ಈ ಐ ಡ್ರಾಪ್ಸ್​ ಬಳಸಿದರೆ ದೃಷ್ಟಿ ಕಳೆದುಕೊಳ್ಳಬಹುದು, ಪ್ರಾಣವೂ ಹೋಗಬಹುದು!

 

        ನವದೆಹಲಿ: ಕೆಲವು ದಿನಗಳ ಹಿಂದೆ ಭಾರತದ ಕಂಪನಿಯೊಂದರ ಕಾಫ್​ ಸಿರಪ್​ ವಿದೇಶದಲ್ಲಿ ಮಕ್ಕಳ ಸಾವಿಗೆ ಕಾರಣವಾದ ಪ್ರಸಂಗವೊಂದು ನಡೆದಿತ್ತು. ಈಗ ಅದೇ ಜಾಡಿನಲ್ಲಿ ಐ ಡ್ರಾಪ್ಸ್​ ಆತಂಕ ಹುಟ್ಟಿಸಿದ್ದು, ಅದನ್ನು ಬಳಸಿದರೆ ದೃಷ್ಟಿ ಕಳೆದುಕೊಳ್ಳುವ ಅದರಲ್ಲೂ ತೀರಾ ಗ್ರಹಚಾರ ಕೆಟ್ಟಿದ್ದರೆ ಪ್ರಾಣವೂ ಹೋಗಬಹುದಾದ ಸಾಧ್ಯತೆ ಇದೆ ಎನ್ನಲಾಗಿದೆ.

           ಭಾರತ ಮೂಲದ ಔಷಧ ಉತ್ಪಾದಕ ಕಂಪನಿ ಗ್ಲೋಬಲ್ ಫಾರ್ಮಾದ ಎಝ್ರಿಕೇರ್​ (EzriCare) ಐ ಡ್ರಾಪ್ಸ್​ ಕುರಿತು ಈ ಅಪವಾದ ಕೇಳಿಬಂದಿದೆ. ಯುಎಸ್​ ಫುಡ್ ಆಯಂಡ್ ಡ್ರಗ್​ ಅಡ್ಮಿನಿಸ್ಟ್ರೇಷನ್​ ಹಾಗೂ ಸೆಂಟರ್ಸ್​​ ಫಾರ್​ ಡಿಸೀಸ್ ಕಂಟ್ರೋಲ್​ ಆಯಂಡ್ ಪ್ರಿವೆನ್ಷನ್​ ಎರಡೂ ಈ ಕುರಿತು ಎಚ್ಚರಿಕೆ ನೀಡಿವೆ. ಇಝ್ರಿಕೇರ್​ ಆರ್ಟಿಫಿಷಿಯಲ್ ಟಿಯರ್ಸ್ (EzriCare Artificial Tears)​ ಅಥವಾ ಡೆಲ್ಸಮ್ ಫಾರ್ಮಾಸ್ ಆರ್ಟಿಫಿಷಿಯಲ್ ಟಿಯರ್ಸ್ (Delsam Pharma's Artificial Tears)​ ಬಳಸದಂತೆ ಇವು ಎಚ್ಚರಿಕೆ ನೀಡಿವೆ.

              ಈ ಐ ಡ್ರಾಪ್ಸ್​ಗಳಿಂದ ತೀವ್ರ ಅನಾರೋಗ್ಯ ಕಂಡುಬಂದಿರುವ ಹಿನ್ನೆಲೆಯಲ್ಲಿ ಅಲ್ಲಿ ಇವುಗಳನ್ನು ಕಂಪನಿ ವಾಪಸ್ ಪಡೆದಿದೆ. ಯುಎಸ್​ನಲ್ಲಿ ಇವುಗಳನ್ನು ಬಳಸಿದ 50ಕ್ಕೂ ಅಧಿಕ ಮಂದಿ ಸೋಂಕಿಗೆ ಒಳಗಾಗಿದ್ದು, ಕೆಲವು ಶಾಶ್ವತವಾಗಿ ದೃಷ್ಟಿ ಕಳೆದುಕೊಂಡಿದ್ದಾರೆ. ಕೆಲವೊಂದು ಗಂಭೀರ ಸಂದರ್ಭಗಳಲ್ಲಿ ರಕ್ತದಲ್ಲಿ ಸೋಂಕು ಉಂಟಾಗಿ ಸಾವೂ ಸಂಭವಿಸಿದೆ ಎನ್ನಲಾಗಿದೆ.