ಜಗಳ ಆಡುವುದನ್ನು ವಿಡಿಯೋ ರೆಕಾರ್ಡ್​ ಮಾಡ್ತಿದ್ದ ಆಟೋ ಚಾಲಕನ ಕೈ ಮುರಿದ ಮಹಿಳೆ!

 

              ಕೊಲ್ಲಂ: ನಡುರಸ್ತೆಯಲ್ಲಿ ಮಹಿಳೆಯರು ಜಗಳ ಆಡುವುದನ್ನು ಮೊಬೈಲ್​ನಲ್ಲಿ ವಿಡಿಯೋ ರೆಕಾರ್ಡ್​ ಮಾಡುತ್ತಿದ್ದ ಆಟೋ ಚಾಲಕನ ಮೇಲೆ ದಾಳಿ ಮಾಡಿದ ಮಹಿಳೆಯೊಬ್ಬರು ಚಾಲಕನ ಕೈ ಮುರಿದಿರುವ ಘಟನೆ ಕೇರಳದ ಕೊಲ್ಲಂನಲ್ಲಿ ನಡೆದಿದೆ.

                 ಕೊಲ್ಲಂನ ಕಡಕ್ಕಲ್​ ಮೂಲದ ವಿಜಿತ್, ಕೈ ಮುರಿತಕ್ಕೆ ಒಳಗಾದ ವ್ಯಕ್ತಿ.

ಕಳೆದ ಮಂಗಳವಾರ ಈ ಘಟನೆ ನಡೆದಿದ್ದು, ತಡವಾಗಿ ಬೆಳಕಿಗೆ ಬಂದಿದೆ. ಪಾಂಗಲುಕಾಡು ಮೂಲದ ಅನ್ಸಿಯಾ ಎಂಬುವರು ಕಬ್ಬಿಣದ ಸಲಾಕೆಯಿಂದ ವಿಜಿತ್​ ಮೇಲೆ ಹಲ್ಲೆ ಮಾಡಿದ್ದರು. ಆಕೆಯ ವಿರುದ್ಧ ಜಾಮೀನು ರಹಿತ ಸೆಕ್ಷನ್​ ಅಡಿಯಲ್ಲಿ ಪೊಲೀಸರು ಪ್ರಕರಣ ದಾಖಲಿಸಿಕೊಂಡಿದ್ದಾರೆ. ​

               ಪಾಂಗಲುಕಾಡು ಎಂಬಲ್ಲಿ ಟೈಲರಿಂಗ್ ಘಟಕ ನಡೆಸುತ್ತಿರುವ ಅನ್ಸಿಯಾ ಹಾಗೂ ಇತರ ಇಬ್ಬರು ಮಹಿಳೆಯರು ನಡುರಸ್ತೆಯಲ್ಲಿ ಜಗಳವಾಡುತ್ತಿದ್ದರು. ಮಹಿಳೆಯರು ನಿಂದಿಸುತ್ತಿರುವುದು ವಿಡಿಯೋದಲ್ಲಿ ಕಂಡು ಬಂದಿದ್ದು, ಕಲ್ಲು ತೂರಾಟವೂ ನಡೆದಿದೆ. ದಾಳಿಯ ವಿಡಿಯೋವನ್ನು ವಿಜಿತ್​ ರೆಕಾರ್ಡ್ ಮಾಡಿದ್ದಾನೆ ಎಂದು ಶಂಕಿಸಿದ ಅನ್ಸಿಯಾ, ಆಟೋ ನಿಲ್ದಾಣಕ್ಕೆ ಬಂದು ವಿಡಿಯೋ ರೆಕಾರ್ಡ್​ ಬಗ್ಗೆ ಪ್ರಶ್ನಿಸಿದ್ದಾರೆ. ವಿಡಿಯೋ ರೆಕಾರ್ಡ್​ ಮಾಡಿಲ್ಲ ಅಂತ ವಿಜಿತ್​ ಹೇಳಿದರೂ ಕೇಳದ ಅನ್ಸಿಯಾ, ಕಬ್ಬಿಣದ ಸಲಾಕೆಯಿಂದ ದಾಳಿ ಮಾಡಿ, ಅಲ್ಲಿಂದ ಪರಾರಿಯಾಗಿದಳು. ಘಟನಾ ಸ್ಥಳದಲ್ಲಿದ್ದವರು ಕೂಡಲೇ ವಿಜಿತ್​ನನ್ನು ಆಸ್ಪತ್ರೆಗೆ ದಾಖಲಿಸಿ, ಚಿಕಿತ್ಸೆ ಕೊಡಿಸಿದ್ದಾರೆ.

            ಅನ್ಸಿಯಾರೊಂದಿಗೆ ಜಗಳವಾಡಿದ ಇಬ್ಬರು ಮಹಿಳೆಯರ ದೂರಿನ ಆಧಾರದ ಮೇಲೆ ಆಕೆಯ ವಿರುದ್ಧ ಪ್ರಕರಣ ದಾಖಲಾಗಿದೆ. ಅನ್ಸಿಯಾ ವಿರುದ್ಧ ಕ್ರಮ ಕೈಗೊಳ್ಳಬೇಕು ಎಂದು ಸ್ಥಳೀಯ ನಿವಾಸಿಗಳು ಒತ್ತಾಯಿಸಿದರೂ ಪೊಲೀಸರು ಕ್ರಮ ಕೈಗೊಂಡಿಲ್ಲ ಎಂಬ ಆರೋಪ ಕೇಳಿಬಂದಿದೆ.