ವೃತ್ತಿಜೀವನದಲ್ಲಿ ಜನಮೆಚ್ಚುವ ಕಾರ್ಯ ಮಾಡಬೇಕು: ಕಾಸರಗೋಡು ಕೋಓಪರೇಟಿವ್ ಟೌನ್ ಬ್ಯಾಂಕ್‍ನ ಬದಿಯಡ್ಕ ಪ್ರಬಂಧಕರಿಗೆ ಬೀಳ್ಕೊಡುಗೆ

       ಬದಿಯಡ್ಕ: ವೃತ್ತಿಯಿಂದ ನಿವೃತ್ತರಾಗುತ್ತಿರುವ ಕಾಸರಗೋಡು ಕೋಓಪರೇಟಿವ್ ಟೌನ್ ಬ್ಯಾಂಕ್ ಬದಿಯಡ್ಕ ಶಾಖಾ ಪ್ರಬಂಧಕ ನಾಗೇಶ್ ಎಂ. ಅವರಿಗೆ ಬೀಳ್ಕೊಡುಗೆ ಸಮಾರಂಭ ಬ್ಯಾಂಕ್ ನ ಬದಿಯಡ್ಕ ಶಾಖೆಯಲ್ಲಿ ಸೋಮವಾರ ಜರಗಿತು. ಬದಿಯಡ್ಕ ಗ್ರಾಮಪಂಚಾಯಿತಿ ಸದಸ್ಯ ಬಾಲಕೃಷ್ಣ ಶೆಟ್ಟಿ ಕಡಾರು ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದರು. ಬ್ಯಾಂಕ್ ನಿರ್ದೇಶಕ ಎನ್.ಸತೀಶ್ ಮಾತನಾಡಿ ವೃತ್ತಿಜೀವನದಲ್ಲಿ ಜನಮೆಚ್ಚುವ ಕಾರ್ಯವನ್ನು ಮಾಡಿದ ವ್ಯಕ್ತಿ ನಿವೃತ್ತರಾಗುವ ಸಂದರ್ಭದಲ್ಲಿ ಜನರ ಹತ್ತಿರಕ್ಕೆ ತಲುಪುತ್ತಾರೆ. ಅವರೊಂದಿಗೆ ಆ ಊರಿನ ಜನರ ಪ್ರೀತಿ, ಸ್ನೇಹ ಸದಾ ಇರುತ್ತದೆ. ಆ ಭಾಗ್ಯವನ್ನು ನಾಗೇಶ್ ಅವರು ಪಡೆದುಕೊಂಡಿದ್ದಾರೆ ಎಂದರು. 

         ಸನ್ಮಾನವನ್ನು ಸ್ವೀಕರಿಸಿ ನಾಗೇಶ್ ಎಂ. ಮಾತನಾಡಿ ಬ್ಯಾಂಕ್ ನ ಆಡಳಿತ ಮಂಡಳಿಗೆ ಸಹೋದ್ಯೋಗಿಗಳಿಗೆ, ಗ್ರಾಹಕರಿಗೆ ಕೃತಜ್ಞತೆಯನ್ನು ಅರ್ಪಿಸಿದರು. ನಿವೃತ್ತ ಪ್ರಾಂಶುಪಾಲ ಎಂ.ನಾರಾಯಣ ಭಟ್ ಮೈರ್ಕಳ, ಸಾಮಾಜಿಕ ಕಾರ್ಯಕರ್ತ ಕೃಷ್ಣ ನಾಯ್ಕ ಪೆರಡಾಲ, ಚೆಂಗಳ ಗ್ರಾಮಪಂಚಾಯಿತಿ ಸದಸ್ಯ ಲತೀಫ್ ಸಿ.ಕೆ., ಬದಿಯಡ್ಕ ಗ್ರಾಮಪಂಚಾಯಿತಿ ಸದಸ್ಯ ಈಶ್ವರ ಮಾಸ್ತರ್ ಪೆರಡಾಲ, ಗೋಪಾಲಕೃಷ್ಣ ಮುಂಡೋಳುಮೂಲೆ, ಫ್ರಾನ್ಸಿನ್ ಕ್ರಾಸ್ತಾ, ಅಬ್ದುಲ್ ಖಾದರ್ ಹಾಜಿ ಲೂಲು, ವಕೀಲ ಗಣೇಶ್, ದಿನೇಶ ಪ್ರಭು ಕರಿಂಬಿಲ, ಬ್ಯಾಂಕ್ ನ  ಗ್ರಾಹಕರು, ಸಿಬ್ಬಂದಿಗಳು ಪಾಲ್ಗೊಂಡಿದ್ದರು. ಬ್ಯಾಂಕ್ ಉದ್ಯೋಗಿ ಕೃಷ್ಣ ಪ್ರಸಾದ ಬಾಂಜತ್ತಡ್ಕ ಸ್ವಾಗತಿಸಿ, ಹರೀಶ್ ನಾರಂಪಾಡಿ ವಂದಿಸಿದರು.