ಓಣಂ ಮಾರುಕಟ್ಟೆಗೆ ನಂಬಿಯಾರಡ್ಕ ಚೆಂಡುಮಲ್ಲಿಗೆ

                     ಮುಳ್ಳೇರಿಯ: ಹಳದಿ ಮತ್ತು ಕಿತ್ತಳೆ ಬಣ್ಣದ ಹೂವಿನ ತೋಟ ಇದೀಗ ಗಮನ ಸೆಳೆಯುತ್ತಿದೆ.  ಚೆಂಡುಮಲ್ಲಿಗೆ ಹೂ ಅರಳಿನಿಂತಿದ್ದು ತಿರುವನಂತಪುರಕ್ಕೆ ತಲುಪಲು ಸಜ್ಜುಗೊಂಡಿದೆ. ಪೆರಿಯ ಚಾಳಿಂಗಲ್ ನಂಬಿಯಾರಡ್ಕ ದಲ್ಲಿ 50 ಸೆಂಟ್ಸ್ ಸ್ಥಳದಲ್ಲಿ ಬೆಳೆಸಲಾದ ಚೆಂಡುಮಲ್ಲಿಗೆಯ ಕೃಷಿ ಪೂರ್ತಿ ಅರಳಿ ಪುಷ್ಪ ಚಿಲುಮೆಯಂತೆ ಮೈತುಂಬಿದೆ. ಪುಲ್ಲೂರು-ಪೆರಿಯ ಕೃಷಿ ಭವನದ ಪಕ್ಕದಲ್ಲಿರುವ ಕಾಞಂಗಾಡ್ ಬ್ಲಾಕ್ ಕೃಷಿ ಸೇವಾ ಕೇಂದ್ರವು ಓಣಂ ಸ್ವಾಗತಕ್ಕೆ ಮಾರಿಗೋಲ್ಡ್ ಹೈಬ್ರಿಡ್ ಹೂಗಳನ್ನು ಸಿದ್ಧಪಡಿಸಿದೆ.
          ಪ್ರತಿ ವಾರದ ಕೊಯ್ಲಿನಲ್ಲಿ 100 ಕೆ.ಜಿ.ವರೆಗೆ ಹೂವು ಸಿಗಲಿದ್ದು, ಮುಂದಿನ ವರ್ಷಗಳಲ್ಲಿ ಇನ್ನಷ್ಟು ಕಡೆ ಕೃಷಿ ವಿಸ್ತರಿಸಲು ನಿರ್ಧರಿಸಲಾಗಿದೆ ಎಂದು ಹೂವಿನ ಕೃಷಿ ಉಸ್ತುವಾರಿಯ ಪುಲ್ಲೂರು ಪೆರಿಯಾದ ಕೃಷಿ ಅಧಿಕಾರಿ ಸಿ.ಪ್ರಮೋದ್ ಕುಮಾರ್ ತಿಳಿಸಿದರು.
         ಹಸಿರು ಕ್ರಿಯಾ ಸೇನೆಯ ಕಾರ್ಯಕರ್ತರಿಗೂ ಮಾರಿಗೋಲ್ಡ್ ಸಸಿಗಳನ್ನು ನೀಡಲಾಗಿದೆ. 20 ಸೆಂಟ್ಸ್‍ನಲ್ಲಿ ಅವರ ಪುಷ್ಪಕೃಷಿ ಪ್ರಗತಿಯಲ್ಲಿದೆ. ಸ್ಥಳೀಯ ಮಹಿಳಾ ಸಂಘಗಳು ಮತ್ತು ಸ್ವಸಹಾಯ ಸಂಘಗಳಿಗೆ ಹೊಂದಿಕೊಂಡು ಪುಷ್ಪಕೃಷಿಯು ಹಬ್ಬದ ಬೆಳೆಯಾಗುತ್ತಿದೆ.

                   ಕೃಷಿ ಹೇಗೆ:
         ಸಷ್ಟಂಬರ್ ನಲ್ಲಿ ಓಣಂ ಮತ್ತು ಅಕ್ಟೋಬರ್ ನಲ್ಲಿ ನವರಾತ್ರಿ ಹಬ್ಬಗಳನ್ನು ಗಮನದಲ್ಲಿರಿಸಿ ಹೂವಿನ ಕೃಷಿಯನ್ನು ಪ್ರಾರಂಭಿಸಲಾಯಿತು. ಜುಲೈ ಮೊದಲ ವಾರದಲ್ಲಿ ಬೀಜಗಳನ್ನು ಬಿತ್ತಲಾಗಿದೆ. ಬೆಂಗಳೂರಿನಿಂದ ತಂದ ಬೀಜಗಳನ್ನು ಟ್ರೇಗಳಲ್ಲಿ ಮೊಳಕೆಯೊಡೆದು ಸಸಿಗಳನ್ನು ನೆಡಲಾಯಿತು. ಸಾವಯವ ಗೊಬ್ಬರಗಳಿಂದ ಕೃಷಿ ಸಮೃದ್ಧವಾಗಿದೆ. ಆಗ್ರೋ ಸರ್ವೀಸ್ ಸೆಂಟರ್ ಉತ್ಪಾದಿಸುವ ಚಾಕಿರಿಚೋರ್ ಅನ್ನು  ಗೊಬ್ಬರವಾಗಿ ಬಳಸಲಾಗುತ್ತದೆ. ಮಳೆಗಾಲದಲ್ಲಿ ನೀರು ನಿಲ್ಲುವುದನ್ನು ತಪ್ಪಿಸಲು ಮಣ್ಣನ್ನು ಚೆನ್ನಾಗಿ ಸಡಿಲಗೊಳಿಸಿ ಕೆಳಭಾಗದ ಗೊಬ್ಬರವನ್ನು ಸೇರಿಸಿ ಗರಿಕೆಗಳನ್ನು ಮಾಡಿ ಅದರ ಮೇಲೆ ಸಸಿಗಳನ್ನು ನೆಡಲಾಗುತ್ತದೆ. ಒಳಚರಂಡಿ ವ್ಯವಸ್ಥೆಯನ್ನೂ ಸಿದ್ಧಪಡಿಸಲಾಗಿದೆ.
                    ಕೀಟಗಳನ್ನು ಹಿಮ್ಮೆಟ್ಟಿಸಲು ಜೈವಿಕ ರಕ್ಷಣಾ
          ಆರಂಭಿಕ ಹಂತದಲ್ಲಿ ಕೀಟಗಳ ದಾಳಿಯಿದ್ದರೂ, ಜೈವಿಕ ನಿಯಂತ್ರಣ ವಿಧಾನಗಳನ್ನು ಬಳಸಿ ನಿಯಂತ್ರಿಸಲಾಯಿತು. 16 ಮಂದಿ ಕಾರ್ಮಿಕರು ಸರದಿಯಂತೆ ಜಮೀನನ್ನು ನಿರ್ವಹಿಸುತ್ತಿದ್ದರು. ಪ್ರತಿದಿನ ಸರಿಯಾಗಿ ನಿರ್ವಹಣೆ ಮಾಡುತ್ತಿದ್ದರು.
              ಮೊದಲ ಕೊಯ್ಲು ಕೃಷಿ ದಿನವಾದ ಸಿಂಹಮಾಸದ 1 ರಂದು(ಸೆ.1) ಮಾಡಲಾಯಿತು. ಕೃಷಿ ದಿನಾಚರಣೆ ಆಯೋಜನೆಗೊಂಡ ಸ್ಥಳವನ್ನು ಈ ಹೂವುಗಳಿಂದ ಅಲಂಕರಿಸಲಾಗಿತ್ತು. ಸೆಪ್ಟೆಂಬರ್ ಮೊದಲ ವಾರದಲ್ಲಿ ಪೂರ್ಣ ಪ್ರಮಾಣದ ಕಟಾವು ಆರಂಭಿಸಿ ಸೆ.4ರಿಂದ 7ರವರೆಗೆ ಕೃಷಿ ಇಲಾಖೆ ಆಶ್ರಯದಲ್ಲಿ ಓಣಂ ಮಾರುಕಟ್ಟೆಗೆ ತರುವ ಗುರಿ ಹೊಂದಲಾಗಿದೆ. ಕೃಷಿ ಸೇವಾ ಕೇಂದ್ರ ನೇರ ಮಾರುಕಟ್ಟೆ ಮಾಡಲು ನಿರ್ಧರಿಸಲಾಗಿದೆ.  ಹೂವು ಕೆಜಿಗೆ 100 ರೂ.ಬೆಲೆ ನಿಗದಿಪಡಿಸಲಾಗಿದೆ. ಈಗಾಗಲೇ ಸಾಕಷ್ಟು ಮಂದಿ ತಮ್ಮ ಬೇಡಿಕೆಯನ್ನು ಮೊದಲೇ ವ್ಯಕ್ತಪಡಿಸಿದ್ದಾರೆ. ಹಿಂದಿನ ವರ್ಷಗಳಲ್ಲಿ ಹೂವಿನ ಕೃಷಿ ಕಡಿಮೆ ಪ್ರಮಾಣದಲ್ಲಿತ್ತು.
       ಕೃಷಿ ವೆಚ್ಚ 20000 ರೂಪಾಯಿಗಿಂತ ಕಡಿಮೆ ಎಂದು ಸಂಬಂಧಪಟ್ಟವರು ತಿಳಿಸಿದ್ದಾರೆ.  50000 ರೂಪಾಯಿ ಮಾರಾಟವಾಗುವ ನಿರೀಕ್ಷೆ ಇದೆ.
             ಬೇರೆ ಆಮದು ಬೇಡ: ಓಣಂಗಾಗಿ ಹೂವುಗಳನ್ನು ತಯಾರಿಸಲು ಪ್ರತಿ ವರ್ಷ ಗಡಿಯಾಚೆಗಿನ ಬೇರೆ ರಾಜ್ಯಗಳಿಂದ ಹೂವುಗಳನ್ನು ತರಲಾಗುತ್ತಿತ್ತು. ಈ ಬಾರಿ ಬಣ್ಣಬಣ್ಣದ ಹೂ ರಂಗೋಲಿ ಸಿದ್ಧಪಡಿಸಲು ಸ್ಥಳೀಯ ಹೂವುಗಳು ಅರಳಿರುವುದು ಪೆರಿಯ ಕೃಷಿ ಭವನದ ಕೃಷಿ ಸೇವಾ ಕೇಂದ್ರದ ಕಾರ್ಮಿಕರು ಸಂತಸ ವ್ಯಕ್ತಪಡಿಸಿದ್ದಾರೆ.