ್ಕೆ ಮಾಡಲಾಗುತ್ತದೆ, ಅಂದರೆ ಬ್ಯಾಲೆನ್ಸ್ ಮರುಪಾವತಿಯ ಅಗತ್ಯವಿಲ್ಲ. 4. ವಹಿವಾಟಿನ ಮಾಹಿತಿಯನ್ನು ಎಸ್.ಎಂ.ಎಸ್ ಮೂಲಕ ತಕ್ಷಣವೇ ಸ್ವೀಕರಿಸಲಾಗುತ್ತದೆ, 5. ಲೆಕ್ಕಕ್ಕೆ ಸಿಗದ ಹಣ ಖಾತೆಯಲ್ಲಿ ಉಳಿಯುವುದಿಲ್ಲ, 6. ಬಿಲ್ ಪಾವತಿಗೆ ಸರತಿ ಸಾಲಿನಲ್ಲಿ ನಿಲ್ಲಬೇಕಾಗಿಲ್ಲ (ವಿದ್ಯುತ್ ಬಿಲ್, ದೂರವಾಣಿ ಬಿಲ್ ಇತ್ಯಾದಿ).

                         ಡಿಜಿಟಲ್ ಸೇವಾ ಸಾಮಾನ್ಯ ಸೇವಾ ಕೇಂದ್ರ ಕಾರ್ಯಾರಂಭ:
          ಕಾಸರಗೋಡು ಹೊಸ ಬಸ್ ನಿಲ್ದಾಣದ ಆವರಣದಲ್ಲಿರುವ ಗೋಲ್ಡನ್ ಆರ್ಕೇಡ್ ಕಟ್ಟಡದಲ್ಲಿ ಡಿಜಿಟಲ್ ಸೇವಾ ಸಾಮಾನ್ಯ ಸೇವಾ ಕೇಂದ್ರ ಕಾರ್ಯಾರಂಭ ಮಾಡಿದೆ. ಕಾಸರಗೋಡು ಬ್ಲಾಕ್ ಪಂಚಾಯತಿ ಅಧ್ಯಕ್ಷ ಸಿ.ಎ.ಸೈಮಾ ಹಾಗೂ ಮಧೂರು ಗ್ರಾಮ ಪಂಚಾಯತಿ ಅಧ್ಯಕ್ಷ ಗೋಪಾಲಕೃಷ್ಣ ಉದ್ಘಾಟನೆ ನೆರವೇರಿಸಿದರು. ರವೀಂದ್ರ ರೈ ಮುಖ್ಯ ಅತಿಥಿಯಾಗಿದ್ದರು. ಚಂದ್ರಹಾಸ ಮಾಸ್ತರ್ ಭಾಗವಹಿಸಿದ್ದರು. ಎಲ್ಲಾ ಕೇಂದ್ರ ಮತ್ತು ರಾಜ್ಯ ಸರ್ಕಾರದ ಯೋಜನೆಗಳ ನೋಂದಣಿ, ಆನ್‍ಲೈನ್ ಸೇವೆಗಳು ಮತ್ತು ಇತರ ಅಪ್ಲಿಕೇಶನ್‍ಗಳು ಸಂಸ್ಥೆಯಲ್ಲಿ ಲಭ್ಯವಿರುತ್ತವೆ.