ಪ್ರಯಾಣಿಕರನ್ನು ಶೋಷಣೆಗೊಳಿಸುವ ದೂರುಗಳಲ್ಲಿ ಹೆಚ್ಚಳ: ಹಬ್ಬ ಹರಿದಿನಗಳಲ್ಲಿ ದುಬಾರಿ ದರ ವಿಧಿಸುವ ಬಸ್‍ಗಳ ವಿರುದ್ಧ ಕ್ರಮ: ಸಚಿವ ಆಂಟನಿರಾಜು

                ತಿರುವನಂತಪುರಂ: ಹಬ್ಬ ಹರಿದಿನಗಳಲ್ಲಿ ಪ್ರಯಾಣಿಕರಿಂದ ಅಧಿಕ ಶುಲ್ಕ ವಿಧಿಸುವ ಅಂತಾರಾಜ್ಯ ಬಸ್‍ಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲು ಸಾರಿಗೆ ಸಚಿವ ಆಂಟನಿ ರಾಜು ನೇತೃತ್ವದಲ್ಲಿ ನಡೆದ ಉನ್ನತ ಮಟ್ಟದ ಸಭೆ ನಿರ್ಧರಿಸಿದೆ.
             ಈಸ್ಟರ್, ವಿಷು, ರಂಜಾನ್ ಹಬ್ಬದ ಸಂದರ್ಭದಲ್ಲಿ ಅಂತರಾಜ್ಯ ಪ್ರಯಾಣಕ್ಕೆ ದುಬಾರಿ ಶುಲ್ಕ ವಿಧಿಸಿ ಪ್ರಯಾಣಿಕರನ್ನು ಶೋಷಣೆ ಮಾಡುತ್ತಿರುವ ಬಗ್ಗೆ ಹಲವು ದೂರುಗಳು ಬಂದ ಹಿನ್ನೆಲೆಯಲ್ಲಿ ತುರ್ತು ಸಭೆ ಕರೆಯಲಾಗಿದೆ.
         ನಿಯಮ ಉಲ್ಲಂಘಿಸಿ ಸಂಚರಿಸುವ ವಾಹನಗಳನ್ನು ಜಪ್ತಿ ಮಾಡುವುದರಿಂದ ಪ್ರಯಾಣಿಕರಿಗೆ ಆಗುವ ತೊಂದರೆಯನ್ನು ನಿವಾರಿಸುವ ಸಂಪೂರ್ಣ ಜವಾಬ್ದಾರಿ ಬಸ್ ಮಾಲೀಕರ ಮೇಲಿದೆ. ಹಬ್ಬ ಹರಿದಿನಗಳಲ್ಲಿ ವಾಹನ ತಪಾಸಣೆಗೆ ಸ್ಕ್ವಾಡ್ ರಚನೆ ಮಾಡಲು ಸಾರಿಗೆ ಆಯುಕ್ತರ ನೇತೃತ್ವದಲ್ಲಿ ಇಂದು ವಿಶೇಷ ಸಭೆ ನಡೆಯಲಿದೆ. ಕಾಂಟ್ರಾಕ್ಟ್ ಕ್ಯಾರೇಜ್ ವಾಹನಗಳಲ್ಲಿ ಸ್ಪೀಡ್ ಗವರ್ನರ್ ಮತ್ತು ಜಿಪಿಎಸ್ ಟ್ಯಾಂಪರಿಂಗ್ ಮಾಡುವ ಮೂಲಕ ಅನುಮತಿಗಿಂತ ಹೆಚ್ಚಿನ ವೇಗದಲ್ಲಿ ಚಾಲನೆ ಮಾಡುವ ವಾಹನಗಳ ವಿರುದ್ಧ ಕಠಿಣ ಕ್ರಮ ಕೈಗೊಳ್ಳಲಾಗುವುದು. ರಜೆ ಹಾಗೂ ಹಬ್ಬ ಹರಿದಿನಗಳಲ್ಲಿ ಕೆಎಸ್‍ಆರ್‍ಟಿಸಿ ಹೆಚ್ಚಿನ ಬಸ್ ಸಂಚಾರ ನಡೆಸುವಂತೆ ಸಚಿವ ಆಂಟನಿರಾಜು ಸೂಚಿಸಿದರು.
          ರಾಜ್ಯದ ಸ್ಟೇಜ್ ಕ್ಯಾರೇಜ್‍ಗಳಲ್ಲಿ ಕ್ಯಾಮೆರಾ ಅಳವಡಿಸುವ ಗಡುವನ್ನು ಜೂನ್ 30ರವರೆಗೆ ವಿಸ್ತರಿಸಲಾಗಿದೆ. ಗುಣಮಟ್ಟದ ಕ್ಯಾಮೆರಾಗಳ ಕೊರತೆ ಹಾಗೂ ಕ್ಯಾಮೆರಾ ಖರೀದಿಗೆ ಕೆಎಸ್‍ಆರ್‍ಟಿಸಿಯ ಟೆಂಡರ್ ಪ್ರಕ್ರಿಯೆ ಪೂರ್ಣಗೊಳಿಸಲು ಹೆಚ್ಚಿನ ಕಾಲಾವಕಾಶ ಬೇಕು ಎಂಬ ಕಾರಣಕ್ಕೆ ಹೆಚ್ಚಿನ ಕ್ಯಾಮೆರಾಗಳು ಬೇಕಾದಾಗ ಕಂಪನಿಗಳು ದುಬಾರಿ ಬೆಲೆ ವಿಧಿಸಿ ಶೋಷಣೆ ಮಾಡುತ್ತಿರುವುದು ಗಮನಕ್ಕೆ ಬಂದ ಹಿನ್ನೆಲೆಯಲ್ಲಿ ದಿನಾಂಕ ವಿಸ್ತರಿಸಲಾಗಿದೆ.
             ಸ್ಟೇಜ್ ಕ್ಯಾರೇಜ್‍ಗಳಲ್ಲದೆ, ಬಸ್‍ಗಳು ಮತ್ತು ಶಿಕ್ಷಣ ಸಂಸ್ಥೆಗಳ ಕಾಂಟ್ಯಾಕ್ಟ್ ಕ್ಯಾರೇಜ್‍ಗಳಿಗೂ ಕ್ಯಾಮೆರಾಗಳನ್ನು ಕಡ್ಡಾಯಗೊಳಿಸಲು ನಿರ್ಧರಿಸಲಾಗಿದೆ ಎಂದು ಸಚಿವರು ಹೇಳಿದರು. ಈ ಹಿಂದೆ ಖಾಸಗಿ ಬಸ್‍ಗಳ ಪೈಪೆÇೀಟಿಯಿಂದ ಟ್ರಾಫಿಕ್ ಅಪಘಾತಗಳನ್ನು ನಿಯಂತ್ರಿಸಲು ಬಸ್‍ಗಳ ಒಳಗೆ ಮತ್ತು ಹೊರಗೆ ಕ್ಯಾಮೆರಾ ಅಳವಡಿಸಲು ಮಾರ್ಚ್ 31ರವರೆಗೆ ಗಡುವು ನೀಡಲಾಗಿತ್ತು. ಸಾರಿಗೆ ಕಾರ್ಯದರ್ಶಿ ಹಾಗೂ ಕೆಎಸ್‍ಆರ್‍ಟಿಸಿ ಸಿಎಂಡಿ ಬಿಜು ಪ್ರಭಾಕರ್, ಹೆಚ್ಚುವರಿ ಸಾರಿಗೆ ಆಯುಕ್ತ ಪಿ.ಎಸ್. ಪ್ರಮೋಜ್ ಶಂಕರ್ ಮುಂತಾದ ಉನ್ನತ ಅಧಿಕಾರಿಗಳು ಸಭೆಯಲ್ಲಿ ಭಾಗವಹಿಸಿದ್ದರು.