Viral Photo: ಗಾಂಭೀರ್ಯದಿಂದ ಉಸಿರಾಡುತ್ತಿರುವ ಚಿರತೆಯ ಫೋಟೋ ವೈರಲ್; ವನ್ಯಜೀವಿ ಛಾಯಾಗ್ರಾಹಕಿಯ ಸಾಹಸಕ್ಕೆ ಮೆಚ್ಚುಗೆ

 

           ನವದೆಹಲಿ: ಅತ್ಯಂತ ಕಠಿಣ ವೃತ್ತಿಗಳಲ್ಲಿ ವನ್ಯಜೀವಿ ಛಾಯಾಗ್ರಹಣವೂ ಒಂದು. ಅತ್ಯಂತ ಶ್ರಮ ಮತ್ತು ಏಕಾಗ್ರತೆ ಮೈಗೂಡಿಸಿಕೊಂಡರೆ ಮಾತ್ರ ವೈಲ್ಡ್​​ಲೈಫ್​ ಫೋಟೋಗ್ರಫಿಯಲ್ಲಿ ವೈಭವದ ದೃಶ್ಯಗಳನ್ನು ಸೆರೆಹಿಡಿಯಲು ಸಾಧ್ಯವಾಗುತ್ತದೆ. ಇದಕ್ಕಾಗಿ ಕಾಡಿನಲ್ಲೇ ಸಾಕಷ್ಟು ಸಮಯವನ್ನು ವ್ಯಯಿಸಬೇಕಾಗುತ್ತದೆ.

                ವನ್ಯ ಜೀವಿಗಳ ಚಲನವಲನವನ್ನು ಸೂಕ್ಷವಾಗಿ ಗಮನಿಸಿದಾಗ 'ವಾವ್' ಎಂದೆನಿಸುವಂತಹ ಫೋಟೋ ತೆಗೆಯಬಹುದು. ಇದೀಗ ಇಂತಹದ್ದೇ ಅದ್ಭುತ ಎಂದೆನಿಸುವ ಹಿಮ ಚಿರತೆಯ ವೈಲ್ಡ್​​ಲೈಫ್ ಫೋಟೋಗಳು ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ.

           ಅಮೇರಿಕಾ ಮೂಲದ ವನ್ಯಜೀವಿ ಛಾಯಾಗ್ರಾಹಕಿ ಕಿಟ್ಟಿಯಾ ಪಾವ್ಲೋವ್ಸ್ಕಿ(Kittiya Pawlowski) ಎಂಬಾಕೆ, ನೇಪಾಳದ ಹಿಮಾಲಯ ಶ್ರೇಣಿಯ ನಡುವೆ ಚಿರತೆಯೊಂದರ ಫೋಟೋ ಕ್ಲಿಕ್ಕಿಸಿದ್ದಾರೆ. ಇದೀಗ ಈ ಫೋಟೋ ಸಾಮಾಜಿಕ ಜಾಲತಾಣದಲ್ಲಿ ವೈರಲ್ ಆಗುತ್ತಿದೆ. ಅತ್ಯಂತ ಶೀತ ಪ್ರದೇಶದಲ್ಲಿ ಗಾಂಭೀರ್ಯದಿಂದ ಚಿರತೆಯೊಂದು ಉಸಿರಾಡುತ್ತಿರುವ ಫೋಟೋ ಇದೀಗ ಎಲ್ಲರ ಮೆಚ್ಚುಗೆಗೆ ಪಾತ್ರವಾಗುತ್ತಿದೆ.

               ಈ ಚಿರತೆಯ ಫೋಟೋ ವನ್ಯಜೀವಿ ಛಾಯಾಗ್ರಾಹಕಿಗೆ ಸಾಕಷ್ಟು ಹರಸಾಹಸ ಪಟ್ಟ ಫಲದಿಂದ ಸಿಕ್ಕಿದೆ. ಛಾಯಾಗ್ರಾಹಕಿ ಕಿಟ್ಟಿಯಾ ಪಾವ್ಲೋವ್ಸ್ಕಿ(Kittiya Pawlowski) ಸುಮಾರು 165 ಕಿ.ಮೀನಷ್ಟು ಹಿಮಾವೃತ ಪ್ರದೇಶದಲ್ಲಿ ಚಾರಣ ಮಾಡಿದ್ದಾರೆ. ಹಿಮ ಚಿರತೆಯ ಫೋಟೋ ತೆಗೆಯಬೇಕೆಂಬ ಹಠದಿಂದ ಬೆಳಗ್ಗೆ 4 ಗಂಟೆಯಿಂದ ಚಾರಣ ಕೈಗೊಂಡಿದ್ದಾರೆ. ಈ ವೇಳೆ ಎತ್ತರದ ಪ್ರದೇಶದಲ್ಲಿ ಚಿರತೆಯ ಗಾಂಭೀರ್ಯದ ಫೋಟೋಗಳನ್ನು ಕ್ಲಿಕ್ಕಿಸಲು ಸಾಧ್ಯವಾಗಿದೆ.

                'ಅಕ್ಟೋಬರ್ 9ರಂದು ಹುಣ್ಣಿಮೆಯ ದಿನವಾಗಿತ್ತು. ಈ ದಿನ ಚಂದ್ರನ ಬೆಳಕಿನಲ್ಲಿ ಹಿಮಾಲಯ ಸುಂದರವಾಗಿ ಕಾಣುತ್ತದೆ. ಇನ್ನು ಹಿಮ ಚಿರತೆಗಳು ಮುಂಜಾನೆ ಮತ್ತು ಸಂಜೆಯ ಹೊತ್ತಿನಲ್ಲಿ ಕಾಣಸಿಗುತ್ತವೆ. ಹೀಗಾಗಿ ನಾನು ಸಕಲ ಸಿದ್ಧತೆಯೊಂದಿಗೆ, ಚಿರತೆಯ ಫೋಟೋ ತೆಗೆಯಬೇಕೆಂಬ ಛಲದೊಂದಿಗೆ ಚಾರಣ ಆರಂಭಿಸಿದೆ. ಈ ವೇಳೆ ನನಗೆ ಹಿಮ ಚಿರತೆಯ ಅದ್ಭುತ ಚಿತ್ರಗಳನ್ನು ಸೆರೆಹಿಡಿಯಲು ಸಾಧ್ಯವಾಗಿದೆ' ಎಂದು ಛಾಯಾಗ್ರಾಹಕಿ ತಮ್ಮ ಇನ್ಸ್​ಟಾಗ್ರಾಂ ಪೋಸ್ಟ್​ನಲ್ಲಿ ಬರೆದುಕೊಂಡಿದ್ದಾರೆ.