ಕ್ಯಾನ್ಸರ್ ನಿಯಂತ್ರಣ ಕಾರ್ಯಕ್ರಮ: ಬದಿಯಡ್ಕದಲ್ಲಿ ಪಂಚಾಯತಿ ಮಟ್ಟದ ತರಬೇತಿ

           ಬದಿಯಡ್ಕ: ಕ್ಯಾನ್ಸರ್ ನಿಯಂತ್ರಣ ಕಾರ್ಯಕ್ರಮದ ಅಂಗವಾಗಿ ಬದಿಯಡ್ಕ ಸಮುದಾಯ ಆರೋಗ್ಯ ಕೇಂದ್ರ(ಸಿಎಚ್ ಸಿ)ದಲ್ಲಿ ಆರೋಗ್ಯ ಕಾರ್ಯಕರ್ತರು, ಆಶಾ, ಅಂಗನವಾಡಿ, ಕುಟುಂಬಶ್ರೀ ಸಿಡಿಎಸ್ ಹಾಗೂ ಎಡಿಎಸ್ ಅಧಿಕಾರಿಗಳಿಗೆ ಒಂದು ದಿನದ ತರಬೇತಿ ನೀಡಲಾಯಿತು.
        ಕಾರ್ಯಕ್ರಮವನ್ನು ಬದಿಯಡ್ಕ ಗ್ರಾಮ ಪಂಚಾಯತಿ ಉಪಾಧ್ಯಕ್ಷ ಎಂ.ಅಬ್ಬಾಸ್ ಉದ್ಘಾಟಿಸಿದರು. ವಾರ್ಡ್ ಮಟ್ಟದಲ್ಲಿ ಅರಿವು ಮೂಡಿಸಿ ರೋಗ ಬರುವ ಸಾಧ್ಯತೆ ಇರುವವರ ಪಟ್ಟಿ ಸಿದ್ಧಪಡಿಸಿ ಕ್ಯಾನ್ಸರ್ ನ್ನು ಮೊದಲೇ ಪತ್ತೆ ಹಚ್ಚಿ ಚಿಕಿತ್ಸೆ ನೀಡುವುದು ಕಾರ್ಯಕ್ರಮದ ಉದ್ದೇಶವಾಗಿದೆ. ಜಿಲ್ಲಾ ಕ್ಯಾನ್ಸರ್ ನಿಯಂತ್ರಣ ಯೋಜನೆ, ಮಲಬಾರ್ ಕ್ಯಾನ್ಸರ್ ಕೇಂದ್ರವು ಪಂಚಾಯಿತಿಯಲ್ಲಿ ಜಾಗೃತಿ ಮತ್ತು ತಪಾಸಣೆ ನಡೆಸುತ್ತಿದೆ. ಸ್ತನ ಕ್ಯಾನ್ಸರ್, ಬಾಯಿ ಕ್ಯಾನ್ಸರ್, ಗರ್ಭಕಂಠದ ಕ್ಯಾನ್ಸರ್, ಶ್ವಾಸಕೋಶದ ಕ್ಯಾನ್ಸರ್ ಮತ್ತು ಗುದನಾಳದ ಕ್ಯಾನ್ಸರ್ ನಮ್ಮ ದೇಶದಲ್ಲಿ ಕಂಡುಬರುವ ಪ್ರಮುಖ ಕ್ಯಾನ್ಸರ್ ವರ್ಗಗಳಾಗಿವೆ. ಜೆನೆಟಿಕ್ಸ್, ಇಳಿ ವಯಸ್ಸು, ಜೀವನಶೈಲಿ ಇತ್ಯಾದಿಗಳನ್ನು ಕ್ಯಾನ್ಸರ್ ಕಾರಣಗಳೆಂದು ಪರಿಗಣಿಸಲಾಗುತ್ತದೆ. ವಾಸಿಯಾಗದ ಗಾಯಗಳು, ಇದ್ದಕ್ಕಿದ್ದಂತೆ ಕಾಣಿಸಿಕೊಳ್ಳುವ ಅಥವಾ ದೊಡ್ಡದಾಗುವ ಗಡ್ಡೆಗಳು, ನಿರಂತರ ಅಜೀರ್ಣ, ಮೂತ್ರ ಮತ್ತು ಮಲದಲ್ಲಿ ನಿರಂತರ ರಕ್ತ, ನಿರಂತರ ಕರ್ಕಶ ಮತ್ತು ಕೆಮ್ಮು ಕ್ಯಾನ್ಸರ್ನ ಲಕ್ಷಣಗಳಾಗಿವೆ. ಸ್ವಯಂ ಸೇವಾ ಸಂಸ್ಥೆಗಳು, ಕುಟುಂಬಶ್ರೀ ಹಾಗೂ ಯುವ ಸಂಘಟನೆಗಳ ಸಹಕಾರದೊಂದಿಗೆ ವಾರ್ಡ್‍ವಾರು ಜಾಗೃತಿ ನಡೆಸಲಾಗುತ್ತಿದೆ.
          ಪಂಚಾಯಿತಿ ಸದಸ್ಯ ಶ್ಯಾಮ್ ಪ್ರಸಾದ್ ಅಧ್ಯಕ್ಷತೆ ವಹಿಸಿದ್ದರು. ಬ್ಲಾಕ್ ಪಂಚಾಯಿತಿ ಸದಸ್ಯೆ ವಿದೂಷಿಖ ಅಶ್ವಿನಿ, ಸ್ಥಾಯಿ ಸಮಿತಿ ಅಧ್ಯಕ್ಷ ರವಿಕುಮಾರ್ ರೈ, ಪಂಚಾಯಿತಿ ಸದಸ್ಯರಾದ ಹಮೀದ್ ಪಳ್ಳತ್ತಡ್ಕ, ಬಾಲಕೃಷ್ಣ ಶೆಟ್ಟಿ, ಹಮೀದ್ ಕೇಂಜಾಜಿ, ಪಿಎಚ್ ಎನ್ ಸತ್ಯಭಾಮ, ಸಿಸಿಎಸ್ ಅಧ್ಯಕ್ಷೆ ಅನಿತಾ ಕ್ರಾಸ್ತ ಮಾತನಾಡಿದರು. ಆರೋಗ್ಯ ಮೇಲ್ವಿಚಾರಕ ಬಿ.ಅಶ್ರಫ್, ಜೆಪಿಎಚ್‍ಎನ್ ಎ.ಜಿ.ಲೀನಾ, ಕಿರಿಯ ಆರೋಗ್ಯ ನಿರೀಕ್ಷಕರಾದ ಕೆ.ಎಂ.ಮೋಹನನ್, ಕೆ.ಎಸ್.ರಾಜೇಶ್, ಕೆ.ಕೆ.ಶಾಕಿರ್ ತರಗತಿ ನಡೆಸಿದರು. ಆರೋಗ್ಯ ನಿರೀಕ್ಷಕ ಬಿಜುಮೋನ್ ಥಾಮಸ್ ಸ್ವಾಗತಿಸಿ, ಜೆಎಚ್‍ಐ ವಿ.ಕೆ.ಬಾಬು ವಂದಿಸಿದರು.