ಪ್ರತ್ಯೇಕ ಬಜೆಟ್‌ ಪದ್ಧತಿ ನಿಲ್ಲಿಸಿ ಬಿಜೆಪಿ ರೈಲ್ವೆಯನ್ನು ನಾಶ ಮಾಡಿದೆ: ಬ್ಯಾನರ್ಜಿ

                 ಕೋಲ್ಕತ್ತ: ಕೇಂದ್ರ ಸರ್ಕಾರ ಪ್ರತ್ಯೇಕ ರೈಲ್ವೆ ಬಜೆಟ್‌ ಮಂಡಿಸುವ ಪದ್ಧತಿಯನ್ನು ನಿಲ್ಲಿಸಿದ ದಿನವೇ ಭಾರತೀಯ ರೈಲ್ವೆ ನಾಶವಾಗಿದೆ ಎಂದು ಬಿಜೆಪಿ ವಿರುದ್ಧ ಪಶ್ಚಿಮ ಬಂಗಾಳದ ಮುಖ್ಯಮಂತ್ರಿ ಮಮತಾ ಬ್ಯಾನರ್ಜಿ ವಾಗ್ದಾಳಿ ನಡೆಸಿದರು.

               2017 ರಲ್ಲಿ ನರೇಂದ್ರ ಮೋದಿ ಸರ್ಕಾರವು ಕೇಂದ್ರ ಬಜೆಟ್‌ನೊಂದಿಗೆ ರೈಲ್ವೆ ಬಜೆಟ್‌ ಅನ್ನು ವಿಲೀನಗೊಳಿಸುವ ಮೂಲಕ ಸುಮಾರು 100 ವರ್ಷಗಳ ಅಭ್ಯಾಸವನ್ನು ಕೊನೆಗೊಳಿಸಿತು.

                 'ನಾನು ರೈಲ್ವೆ ಸಚಿವೆಯಾಗಿದ್ದಾಗ, ಹಣಕಾಸು, ನೌಕರರ ಕಲ್ಯಾಣ, ಸಿಗ್ನಲಿಂಗ್‌, ಇಂಜಿನಿಯರಿಂಗ್‌ ಮತ್ತು ಎಲೆಕ್ಟ್ರಿಕಲ್‌ ಹೀಗೆ ವಿವಿಧ ರೈಲ್ವೆ ಇಲಾಖೆಗಳ ಕ್ಯಾಬಿನೆಟ್‌ ಶ್ರೇಣಿಯ ಆರು ಕಾರ್ಯದರ್ಶಿಗಳನ್ನು ಹೊಂದುವ ಆಯ್ಕೆಯಿತ್ತು. ಅವರು ವಿವಿಧ ಇಲಾಖೆಗಳ ನಡುವೆ ಸಮನ್ವಯ ಕಾಯ್ದುಕೊಳ್ಳಲು ಸಹಾಯ ಮಾಡುತ್ತಿದ್ದರು. ಆದರೆ ಇಂದು ಅಂತಹ ಸಮನ್ವಯ ಹೋಗಿದೆ' ಎಂದು ಮಮತಾ ಬ್ಯಾನರ್ಜಿ ಹೇಳಿದರು.

                   'ಪ್ರತ್ಯೇಕವಾಗಿ ಬಜೆಟ್‌ ಮಂಡಿಸುವುದನ್ನು ನಿಲ್ಲಿಸಿದ ದಿನವೇ ಭಾರತೀಯ ರೈಲ್ವೆ ನಾಶವಾಯಿತು. ಈ ದಿನಗಳಲ್ಲಿ ಯಾರೂ ಈ ವಿಷಯಗಳ ಬಗ್ಗೆ ಕಾಳಜಿ ವಹಿಸುತ್ತಿಲ್ಲ ಎಂದು ಬ್ಯಾನರ್ಜಿ ಸುದ್ದಿಗಾರರಿಗೆ ತಿಳಿಸಿದರು.

              ಜೂನ್‌ 2 ರಂದು ಒಡಿಶಾದಲ್ಲಿ ನಡೆದ ತ್ರಿವಳಿ ರೈಲು ಅಪಘಾತದಲ್ಲಿ ಪಶ್ಚಿಮ ಬಂಗಾಳದ ನಿವಾಸಿಗಳು ಸೇರಿದಂತೆ 288 ಜನರು ಮೃತಪಟ್ಟಿದ್ದಾರೆ ಎಂದು ಟಿಎಂಸಿ ವರಿಷ್ಠರ ಹೇಳಿಕೆ ತಿಳಿಸಿದೆ. ಆದರೆ, ರೈಲು ದುರಂತದ ಹಿಂದಿನ ಸತ್ಯವನ್ನು ಹತ್ತಿಕ್ಕುವಲ್ಲಿ ಬಿಜೆಪಿ ಕೇಂದ್ರ ಸರ್ಕಾರ ನಿರತವಾಗಿದೆ ಎಂದು ಬ್ಯಾನರ್ಜಿ ಆರೋಪಿಸಿದರು.

                   'ನಾನು ಇದನ್ನು ಮೊದಲೇ ಹೇಳಿದ್ದೇನೆ, ಮತ್ತೆ ಪುನರಾವರ್ತಿಸುತ್ತೇನೆ. ನಮಗೆ ಬೇಕಾಗಿರುವುದು ಅಪಘಾತದ ಕಾರಣದ ಬಗ್ಗೆ ಸತ್ಯ ಹೊರಬರಬೇಕು. ಸತ್ಯವನ್ನು ಹೇಗೆ ದುರ್ಬಳಕೆ ಮಾಡಲಾಗುತ್ತಿದೆ ಮತ್ತು ಅಪಘಾತದ ನಿಜವಾದ ಕಾರಣವನ್ನು ಮುಚ್ಚಿ ಹಾಕಲು ನಕಲಿ ಕಥೆಗಳನ್ನು ಹೇಳುತ್ತಿರುವುದನ್ನು ನಾವು ನೋಡಿದ್ದೇವೆ' ಎಂದು ಮಮತಾ ವಾಗ್ದಾಳಿ ನಡೆಸಿದರು.

ಮಣಿಪುರದ ಅಶಾಂತಿಯ ಬಗ್ಗೆ ಮಾತನಾಡಿದ ಬ್ಯಾನರ್ಜಿ, ಸತ್ಯವನ್ನು ಹತ್ತಿಕ್ಕಲು ಮಣಿಪುರ ರಾಜ್ಯಕ್ಕೆ ಪತ್ರಕರ್ತರು ಸೇರಿದಂತೆ ಯಾರಿಗೂ ಭೇಟಿ ನೀಡಲು ಕೇಂದ್ರವು ಅವಕಾಶ ನೀಡುತ್ತಿಲ್ಲ ಎಂದು ಹೇಳಿದರು.

                   ತ್ರಿವಳಿ ರೈಲು ಅಪಘಾತದ ಸಂತ್ರಸ್ತರಿಗೆ ಪರಿಹಾರ ನೀಡಲು ಕಟ್ಟಡ ಮತ್ತು ಇತರ ನಿರ್ಮಾಣ ಕಾರ್ಮಿಕರ ಕಲ್ಯಾಣ ಮಂಡಳಿಯ ಹಣವನ್ನು ಬಳಸಿಕೊಳ್ಳಲಾಗುತ್ತಿದೆ ಎಂದು ಆರೋಪಿಸಿ ಕೇಂದ್ರ ಕಾರ್ಮಿಕ ಮತ್ತು ಉದ್ಯೋಗ ಸಚಿವಾಲಯವು ರಾಜ್ಯಕ್ಕೆ ಪತ್ರ ಬರೆದಿದೆ. ನಾನು ದುರಂತ ನಿರ್ವಹಣಾ ವಿಭಾಗದ ಹಣವನ್ನು ಬಳಸಿದ್ದೇನೆ ಎಂದು ಹೇಳಿದರು.

               'ನನಗೆ ಹೆಚ್ಚು ಮುಖ್ಯವಾದುದು ಜನರಿಗೆ ನೆರವು ನೀಡುವುದು. ಹಣ ಯಾವ ಇಲಾಖೆಯಿಂದ ಬರುತ್ತದೆ ಎಂದು ನಾನು ನೋಡುತ್ತಿಲ್ಲ. ಎಲ್ಲಾ ನಿಧಿಗಳು ರಾಜ್ಯಕ್ಕೆ ಸೇರಿವೆ. ನಾನು ಹಣವನ್ನು ಎಲ್ಲಿಂದ ಪಡೆದುಕೊಂಡಿದ್ದೇನೆ ಎಂಬುದರ ಮೇಲೆ ಕೇಂದ್ರಿಕರಿಸುವ ಬದಲು ಬಿಜೆಪಿ ಅವರು ಏನಾದರೂ ಒಳ್ಳೆಯದನ್ನು ಮಾಡಲಿ' ಬಿಜೆಪಿ ಸುಳ್ಳು ನಿರೂಪಣೆಗಳನ್ನು ಸೃಷ್ಟಿಸುವ ಸುಳ್ಳುಗಾರರ ಪಕ್ಷವಾಗಿದೆ ಎಂದು ಬ್ಯಾನರ್ಜಿ ಪ್ರತಿಪಾದಿಸಿದರು.

                   ಮಣಿಪುರ ಮತ್ತು ಉತ್ತರ ಪ್ರದೇಶದಲ್ಲಿ ನಡೆಯುತ್ತಿರುವ ದೌರ್ಜನ್ಯಗಳ ಬಗ್ಗೆ ಮೌನ ವಹಿಸಿರುವುದಕ್ಕೆ ಬಿಜೆಪಿಯವರಿಗೆ ನಾಚಿಕೆಯಾಗಬೇಕು ಎಂದು ಅವರು ಟೀಕಿಸಿದರು.

ಪಶ್ಚಿಮ ಬಂಗಾಳಕ್ಕೆ ಹಲವಾರು ಯೋಜನೆಗಳು ಮತ್ತು ಯೋಜನೆಗಳಿಗೆ ಹಣವನ್ನು ಕಳುಹಿಸುವುದನ್ನು ಕೇಂದ್ರ ಸರ್ಕಾರ ಸ್ಥಗಿತಗೊಳಿಸಿದೆ ಎಂದು ಆರೋಪಿಸಿದ ಬ್ಯಾನರ್ಜಿ, 2024 ರ ಲೋಕಸಭಾ ಚುನಾವಣೆಯ ನಂತರ ದೆಹಲಿಯಲ್ಲಿ ಹೊಸ ಸರ್ಕಾರ ಸ್ಥಾಪನೆಯಾದ ನಂತರ ಈ ಸಮಸ್ಯೆಗಳನ್ನು ಪರಿಹರಿಸಲಾಗುವುದು ಎಂದು ಮಮತಾ ವಿಶ್ವಾಸ ವ್ಯಕ್ತಪಡಿಸಿದರು.