ಯೂಕ್ರೇನ್​ನಲ್ಲಿ ಮತ್ತೆ ಹೆಚ್ಚಾದ ಆತಂಕ: ಕೂಡಲೇ ಸ್ವದೇಶಕ್ಕೆ ತೆರಳುವಂತೆ ಭಾರತೀಯರಿಗೆ ರಾಯಭಾರ ಕಚೇರಿ ಸೂಚನೆ

 

             ನವದೆಹಲಿ: ರಷ್ಯಾ-ಯೂಕ್ರೇನ್​ ಸಂಘರ್ಷದಲ್ಲಿ ಕೆಲವು ತಿಂಗಳುಗಳ ಹಿಂದೆ ಉಂಟಾಗಿದ್ದ ಭಾರಿ ಆತಂಕ ಪುನಃ ಮರುಕಳಿಸಿದ್ದು, ಯಾವ ಕ್ಷಣದಲ್ಲಿ ಏನಾಗಬಹುದೋ ಎಂಬ ಭೀತಿ ಆವರಿಸಿದೆ. ಪರಿಣಾಮವಾಗಿ ಅಲ್ಲಿರುವ ಭಾರತೀಯರಿಗೆ ಸ್ವದೇಶಕ್ಕೆ ಮರಳುವಂತೆ ಭಾರತೀಯ ರಾಯಭಾರ ಕಚೇರಿ ಸೂಚನೆ ನೀಡಿದೆ.

                 ಹದಗೆಡುತ್ತಿರುವ ಭದ್ರತಾ ಪರಿಸ್ಥಿತಿ ಮತ್ತು ಯೂಕ್ರೇನ್​ನ ಹಲವೆಡೆ ಇತ್ತೀಚೆಗೆ ಹೆಚ್ಚುತ್ತಿರುವ ಹಗೆತನದ ದೃಷ್ಟಿಯಿಂದ ಈ ಸೂಚನೆ ನೀಡಲಾಗುತ್ತಿದೆ ಎಂಬುದಾಗಿ ತಿಳಿಸಿರುವ ಅಲ್ಲಿನ ಭಾರತೀಯ ರಾಯಭಾರ ಕಚೇರಿ, ಎರಡು ಮಹತ್ವದ ಕಿವಿಮಾತುಗಳನ್ನು ಹೇಳಿದೆ.

                    ಈಗಾಗಲೇ ಯೂಕ್ರೇನ್‌ನಲ್ಲಿರುವ ವಿದ್ಯಾರ್ಥಿಗಳು ಸೇರಿದಂತೆ ಭಾರತೀಯ ನಾಗರಿಕರು ಅಲ್ಲಿಂದ ಬೇಗನೆ ಸ್ವದೇಶಕ್ಕೆ ಹೊರಡಲು ಸಲಹೆ ನೀಡಿದೆ. ಹಾಗೆಯೇ ಭಾರತೀಯರು ಸದ್ಯ ಯೂಕ್ರೇನ್​ಗೆ ಬರದಂತೆಯೂ ಅದು ಸೂಚನೆಯನ್ನು ನೀಡಿದೆ.