ಆತ್ಮಹತ್ಯೆ ಮಾಡ್ಕೊಂಡ್ಲು 19ರ ಯುವತಿ; 62ರ ಅಜ್ಜ ಅರೆಸ್ಟ್​: ಡೆತ್​ನೋಟ್​​ನಲ್ಲಿ ಏನಿತ್ತು?

 

              ಕೊಚ್ಚಿ: 19 ವರ್ಷದ ಯುವತಿಯೊಬ್ಬಳು ಆತ್ಮಹತ್ಯೆ ಮಾಡಿಕೊಂಡಿದ್ದು, ಆಕೆಯ 62 ವರ್ಷದ ಅಜ್ಜನನ್ನು ಪೊಲೀಸರು ಬಂಧಿಸಿದ್ದಾರೆ. ಆಕೆಯ ಡೆತ್​ನೋಟ್​​ನಲ್ಲಿದ್ದ ವಿಷಯದ ಆಧಾರದ ಮೇಲೆ ಪೊಲೀಸರು ಈ ಕ್ರಮಕೈಗೊಂಡಿದ್ದಾರೆ. ಇಂಥ ಒಂದು ವಿಚಿತ್ರ ಪ್ರಕರಣ ಕೇರಳದಲ್ಲಿ ನಡೆದಿದೆ.

              ಕೇರಳದ ಕೊಚಿಕೋಡ್​ನಲ್ಲಿ ಈ ಪ್ರಕರಣ ನಡೆದಿದ್ದು, ಆತ್ಮಹತ್ಯೆ ಮಾಡಿಕೊಂಡಿರುವ ಯುವತಿಯ ಡೆತ್​ನೋಟ್​ ಸೋಮವಾರ ಪತ್ತೆಯಾಗಿದ್ದು, ಅದರಲ್ಲಿನ ಅಂಶದ ಮೇರೆಗೆ ಪೊಲೀಸರು ಈ ಕಾನೂನು ಕ್ರಮ ಜರುಗಿಸಿದ್ದಾರೆ. ಅಜ್ಜನೇ ಲೈಂಗಿಕ ಶೋಷಣೆ ನಡೆಸುತ್ತಿದ್ದ ಎಂಬುದನ್ನು ಮೊಮ್ಮಗಳು ಡೆತ್​ನೋಟ್​ನಲ್ಲಿ ಬರೆದಿದ್ದಳು.

             ಕಾಲೇಜು ವ್ಯಾಸಂಗ ಮಾಡುತ್ತಿದ್ದ ಮೊಮ್ಮಗಳು ಡಿ. 17ರಂದು ಮನೆಯಲ್ಲಿ ನೇಣು ಹಾಕಿಕೊಂಡಿದ್ದಳು. ಅವಳು ಏಳನೇ ಕ್ಲಾಸ್​​ನಲ್ಲಿ ಇದ್ದಾಗಿನಿಂದಲೇ ಅವಳ ಮೇಲೆ ಲೈಂಗಿಕ ಕಿರುಕುಳ ನಡೆಯುತ್ತಿತ್ತು ಎಂಬುದು ಆರಂಭಿಕ ವಿಚಾರಣೆಯಲ್ಲಿ ತಿಳಿದುಬಂದಿದೆ. ಆಕೆ ಡೆತ್​ನೋಟ್​ನಲ್ಲಿ ಈ ಬಗ್ಗೆ ಬರೆದಿದ್ದರಿಂದ ಆರೋಪಿಯು ಅದನ್ನು ಮುಚ್ಚಿಟ್ಟಿದ್ದು, ಇದೀಗ ಪೊಲೀಸರು ಅದನ್ನು ಪತ್ತೆ ಹಚ್ಚಿ ವಶಕ್ಕೆ ಪಡೆದಿದ್ದಾರೆ.

            'ಅಮ್ಮಾ.. ನಿನ್ನ ಫೇವರಿಟ್​ ವ್ಯಕ್ತಿ ನನಗೆ ಏನು ಮಾಡಿದ್ದಾನೆ ಅಂತ ನಿನ್ನ ತಂದೆಯನ್ನು ಕೇಳು. ನಾನು ಎಲ್ಲವನ್ನೂ ಸಹಿಸಿಕೊಂಡೆ, ಇನ್ನು ಆಗಲ್ಲ..' ಎಂಬ ಸಾಲು ಕೂಡ ಡೆತ್​ನೋಟ್​ನಲ್ಲಿದೆ. ಆರೋಪಿ ತನ್ನ ತಪ್ಪನ್ನು ಒಪ್ಪಿಕೊಂಡಿದ್ದಾಗಿ ಪೊಲೀಸರು ತಿಳಿಸಿದ್ದು, ಆತನನ್ನು ನ್ಯಾಯಾಲಯದ ಮುಂದೆ ಹಾಜರುಪಡಿಸಿ, ಪೊಲೀಸ್ ಕಸ್ಟಡಿಗೆ ಪಡೆದು ತನಿಖೆ ನಡೆಸಲಾಗುತ್ತಿದೆ ಎಂದು ತಿಳಿಸಿದ್ದಾರೆ.