ಅಕ್ಕಿ, ಸೀಮೆಎಣ್ಣೆ ಮಾತ್ರವಲ್ಲ, ಪಡಿತರ ಅಂಗಡಿಗಳು ಇನ್ನು ಮಿನಿ ಸೂಪರ್ ರ್ಮಾರ್ಕೆಟ್ ಗಳಾಗಲಿವೆ: ಕೆ-ಸ್ಟೋರ್ ಶೀಘ್ರ: ಏನಿದು?

           ತಿರುವನಂತಪುರಂ: ರಾಜ್ಯದಲ್ಲಿ ಕಾರ್ಯನಿರ್ವಹಿಸುತ್ತಿರುವ ಎಲ್ಲ ಪಡಿತರ ಅಂಗಡಿಗಳಲ್ಲಿ  ದಿನಬಳಕೆಯ ವಸ್ತುಗಳ ಮಾರಾಟ ಮಾಡುವ ‘ಕೆ ಸ್ಟೋರ್’ಗಳನ್ನಾಗಿ ಪರಿವರ್ತಿಸಲು ರಾಜ್ಯ ಸರ್ಕಾರ ಮುಂದಾಗಿದೆ. ಪಡಿತರ ವಿತರಣೆಯ ಹೊರತಾಗಿ ಇತರ ವಸ್ತುಗಳನ್ನು ಮಾರಾಟ ಮಾಡಲಾಗುವುದು ಎಂದು ಮುಖ್ಯಮಂತ್ರಿ ಪಿಣರಾಯಿ ವಿಜಯನ್ ತಿಳಿಸಿದ್ದಾರೆ. ಈ ಹಿಂದೆ, ಇತರ ಅಗತ್ಯ ವಸ್ತುಗಳು ಲಭ್ಯವಿಲ್ಲದ ಸ್ಥಳಗಳಲ್ಲಿ ಕೆ-ಸ್ಟೋರ್‍ಗಳನ್ನು ಜಾರಿಗೊಳಿಸಲಾಗುವುದು ಎಂದು ಸರ್ಕಾರ ಹೇಳಿತ್ತು, ಆದರೆ ಕೇರಳದ ಎಲ್ಲಾ ಪಡಿತರ ಅಂಗಡಿಗಳನ್ನು ಹೊಸ ಬ್ರಾಂಡ್‍ನೊಂದಿಗೆ ಮರು ಬ್ರಾಂಡ್ ಮಾಡಲು ಸರ್ಕಾರ ಯೋಜಿಸಿದೆ.
          ಕೇರಳದ ಪಡಿತರ ಅಂಗಡಿಗಳು ಶಿಥಿಲಗೊಂಡ ಗೋಡೆಗಳು, ಗೋಣಿಚೀಲಗಳು ಮತ್ತು ಅಂತ್ಯವಿಲ್ಲದ ಸಮಸ್ಯೆಗಳ ಸುಳಿಯಲ್ಲಿದೆ.  ಆದರೆ ಈ ಚಿತ್ರಣವನ್ನು ಸಂಪೂರ್ಣವಾಗಿ ಬದಲಾಯಿಸುವುದು ಸರ್ಕಾರದ ಯೋಜನೆಯಾಗಿದೆ. ಪಡಿತರ ವಿತರಕರು ಹೆಚ್ಚಿನ ಆದಾಯವನ್ನು ಪಡೆಯುವುದರ ಜೊತೆಗೆ ನಿರ್ಗತಿಕರಿಗೆ ದಿನಬಳಕೆಯ ವಸ್ತುಗಳನ್ನು ಪಡಿತರ ಅಂಗಡಿಗಳ ಮೂಲಕ ನ್ಯಾಯಯುತ ಬೆಲೆಗೆ ಪಡೆಯಬಹುದಾಗಿದೆ. ಈ ಮೂಲಕ ಪಡಿತರ ಅಂಗಡಿಗಳನ್ನು ಸಣ್ಣ ಸೂಪರ್ ಮಾರ್ಕೆಟ್ ಮತ್ತು ಮೈಕ್ರೋ ಎಟಿಎಂಗಳನ್ನಾಗಿ ಪರಿವರ್ತಿಸುವ ಗುರಿಯನ್ನು ಸರ್ಕಾರ ಹೊಂದಿದೆ.
               ಈಗ ಸಪ್ಲೈಕೋ ಉತ್ಪನ್ನಗಳು ಆನ್‍ಲೈನ್:
        ಆಧಾರ್‍ಗೆ ಲಿಂಕ್ ಮಾಡಿದ ಪಡಿತರ ಚೀಟಿಗಳನ್ನು ಕೇರಳದಲ್ಲಿ ಎಲ್ಲೆಡೆ ಸ್ವೀಕರಿಸಲಾಗುತ್ತದೆ, ಆದರೆ ಬೆಲೆಯನ್ನು ನಗದು ರೂಪದಲ್ಲಿ ಪಾವತಿಸಬೇಕಾಗುತ್ತದೆ. ಆದರೆ ಶೀಘ್ರದಲ್ಲೇ ಇದು ಕೂಡ ಬದಲಾಗಲಿದೆ. ಸರಕುಗಳ ಬೆಲೆಯನ್ನು ಡಿಜಿಟಲ್ ರೂಪದಲ್ಲಿ ಪಾವತಿಸುವುದಲ್ಲದೆ, ಪಡಿತರ ಅಂಗಡಿಯಲ್ಲಿ ಸಣ್ಣ ಬ್ಯಾಂಕ್ ವಹಿವಾಟುಗಳನ್ನು ಮಾಡುವ ಮತ್ತು ಬ್ಯಾಂಕ್ ಖಾತೆಯಿಂದ ಹಣವನ್ನು ಹಿಂಪಡೆಯುವ ಸೌಲಭ್ಯವೂ ಇರಲಿದೆ. ಇ ಪಿಒಎಸ್ ಯಂತ್ರದ ಸಹಾಯದಿಂದ ಇದನ್ನು ಕಾರ್ಯಗತಗೊಳಿಸಲಾಗುವುದು. ರಾಜ್ಯದ 837 ಪಡಿತರ ಅಂಗಡಿ ಮಾಲೀಕರು ಈ ಬದಲಾವಣೆಯನ್ನು ಜಾರಿಗೆ ತರಲು ಸೂಚಿಸಿದ್ದಾರೆ ಎಂದು ಆಹಾರ ಮತ್ತು ನಾಗರಿಕ ಸರಬರಾಜು ಸಚಿವ ಜಿ ಆರ್ ಅನಿಲ್ ಜುಲೈನಲ್ಲಿ ಹೇಳಿಕೆ ನೀಡಿದ್ದರು.


                     ಕೆ-ಸ್ಟೋರ್ ಮತ್ತು ಪಡಿತರ ಅಂಗಡಿಯ ನಡುವಿನ ವ್ಯತ್ಯಾಸವೇನು?
        ಅವುಗಳನ್ನು ಕೆ ಅಂಗಡಿಗಳಾಗಿ ಪರಿವರ್ತಿಸಿದರೂ ಪ್ರಸ್ತುತ ಪಡಿತರ ಅಂಗಡಿಗಳಿಂದ ದೊರೆಯುತ್ತಿರುವ ಸೇವೆಗಳು ಮತ್ತು ಉತ್ಪನ್ನಗಳು ಹಾಗೆಯೇ ಮುಂದುವರಿಯಲಿದೆ. ಇದಲ್ಲದೆ, ಬ್ಯಾಂಕಿಂಗ್ ವಹಿವಾಟುಗಳು, ಎಲ್‍ಪಿಜಿ ಸಿಲಿಂಡರ್‍ಗಳು, ಸಪ್ಲೈಕೋ ಉತ್ಪನ್ನಗಳು ಇತ್ಯಾದಿಗಳನ್ನು ಸಹ ಲಭ್ಯವಾಗುವಂತೆ ಮಾಡಲಾಗುವುದು. ಮಿಲ್ಮಾ ಡೈರಿ ಉತ್ಪನ್ನಗಳು ಕೆ ಸ್ಟೋರ್‍ಗಳಲ್ಲಿಯೂ ಲಭ್ಯವಿರಲಿದೆ. ಪ್ರತಿ ಜಿಲ್ಲೆಯ ಐದು ಪಡಿತರ ಅಂಗಡಿಗಳನ್ನು ಕೆಲವೇ ತಿಂಗಳಲ್ಲಿ ಪ್ರಾಯೋಗಿಕವಾಗಿ ಕೆ ಸ್ಟೋರ್‍ಗಳಾಗಿ ಪರಿವರ್ತಿಸಲು ಸರ್ಕಾರ ಯೋಜಿಸಿತ್ತು. ಆದರೆ ಮೊದಲ ಹಂತದಲ್ಲಿ ಅಂಗಡಿಗಳಿಗೆ ಸರಕು ತಲುಪಿಸುವಲ್ಲಿ ವಿಫಲವಾದ ಕಾರಣ ಯೋಜನೆ ಟೀಕೆಗೆ ಗುರಿಯಾಯಿತು.ಕನಿಷ್ಠ 300 ಚದರ ಅಡಿ ವಿಸ್ತೀರ್ಣದ ಅಂಗಡಿಗಳಿಗೆ ಕೆ-ಸ್ಟೋರ್ ಪರವಾನಗಿ ನೀಡಲಾಗುವುದು ಎಂದು ಸರ್ಕಾರ ಆರಂಭದಲ್ಲಿ ಹೇಳಿತ್ತು. ಆದರೆ ಎಲ್ಲಾ ಪಡಿತರ ಅಂಗಡಿಗಳಲ್ಲಿ ಬದಲಾವಣೆಯ ಸಂದರ್ಭದಲ್ಲಿ ಈ ಷರತ್ತು ಅನ್ವಯವಾಗುತ್ತದೆಯೇ ಎಂಬುದು ಖಚಿತವಾಗಿಲ್ಲ.
              ಕೆ-ಸ್ಟೋರ್ ಮೂಲಕ ಹಣವನ್ನು ಹಿಂಪಡೆಯಬಹುದೇ?
       ದೇಶದ ಪಡಿತರ ಅಂಗಡಿಗಳಲ್ಲಿ ಆಧಾರ್ ಆಧಾರಿತ ಇ-ಪಿಒಎಸ್ ಯಂತ್ರಗಳನ್ನು ಅಳವಡಿಸಿದಾಗ, ಕೇಂದ್ರ ಸರ್ಕಾರವೂ ಮೈಕ್ರೋ ಎಟಿಎಂಗಳ ಕಲ್ಪನೆಯನ್ನು ಮುಂದಿಟ್ಟಿತು. ಆದರೆ 2015ರಲ್ಲಿ ಕೇಂದ್ರ ಮುಂದಿಟ್ಟಿದ್ದ ಪ್ರಸ್ತಾವನೆಯನ್ನು ಜಾರಿಗೆ ತಂದ ಮೊದಲ ರಾಜ್ಯ ಕೇರಳ. ಇ-ಪಿಒಎಸ್ ಯಂತ್ರಗಳು ಮೈಕ್ರೋ-ಎಟಿಎಂಗಳಾಗುವುದರಿಂದ, ಜನರು ಸಣ್ಣ ಮೊತ್ತವನ್ನು ಹಿಂಪಡೆಯಲು, ಬ್ಯಾಂಕ್ ಬ್ಯಾಲೆನ್ಸ್ ಪರಿಶೀಲಿಸಲು, ಹಣ ವರ್ಗಾವಣೆ ಮಾಡಲು ಡೆಬಿಟ್ ಕಾರ್ಡ್‍ಗಳು ಅಥವಾ ಸ್ಮಾರ್ಟ್ ಪಡಿತರ ಕಾರ್ಡ್‍ಗಳನ್ನು ಸ್ವೈಪ್ ಮಾಡಬಹುದು.
                  ಕೆ-ಸ್ಟೋರ್‍ನಲ್ಲಿ ಏನು ಲಭ್ಯವಿರಲಿದೆ?
        ಕೆ-ಸ್ಟೋರ್‍ಗಳ ಸ್ಥಾಪನೆಯಿಂದ ಪ್ರಸ್ತುತ ಮಾವೇಲಿ ಅಂಗಡಿಗಳಲ್ಲಿ ಸಬ್ಸಿಡಿ ದರದಲ್ಲಿ ಮಾರಾಟವಾಗುವ 13 ವಸ್ತುಗಳು ಪಡಿತರ ಅಂಗಡಿಗಳ ಮೂಲಕ ಲಭ್ಯವಾಗಲಿವೆ. ಜೊತೆಗೆ ಐದು ಕಿಲೋ ತೂಕದ ಇಂಡಿಯನ್ ಆಯಿಲ್ ಚೋಟ ಗ್ಯಾಸ್ ಸಿಲಿಂಡರ್ ಕೂಡ ಪಡಿತರ ಅಂಗಡಿಯಲ್ಲಿ ಲಭ್ಯವಿರಲಿದೆ. ಮಿಲ್ಮಾ ಹಾಲು ಮತ್ತು ಇತರ ಉತ್ಪನ್ನಗಳು ಅಂಗಡಿಯಲ್ಲಿ ಲಭ್ಯವಿರುತ್ತವೆ. ಪಡಿತರ ಅಂಗಡಿಯಲ್ಲಿ ನೀರು, ವಿದ್ಯುತ್ ಬಿಲ್ ಪಾವತಿಸುವ ಸೌಲಭ್ಯವೂ ದೊರೆಯಲಿದೆ ಎಂದು ಸರ್ಕಾರ ಭರವಸೆ ನೀಡಿದೆ.