ವೈದ್ಯರು ಎಮೆರ್ಜೆನ್ಸಿ ಸಮಯದಲ್ಲಿ ರೋಗಿಗಳಿಗೆ ನೀಡಲು ಮೆಡಿಸಿನ್ ಇಟ್ಟುಕೊಂಡ್ರೆ ಅದು ಅಪರಾಧವಲ್ಲ- ಸುಪ್ರೀಂ ಕೋರ್ಟ್​

 

            1940ರ ಔಷಧ ಮತ್ತು ಕಾಸ್ಮೆಟಿಕ್ಸ್ ಆಕ್ಟ್ ಸೆಕ್ಷನ್ 18(ಸಿ) ಪ್ರಕಾರ ವೈದ್ಯರು ಸಣ್ಣ ಪ್ರಮಾಣದಲ್ಲಿ ಔಷಧಗಳನ್ನು ಸಂಗ್ರಹಿಸಿದರೆ ಅದು ಅನಧಿಕೃತ ಎಂಬ ಆಪಾದನೆಗೆ ಒಳಗಾಗುವುದಿಲ್ಲ ಎಂದು ಸುಪ್ರೀಂ ಕೋರ್ಟ್ ಅಭಿಪ್ರಾಯಪಟ್ಟಿದೆ.

              ಔಷಧ ಹಾಗೂ ಕಾಸ್ಮೆಟಿಕ್ಸ್ ಆಕ್ಟ್ 1940 ರ ಪ್ರಕಾರ ಕೃಷ್ಣ ಮುರಾರಿ ಮತ್ತು ಸುಧಾಂಶು ಧುಲಿಯಾ ಒಳಗೊಂಡ ನ್ಯಾಯಪೀಠವು ಪ್ರಕರಣವೊಂದರ ವಿಚಾರಣೆಯಲ್ಲಿ ನೋಂದಾಯಿತ ವೈದ್ಯಕೀಯ ವೈದ್ಯರ ಸಂಸ್ಥೆ ಅಥವಾ ಕಚೇರಿಯಲ್ಲಿ ಸಣ್ಣ ಪ್ರಮಾಣದ ಔಷಧ ಪತ್ತೆಯಾದಾಗ, ಇದು ತೆರೆದ ಅಂಗಡಿಯಲ್ಲಿ ಕೌಂಟರ್‌ನಲ್ಲಿ ಮಾರಾಟ ಮಾಡಿದಂತಾಗುವುದಿಲ್ಲ ಎಂದು ತೀರ್ಪಿತ್ತಿದೆ.

              ನ್ಯಾಯಮೂರ್ತಿಗಳಾದ ಕೃಷ್ಣ ಮುರಾರಿ ಮತ್ತು ಸುಧಾಂಶು ಧುಲಿಯಾ ಅವರ ಪೀಠವು ನೋಂದಾಯಿತ ವೈದ್ಯಕೀಯ ವೈದ್ಯರ ಮೇಲ್ಮನವಿಯನ್ನು ಆಲಿಸಿ, ಎಲ್ಲಾ ಅಂಶಗಳನ್ನು ಕೂಲಂಕುಷವಾಗಿ ಪರಿಗಣಿಸಿ ಕ್ರಿಮಿನಲ್ ವಿಚಾರಣೆಯನ್ನು ರದ್ದುಗೊಳಿಸಿ ಈ ಕ್ರಮವನ್ನು ಘೋಷಿಸಿದೆ.

                      ಪ್ರಕರಣ ಏನಾಗಿತ್ತು?

           ಮೇಲ್ಮನವಿದಾರರಾದ ಎಸ್.ಅತಿಲಕ್ಷ್ಮಿ ಅವರು ಚೆನ್ನೈನನಲ್ಲಿ ಚರ್ಮದ ವೈದ್ಯರಾಗಿ ಕೆಲಸ ಮಾಡುತ್ತಿದ್ದರು. ಮಾರ್ಚ್ 2016 ರಲ್ಲಿ ಡ್ರಗ್ಸ್ ಇನ್ಸ್‌ಪೆಕ್ಟರ್, ವೈದ್ಯರ ಕೊಠಡಿಯಲ್ಲಿ ನಿರ್ದಿಷ್ಟ ಪ್ರಮಾಣದ ಔಷಧಿಗಳು, ಲೋಷನ್‌ಗಳು, ಮುಲಾಮುಗಳು ಇತ್ಯಾದಿಗಳನ್ನು ಪತ್ತೆ ಹಚ್ಚಿದ್ದರು.

                  ನಂತರ ಸದರಿ ಕಾಯಿದೆಯ ಸೆಕ್ಷನ್ 27(ಬಿ)(ii) ಅಡಿಯಲ್ಲಿ ಶಿಕ್ಷಾರ್ಹವಾಗಿರುವ ಮಾನ್ಯ ಡ್ರಗ್ ಲೈಸೆನ್ಸ್ ಇಲ್ಲದೇ ಮಾದಕ ದ್ರವ್ಯಗಳನ್ನು ಮಾರಾಟ ಮಾಡಲು ದಾಸ್ತಾನು ಮಾಡಿದ್ದಾರೆ ಮತ್ತು ಮಾದಕ ದ್ರವ್ಯಗಳನ್ನು ಮಾರಾಟ ಮಾಡಿದ್ದಾರೆ ಎಂದು ಆರೋಪಿಸಿ ದೂರ ದಾಖಲಿಸಿದರು.

                   ಜನವರಿ 2018 ರಲ್ಲಿ ಮಂಜೂರಾತಿಯನ್ನು ಸ್ವೀಕರಿಸಲಾಯಿತು, ನಂತರ ಇನ್ಸ್‌ಪೆಕ್ಟರ್ ಅವರು ಮೇಲ್ಮನವಿದಾರರ ವಿರುದ್ಧ ಕಾನೂನು ಕ್ರಮ ಜರುಗಿಸಲು ಎಗ್ಮೋರ್‌ನ ಮ್ಯಾಜಿಸ್ಟ್ರೇಟ್ ಮುಂದೆ ದೂರು ಸಲ್ಲಿಸಿದರು.

               ನಂತರ ಕಾನೂನು ಹೋರಾಟ ಮುಂದುವರೆದು ಡಾ.ಅತಿಲಕ್ಷ್ಮಿ ಮದ್ರಾಸ್ ಹೈಕೋರ್ಟ್‌ ಮೊರೆ ಹೋದರು. ಆದರೆ ಅಲ್ಲಿ ಕೂಡ ಸೆಕ್ಷನ್ 482 CrPC ಅಡಿಯಲ್ಲಿ ಸಲ್ಲಿಸಿದ ಆಕೆಯ ಮನವಿಯನ್ನು ವಜಾಗೊಳಿಸಲಾಯಿತು. ನಂತರ ಈ ಕೇಸ್‌ ಸುಪ್ರೀಂ ಕೋರ್ಟ್‌ ಅಂಗಳಕ್ಕೆ ಹೋಯಿತು.

                             ಸುಪ್ರೀಂ ಕೋರ್ಟ್‌ ಅವಲೋಕನಗಳೇನು?

            ಮೇಲ್ಮನವಿದಾರರು ನೋಂದಾಯಿತ ಚರ್ಮರೋಗ ವೈದ್ಯರಾಗಿದ್ದಾರೆ ಎಂಬ ಅಂಶವನ್ನು ಮದ್ರಾಸ್ ಹೈಕೋರ್ಟ್ ಪರಿಗಣನೆಗೆ ತೆಗೆದುಕೊಳ್ಳುವಲ್ಲಿ ವಿಫಲವಾಗಿದೆ.

               ವೈದ್ಯರು ಈ ಔಷಧಿಗಳನ್ನು ತುರ್ತು ಬಳಕೆಗಾಗಿ ತಮ್ಮ ರೋಗಿಗಳಿಗೆ ವಿತರಿಸಲು ಕಾಯಿದೆಗಳು ಅಡ್ಡಿಪಡಿಸುವುದಿಲ್ಲ ಎಂಬ ಅಭಿಪ್ರಾಯವನ್ನು ಕೋರ್ಟ್‌ ವ್ಯಕ್ತಪಡಿಸಿದೆ.

                ಈ ನಿಟ್ಟಿನಲ್ಲಿ, 1945 ರ ಡ್ರಗ್ಸ್ ಮತ್ತು ಕಾಸ್ಮೆಟಿಕ್ಸ್ ನಿಯಮಗಳಿಗೆ ಅನುಬಂಧಿಸಲಾದ ಶೆಡ್ಯೂಲ್ (ಕೆ) 7 ಅನ್ನು ಉಲ್ಲೇಖಿಸಿದ ನ್ಯಾಯಾಲಯವು, ಶೆಡ್ಯೂಲ್ (ಕೆ) 7 ಪ್ರಕಾರ ಅಧ್ಯಾಯ IV ರ ನಿಬಂಧನೆಗಳಿಂದ ಕೆಲವು ಔಷಧಿಗಳಿಗೆ ವಿನಾಯಿತಿ ಇದೆ. ಹೀಗಾಗಿ ಇವುಗಳನ್ನು ವೈದ್ಯರು ತಮ್ಮ ಕ್ಲಿನಿಕ್‌ ಅಥವಾ ಕೊಠಡಿಯಲ್ಲಿ ಇರಿಸಿಕೊಳ್ಳಬಹುದು ಎಂದಿದೆ.

                             "ತುರ್ತು ಸಂದರ್ಭದಲ್ಲಿ ರೋಗಿಗಳಿಗೆ ನೀಡಲು ಸಣ್ಣ ಪ್ರಮಾಣದ ಔಷಧಿ ಸಂಗ್ರಹಿಸಬಹುದು"

                ಡ್ರಗ್ಸ್ ಅಂಡ್ ಕಾಸ್ಮೆಟಿಕ್ಸ್ ಆಕ್ಟ್ 1940 ಅನ್ನು ಉಲ್ಲೇಖಿಸಿ ಸುಪ್ರೀಂ ಕೋರ್ಟ್ ಮೇಲ್ಮನವೀದಾರರ ಮೇಲಿರುವ ಅಪರಾಧವನ್ನು ರದ್ದುಗೊಳಿಸಿತು ಮತ್ತು 1940ರ ಔಷಧ ಮತ್ತು ಕಾಸ್ಮೆಟಿಕ್ಸ್ ಆಕ್ಟ್ ಸೆಕ್ಷನ್ 18(ಸಿ) ಪ್ರಕಾರ ವೈದ್ಯರು ಸಣ್ಣ ಪ್ರಮಾಣದಲ್ಲಿ ಔಷಧಗಳನ್ನು ಸಂಗ್ರಹಿಸಿದರೆ ಅದು ಅನಧಿಕೃತ ಎಂಬ ಆಪಾದನೆಗೆ ಒಳಗಾಗುವುದಿಲ್ಲ ಎಂದು ಸುಪ್ರೀಂ ಕೋರ್ಟ್ ಅಭಿಪ್ರಾಯಪಟ್ಟಿದೆ.

                  ಆಕೆ ಔಷಧಗಳನ್ನು ಮಾರಾಟಕ್ಕೆ ಸಂಗ್ರಹಿಸಿಟ್ಟಿದ್ದಳು ಎಂಬುದು ಆರೋಪವಾಗಿದೆ, ಆದರೆ ತುರ್ತು ಬಳಕೆಯ ಸಂದರ್ಭಗಳಲ್ಲಿ ತನ್ನ ರೋಗಿಗಳಿಗೆ ಔಷಧಗಳನ್ನು ಸಂಗ್ರಹಿಸಿಟ್ಟುಕೊಳ್ಳುವುದು ವೈದ್ಯರ ವಿರುದ್ಧ ಕಾನೂನು ಕ್ರಮಕ್ಕೆ ಅರ್ಹವಲ್ಲ. ತುರ್ತು ಬಳಕೆಯ ಸಂದರ್ಭಗಳಲ್ಲಿ ತನ್ನ ರೋಗಿಗಳಿಗೆ ಔಷಧಿಗಳನ್ನು ಸಂಗ್ರಹಿಸಿಟ್ಟಿರುವ ಸಾಧ್ಯತೆಯಿದೆ ಎಂದು ಸುಪ್ರೀಂ ಕೋರ್ಟ್ ಅಭಿಪ್ರಾಯಪಟ್ಟಿದೆ.